Charter Document - 05400259
| Charter Number: | 05400259 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1186 |
| Date type: | Internal, A.D. |
| Resource Link(s): |
|
Charter:
Henricus Dei gratia Aurelianensis electus omnibus in perpetuum Cum in capella Sancti Leobini que in cimeterio castri Evere fuerat ab ipsius castri gente fundata sine voluntate abbatis et fratrum Sancti Benedicti Floriacensis divina celebrari non possint tandem ad preces quorumdam burgensium et fratris Joannis Macharii necnon et dilecti nostri in Christo magistri Joannis de Lorriaco dilectus noster Garnerius abbas suo consentiente capitulo cum predicto magistro qui parochialem prefati castri ecclesiam canonice noscitur possidere super predicta capella sub hoc pacis tenore transegit Quod prior Evere quicunque fuerit et rector parochialis ecclesie omnes redditus predicte ecclesie quocunque modo proveniant tam pro vivis quam pro defunctis per medium partientur Sciendum preterea quod parochialis B Gudualdi ecclesia jure suo et dignitate pristina non privabitur sed deffuncti ad eamdem ecclesiam deferentur et ibi primo pro eis unice misse sacrificium Domino offeretur Annuales etiam confessiones sponsalia quoque et purificationes et alia ad parochialem usum spectantia ibidem more solito celebrabuntur Quod ne memoriam humanam effugiat aut aliqua malignitate inposterum valeat immutari presenti scripto firmare sigilli nostri voluimus autoritate validare Hoc etiam dominus Bucardus archidiaconus concessit et sigilli sui munimine approbavit anno incarnati Verbi MCLXXXVI