Charter Document - 05400276
| Charter Number: | 05400276 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1197 |
| Date type: | Internal, A.D. |
| Resource Link(s): |
|
Charter:
Garnerius Dei gratia humilis abbas Sancti Benedicti Floriacensis et totus ejusdem ecclesie conventus omnibus ad quos littere iste pervenient in Domino salutem Ut in nostris gesta temporibus robur perpetue stabilitatis obtineant et memoriam nasciture posteritatis attingant consilio maturiore provisum est res gestas sollempniter sigillatis apicibus perhennire Ea propter ad universitatis vestre notitiam volumus pervenire quod cum eleemosinam Sancte Crucis de possessionibus suis quas apud villam nostram que Floriacum dicitur tenet nos et priores nostri de Sancto Gervasio traheremus in causam et eadem questio morosius disceptata diutius perdurasset tandem venerabilis viri domini H Aurelianensis episcopi mediante consilio que propter hoc nobis preces satis affectuosas porrexit concessimus ut eleemosinaria domus quidquid apud Floriacum tempore hujus transactionis et pacis censualiter habebat in tranquillitate et pacis hujus integritate detineat et decem solidos omni anno in festo sancti Andree pro decimis quibus libet mortulorum et omni alia consuetudine vel exactione priori nostro de Sancto Gervasio solvat et simili modo ad eumdem terminum duodecim denarios pro censu quibus ab eleemosina persolutis nos vel priores nostri salva tamen justitia nostra exceptis de fratribus et conversis predicte domus nihil unquam poterimus a domo predicta requirere Concessimus insuper ut arpentum situm juxta terram Rainaldi de Pratis censualiter pacifice teneant quatuor denarios annuatim pro arpento illo persolventes necnon in terris arabilibus decimas percipiemus annuatim Quod ne oblivione vel malignitate mutetur scripti et sigillorum nostrorum patrocinio necessarium duximus confirmare Actum anno gratie MCXCVII