Charter Document - 05400222

Ego Manasses Dei gratia Aurelianensis episcopus omnibus qui presens scriptum viderint vel audierint salutem in Domino Cum circa statum ecclesie beati Benedicti Floriacensis et circa ejus negotia pro posse nostro promovenda promptiores et efficaciores ceteris predecessoribus nostris inveniremur et cum ecclesia beati Benedicti ut dedicationes et altarium suorum benedictiones celebraremus et fratres ejusdem ecclesie in ordines promoveremus sepius nos vocavit dubitavimus ne amor qui inter ecclesiam beati Benedicti et nos mutuus vertebatur in dampnum ejusdem ecclesie redundaret inde est quia revolutis Romanorum pontificum et predecessorum nostrorum privilegiis libertatem ejusdem ecclesie attendentes propensius et eamdem nostris et futuris temporibus inconvulsam et illibatam conservare volentes eam scripto commendare et in posteros dignum duximus solo caritatis intuitu transmittendam Universitati igitur vestre innotescat quia neque nos neque successores nostri neque Aurelianensis ecclesie decani archidiaconi vel archipresbyteri aut quelibet ejusdem ecclesie alie persone ad idem monasterium venire aut aliquam ordinationem vel missas publicas celebrare aut procurationes aliquas seu aliquid consuetudinis ab abbate vel fratribus ibidem manentibus de jure possunt exigere quod etiam predecessorum nostrorum aut ecclesie nostre quelibet inferiores persone nullus percepisse noscuntur et ut in brevi omnia concludantur idem locus tanta prefulget libertate ut nec nobis nec successoribus nostris seu prelibatis personis in aliquo teneatur obnoxius Preterea cum episcopatum Aurelianensem per triginta annos aut eo amplius tenuerimus et ante episcopatum in eadem ecclesia viginti annis commorati fuerimus cognovimus quia neque nos neque decani neque archidiaconi aut quelibet ecclesie nostre persone in prioratibus ecclesie beati Benedicti aliquam procurationem de consuetudine possunt exigere Quod ut ratum et inconcussum perseveret sigilli nostri autoritate roboravimus statuentes quod si quis huic nostre confirmationi in aliquo contraire presumpserit ex parte Dei omnipotentis et beati Benedicti patris et nostra sit anathema Datum Aurelianis in palatio nostro per manum Roberti notarii nostri anno incarnati Verbi millesimo centesimo octogesimo astantibus in ecclesia Sancte Crucis majoribus personis Hugone decano Andrea cantore Letoldo subdecano Manasse capicerio cancellario nullo