Charter Document - 05400376
| Charter Number: | 05400376 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1220 |
| Date type: | Internal, A.D. |
| Resource Link(s): |
|
Charter:
Manasses Dei gratia Aurelianensis episcopus omnibus presentes litteras inspecturis salutem in Domino Attendentes quod in generali concilio deliberatione provida sit statutum ut presbyteris parochialium ecclesiarum servitio deputatis de provendibus oblationum et decimarum ad ecclesias ipsas pertinentibus portio sufficiens assignetur de voluntate et assensu venerabili viri Bartholomei abbatis Sancti Benedicti Floriacensis qui in ecclesia de Bogiaco jus patronatus habere dinoscitur autoritate ejusdem concilii presbytero ipsius ecclesie in augmentationem sui redditus duximus assignandum quod duas partes oblationum ad altare suum pertinentium in quibusque diebus solemnibus duas partes minutarum decimarum sue parochie quas abbas et monachi Sancti Benedicti solebant percipere necnon et medietatem decime vini totius parochie sue quam antea totaliter consueverant percipere abbas et monachi supradicti tam idem presbiter de Bogiaco quam ejus successores presbiteri recipiant in perpetuum et possideant de vinea autem ad presbiterium ipsius ecclesie pertinente que sita est in censiva Sancti Benedicti non solvet decimam presbiter supradictus vel ipsius successores et prefatus abbas ea que debentur pro synodali consuetudine pro ecclesia de Bogiaco solvere tenebitur annuatim Hec autem que superius sunt expressa salvis proventibus et reditibus aliis quos predictus presbyter de Bogiaco nomine ecclesie sue possidebat presbytero ejusdem ecclesie autoritate concilii ordinavimus et statuimus in perpetuum adherere Quod ut ratum et notum permaneat presentes litteras fieri fecimus et sigilli nostri munimine roborari Actum anno Domini millesimo ducentesimo vicesimo mense junio