Charter Document - 05400239
| Charter Number: | 05400239 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1183 |
| Date type: | Assigned |
| Resource Link(s): |
|
Charter:
Venerabili domino et in Christo plurimum reverendo R gratia Dei Carnotensi electo Johannes sancti Faronis Meldensis abbas humilis salutem et promptum sincere devotionis obsequium Attendentes qualiter ad incrementa ecclesiarum et sancte religionis favorem tota generis vestri nobilitas a progenie in progenies semper extitit studiosa ecclesiam beati Benedicti super Ligerim in suo jure celsitudini vestre duximus securius commendare Audivimus sane quod inter vos et predictam ecclesiam super presentatione ecclesie de Sumcampo querela versatur ut igitur purum testimonium pure perhibeamus veritati quod ab avunculo nostro domino G canonico vestro audivimus vobis fideliter attestamur Didicimus itaque ab eo quod cum esset puer in domo Henrici prepositi vacante ecclesia de Sumcampo et prepositus et ipse per litteras rogavit dominum M predecessorem abbatis beati Benedicti qui nunc est ut ecclesiam illam Manerio clerico eorum interventu conferret et ad eorum preces eidem clerico est collata Nos quoque audivimus Manerium sepius cognoscentem quod per ecclesiam beati Benedicti et de manu domini Macharii abbatis suam fuerat ecclesiam assecutus et nobis propter hoc sepius exhibuit obsequium et honorem Dicit etiam dominus G avunculus noster quod Manerius ei gratias retulit quia suam per eum ecclesiam habebat Ut ergo honori vestro cui divina dignatio benignius aspirat salubriter consulatis rogamus et fideliter consulentes humiliter exhortamur quatenus ecclesiam beati Benedicti in sua justitia respicere velitis clementius et fovere Valete Crescat utinam in dies honor vester