Charter Document - 05400331
| Charter Number: | 05400331 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1215 |
| Date type: | Internal, A.D. |
| Resource Link(s): |
|
Charter:
Omnibus Christi fidelibus ad quos presens scriptum pervenerit salutem Prior humilis omnisque conventus de Regula salutem in salutis autore Ut verum veterana tradit autoritas quod si quid memoriale agitur scripti memorie commendetur Hinc est quod universitati vestre notum facimus quod frater Petrus Dalans monachus noster de consensu et voluntate totius nostri capituli super decimam quam emerat a Guillelmo de Villa lata instituit capitulo venerabili Sancti Benedicti Floriacensis marcham argenti unam annuatim persolvendam que debet ad refectionem fratrum dispensari dum in ejus memoriam annuum anniversarium celebrabunt quod illi communi et caritativo affectu pro remedio anime sue atque parentum suorum in perpetuum agere concesserunt Sciendum etiam quod tota decima eleemosynarii de Regula erit in usus pauperum dispensanda et ipse ibidem instituet singulis annis quoscumque voluerit collectores et predictam marcham persolvet tempore quo prior ejusdem domus debitum censum memorato capitulo reddere consuerit Et ut hoc firmum et inviolabile permaneat presentem chartam sigilli nostri caractere decrevimus roborari Actum anno ab incarnatione Domini millesimo ducentesimo quinto decimo