Charter Document - 05400406
| Charter Number: | 05400406 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1224 |
| Date type: | Internal, A.D. |
| Resource Link(s): |
|
Charter:
Galterus Dei gratia Senonensis archiepiscopus universis presentes litteras inspecturis in Domino salutem Universitati vestre notum fieri volumus quod cum verteretur controversia inter nos ex una parte et venerabiles viros Bartholomeum abbatem et conventum Sancti Benedicti Floriacensis ex alia coram venerabili in Christo patre Symone Bituricensi archiepiscopo J Dolensi abbate et magistro P de Vico archidiacono Bituricensi a Domino Papa judicibus delegatis super procuratione quam petebamus in monasterio Sancti Benedicti Floriacensis tandem intervenientibus bonis viris et habita deliberatione plenaria compromisimus in eosdem tanquam in arbitros seu arbitratores promittentes quod quicquid iidem dicerent vel statuerent vel eciam ordinarent super eadem controversia firmiter observaremus et litteris nostris et capituli nostri Senonensis firmaremus ipsi vero habito prudentum virorum consilio dictum suum protulerunt in hunc modum quod pro dicta procuratione monasterii abbas et conventus darent nobis quadringentas libras parisiensium et sic monasterium Sancti Benedicti esset a dicta procuratione liberum et in perpetuum absolutum Nos autem dictum eorum sicut superius est expressum approbantes et ratum habentes dictam procurationem in prefato monasterio pro ipsis quadringentis libris parisiensium de quibus est nobis plenarii satisfactum quitavimus ita quod predictum monasterium ab ipsa procuratione sit liberum in perpetuum et absolutum nolentes quod propter hoc fiat aliquod prejudicium privilegiis a Romana ecclesia eidem monasterio indultis vel quod eis in aliquo derogetur In cujus rei noticiam presentibus litteris sigillum nostrum duximus apponendum Actum anno gratie millesimo ducentesimo vicesimo quarto mense octobris