Charter Document - 05391001

Anno dominice incarnationis DCCCCLXXVII indictione V In nomine sancte et individue Trinitatis ego Gumboldus episcopus et frater meus Willelmus Sancio dux Vasconum tacti divino amore super peccatorum nostrorum gravi recordatione pro remedio animarum nostrarum parentumque seu fidelium nostrorum et eorum qui nobis in opere deifico adjutores fautores et consultores extiterunt decrevimus quoddam monasterium nostri juris in honore sancti Petri principis apostolorum dicatum cum consilio fidelium nostrorum ad pristinum reducere statum Siquidem ex antiquo omnibus notum erat ibidem monastice institutionis observantiam floruisse et idcirco cum antiquitus idem locus dictus fuerit Squirs modernis temporibus dicitur Regula Quibus super tali deliberatione multimoda animi anxietate fluctuantibus per eam que in antiquis reperitur sapientiam compertum est ante Normannorum irruptionem et sui destructionem idem monasterium cenobio Floriacensi et dispositioni abbatis cenobii fuisse subditum sed quod et lugubri satis devastatione paganorum non solum utriusque monasterii septa verum etiam totius Gallie et Aquitanie nonnulla perierunt municipia Unde communi consilio propinquorum seu fidelium nostrorum quemdam clericum legationis nostre bajulum ad venerabilem abbatem Richardum fratresque Floriacenses cum omni supplicatione direximus precantes ut quos placeret de suis monachis transmitteret qui amissa reciperent destructa a fundamentis resarcirent et aliquod lucrum animarum ibidem acquirerent quippe bone odoriferam famam de eorum spirituali schola et singulari conversatione audieramus Donamus igitur donatumque perpetuum esse volumus cum hac testamenti autoritate monasterium nostrum vocabulo Squirs quod fundatum est in regno Vasconie in pago Alliardensi super ripam Garonne fluminis cum omnibus ad se pertinentibus hoc est ecclesiis villis mansis vineis silvis pratis pascuis molendinis aquis aquarumve decursibus et omnibus appendiciis totum ex integro quesitum et inexquisitum quidquid ad eundem locum pertinet tradimus atque transfundimus de jure nostro in jus et dominationem prefati monasterii Floriacensis ut ab hodierna die et deinceps quidquid exinde abbas et fratres ejusdem cenobii facere voluerint liberam in omnibus habeant potestatem sive placuerit abbatem constituere sive prepositum qui eisdem debeat de omnibus rationem reddere ita tamen ut non rex non dux non comes non episcopus nec quelibet submissa persona aliquid de terris vel reditibus ejusdem ecclesie audeat subtrahere aut invadere sed omnia sint in predicti abbatis potestate Si vero quod non credimus si nos ipsi aut aliquis de heredibus nostris aut successoribus vel aliqua predictorum honorum persona contra causare sive calumniare voluerit in primis quod repetit non evindicet sed insuper a sancto Petro cui Dominus ligandi et solvendi potestatem dedit in cujus honore isdem locus est dedicatus se damnatum et obligatum sciat perpetuo anathemate Et ut hec carta firma et inviolabilis permaneat non solum subter firmavimus et fideles nostros subterfirmare rogavimus sed etiam adhibitis sanctorum pignoribus omnes pariter juravimus cum obtestatione nominis Dei nos hec observaturos que presenti continentur testamento Hi sunt testes et hujus precepti confirmatores quorum vocabula solemni constitutione liquescunt descripta Signum Gumboldi episcopi qui hanc donationem devoti cordis instantia Deo redemptori concessit Signum Willelmi Vasconie ducis fratris ejusdem qui donum Deo traditum mire corroboravit Signum Guillelmi Garsie nepotis ipsorum Signum Rotgarii vicecomitis Signum Utzan Amaneii Signum Seguini vicecomitis Signum Areolidat vicecomitis Signum Arnoldi Amaneii