Charter Document - 05400418
| Charter Number: | 05400418 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Judgement |
| Date: | 1225 |
| Date type: | Internal, A.D., Feast |
| Resource Link(s): |
|
Charter:
In nomine patris et filii et spiritus sancti amen Nos Sancte Genovefe et Sancti Eligii priores et celerarius Sancte Genovefe ab abbate suo dictorum priorum conjudice subdelegatus Parisiensis judices a Domino papa delegati in causa que vertebatur inter fratres militie Templi ex una parte et thesaurarium de Villaribus Sancti Benedicti Floriacensem fratrem et monachum ex altera super hoc quod dicebant dicti fratres militie Templi quod cum ipsi vina sua vendi facerunt in domo sua apud Villaria Sancti Benedicti thesaurarius de Villaribus Sancti Benedicti per se et per auxilium suum impedivit quominus predicti fratres in predicta domo venderent vinum supradictum unde incurrerunt damna usque ad decem libras parisiensium que petebant sibi restitui dicti fratres ab eodem Dicebant etiam quod dictus thesaurarius minus juste et violenter fregit per se et complices suos ostium domus sue supradicte multa opprobria et convitia habitantibus in ea inferendo unde iidem fratres Templi dictas injurias sibi competenter petebant emendari quas noluissent sustinuiisse dicti fratres pro viginti libris parisiensibus petebant etiam dicti fratres a thesaurario supradicto quod sibi satisfaciat super quadam injuria illata cuidam homini suo videlicet Saraceno in quem dictus thesaurarius manus dicitur injecisse violentas ipsum optime verberando quam injuriam noluissent sustinuisse pro centum solidis petebant etiam jam dicti fratres a dicto thesaurario quod sibi restituat quedam vadia que detinet minus juste pro equis ipsorum fratrum captis ab ipso thesaurario in nemore de Villaribus Sancti Benedicti quod estimant centum solidos parisiensium et pro damnis et deperditis que incurrerunt dicti fratres pro detentione dictorum vadiorum et pro captione dictorum equorum petebant viginti libras parisiensium petebant etiam dicti fratres emendari a dicto thesaurario istam injuriam quam noluissent sustinuisse pro decem libris parisiensium et quod de cetero cesset ab injuriis istis et consimilibus et hoc petebant salvo jure addendi et diminuendi et immutandi lite coram nobis supra legitime contestata confessionibus utrobique factis et testibus utriusque partis receptis et attestationibus publicatis assignata die utrique parti ad dicendum in testes et dicta testium et facta conclusione in dicta causa die partibus ad proferendam sententiam definitivam assignata presentibus dicto thesaurario pro se et procuratore dictorum fratrum scilicet Joanne clerico de prudentum et bonorum virorum consilio ab impetitione dictorum fratrum per definitivam sententiam absolvimus thesaurarium memoratum dicto procuratori super hoc nomine Templi perpetuum silentium imponentes Datum anno Domini millesimo ducentesimo vicesimo quinto die veneris ante Pentecosten