Charter Document - 05400341
| Charter Number: | 05400341 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Recognition |
| Date: | 1217 |
| Date type: | Internal, A.D., Episcopal |
| Resource Link(s): |
|
Charter:
Universis presentes litteras inspecturis magister Joannes de Osannes vices gerens officialis curie Bituricensis salutem in Domino Noveritis quod constituti in presentia nostra Stephanus de Fiscali et Joannes Alenardi capellani et Milo canonicus de Duno qui [sunt] eleemosynarii Hymberge relicte Simonis Fabri ut Simon clericus filius ejusdem Hymberge canonicus de Duno recognovit coram nobis et dictus Simon recognoverunt quod dicta Hymberga dedit et concessit per manus ipsorum ad quandam vicariam constituendam pro remedio anime sue in ecclesia Sancti Petri de Castronovo quidquid habebat in decima de Villa Nova quam Simon maritus suus et dicta Hymberga emerunt a Villelmo de Sauzai milite ut dicitur et quidquid habebat in decima Castrinovi tam in blado quam in vino et minutis decimis et censum bladi quod habebat in territorio Castri Claudi ita quod Everardus nepos dicte Hymberge vicariam jam dictam habebit quandiu vixerit ita quod dictus Symon clericus filius dicte Hymberge habebit dictum [censum] quoad usque ad legitimam etatem pervenerit et fructus dicte vicarie percipiet Post mortem vero dicti Evrardi dicta vicaria remanebit ad ecclesiam Beati Petri ita quod prior dicte ecclesie quemdam monachum constituet ad celebrandum pro anima domine Hymberge ad altare beati Nicolai Dedit etiam in die anniversarii sui quinque solidos currentis monete ad pitanciam priori et monachis dicte ecclesie in perpetuum in censu suo de Buserello Dictus vero Simon eleemosynam istam concessit et laudavit et dicte ecclesie promisit exequi fide data prout superius est dictum anno Domini MCCXVII mense octobri pontificatus domini Raymundi Bituricensis archiepiscopi anno IX