Charter Document - 05400197
| Charter Number: | 05400197 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Revocation |
| Date: | 1171 |
| Date type: | Internal, A.D. |
| Resource Link(s): |
|
Charter:
Willelmus Dei gratia Senonensis archiepiscopus et apostolice sedis legatus omnibus sancte matris ecclesie filiis tam futuris quam presentibus ad quos littere iste pervenerint in Domino salutem Que in controversiam deducuntur si quando per sententiam seu compositionem gratum sortiuntur finem scripto debent commendari ne alicujus tergiversatione possint inverti sive aliqua oblivione aboleri Hujus itaque considerationis intuitu universitati vestre notum fieri volumus quod contentio que inter nos et Arraudum abbatem et monasterium sancti Benedicti Floriacensis super ecclesia beate Marie Loriacensis vertebatur capituli ecclesie Senonensis grato concurrente assensu tali terminata est compositione De universis siquidem oblationibus et proventibus tam pro vivis quam pro defunctis sive intra jam dictam ecclesiam sive extra tam ex ecclesia quam pro ecclesia tam privatim quam publice quocunque modo percipiendis medietas nobis et ecclesie sancti Benedicti equaliter cedet aliam vero medietatem duo sacerdotes ibidem deservientes habebunt Verum sacerdotes tam presentes quam eorum successores necnon et eorum ministeriales de predictis portionibus nobis et memorato monasterio provenientibus tale nobis Senonis et abbati et monachis in capitulo sancti Benedicti in perpetuum juramentum prestabunt quod nullatenus nos vel ipsos monachos defraudabunt sed nec defraudari scienter permittent Preterea donationem alterius presbyterii quod nunc Henricus obtinet sine aliqua presentatione jure perpetuo obtinebimus presentatio vero Bullani et successorum ejus ad ecclesiam beati Benedicti spectabit In decimis annone prefati monachi quinque partes in perpetuum habebunt sextam vero partem sacerdotes obtinebunt in grangia monachorum quam habent Loriaci eam plenarie et absque aliqua difficultate percepturi in decimis vini necnon et aliis decimis que minute vocantur monachi medietatem habebunt sacerdotibus aliam medietatem consequentibus Donationem scholarum uno anno habebimus monachi vero alio anno eamdem habebunt quod equa vicissitudine processu temporum observabitur Adjicientes quod quocunque modo una pars aliquam susceperit ampliationem pars altera simili gaudebit incremento Actum est publice in palatio Senonensi anno incarnati Verbi MCLXXI presente venerabili fratre nostro Mattheo Trecensi episcopo et astantibus nobis personis ecclesie Senonensis Hilduino thesaurario Odone decano Gaufrido precentore Guidone archidiacono Gastinensi Hugone archidiacono Stampensi