Charter Document - 05400452
| Charter Number: | 05400452 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1228 |
| Date type: | Internal, Calendar, Papal |
| Resource Link(s): |
|
Charter:
Gregorius episcopus servus servorum Dei dilectis filiis abbati et conventui monasterii Sancti Benedicti Floriacensis ad Romanam ecclesiam nullo medio pertinentis ordinis Sancti Benedicti Aurelianensis dioecesis salutem et apostolicam benedictionem Cum a nobis petitur quod justum est et honestum tam vigor equitatis quam ordo exigit rationis ut id per sollicitudinem officii nostri ad debitum perducatur effectum Exhibita siquidem nobis vestra petitio continebat quod cum monasterium vestrum cum prioratibus et membris ad ipsum monasterium pleno jure spectantibus ad Romanam ecclesiam nullo pertineat mediante locorum diocesani vestris nonnunquam libertatibus invidentes ecclesias cimeteria et capellas dictorum monasterii prioratuum et membrorum cum ea interdici per effusionem sanguinis vel seminis violari contingit reconciliare indebite contradicunt Quocirca nobis humiliter supplicastis ut providere super hoc paterna sollicitudine curaremus Nos igitur vestris supplicationibus inclinati ut si predicti locorum diocesani a vobis humiliter requisiti ecclesias cimeteria et capellas predicta cum ea taliter violari contigerit reconciliare noluerint liceat vobis quemcumque malueritis catholicum eligere episcopum gratiam et communionem Sedis apostolice habentem qui ecclesias capellas et cimeteria predicta nostra fultus authoritate reconciliare valeat quoties fuerit oportunum nobis authoritate presentium indulgemus Nulli ergo [] Si quis autem [] Datum apud Urbem Veterem idibus maii pontificatus nostri anno secundo