Charter Document - 05400491

Noverint universi quod cum abbas et conventus Sancti Benedicti Floriacensis coram nobis cantore capicerio et archipresbytero Soliacensi autoritate apostolica in causam traherent presbyterum de Draciaco super eo quod medietas oblationum que fiunt in Assumptione Beate Marie in festo Omnium Sanctorum in Nativitate Domini et in crastino ejusdem Nativitatis in ecclesia de Draciaco a quibuscunque uxoratis et ab his qui tenent locum et focum in parochia ejusdem ecclesie exceptis eorum familia militibus servientibus forestariis muneriis et illis qui habitant locum qui vulgariter nuncupatur Arte dividi debeat in quinque portiones quarum dicti abbas et conventus tres debent percipere et dictus presbyter de Draciaco alias duas dictus presbyter de Draciaco medietatem dictarum oblationum in tres tantummodo partes dividebat quarum duas percipiebat aliam tantummodo ipsis abbati et conventui percipiendam dimittebat quod in ipsorum prejudicium et gravamen fieri asserebant tandem super his legitime contestata jurato hinc inde de calumnia productis testibus ex parte dictorum abbatis et conventus juratis diligenter examinatis eorumque depositionibus publicatis visis attestationibus et diligenter inspectis auditis et intellectis rationibus et confessionibus utriusque partis et esset conclusum in causa ab eisdem die certa ad audiendam definitivam sententiam partibus assignata procuratore dictorum abbatis et conventus et dicto presbytero presentibus et sententiam petentibus nos ordine juris in omnibus observato dictum presbyterum per definitivam sententiam condemnavimus ad faciendam de medietate omnium oblationum que fient de cetero in dicta ecclesia in quatuor festis supradictis a personis superius nominatis quinque portiones quarum portionum dicti abbas et conventus tres sine aliqua contradictione de cetero percipiant alie vero due penes dictum presbyterum pacifice remanebunt Actum anno Domini MCCXXXVI mense augusto in crastino octave beati Laurentii