Charter Document - 05390149

Domno abbati Machario commodavimus thuribulum aureum ad inpignorandum tali duntaxat conditione ut usque ad anniversarias Pasche alterius octabas id est ut planius dicam ab octavis proximi Pasche anno transacto thesauro nostro incorruptum et integrum restituatur nec ulterius ejus restitutio differatur nisi forte tocius capituli nostri permissu et consensu Quod si quod absit aut furto subreptum fuerit aut alio aliquo perierit domnus abbas aliud ejusdem valentie ejusdem ponderis ejusdem facture vel equipollentis intra predictum terminum vel non longe post juxta capituli beneplacitum reformabit Ponderabitur igitur thuribulum presentibus fratribus quos conventus elegerit ut predicta paccio fideliter observetur Quod si abbas secus agere voluerit aut quod absit forte obierit juraverunt majores subnotati se de reditibus majoriarum suarum abbati nichil penitus reddituros sed ad libitum capituli et ad reformationem thuribuli omnia servaturos Alii etiam servientes et milites quos subnotabimus juraverunt se si que pretaxata sunt aliter et perperam gererentur conventum modis quibus possent in omnibus adjuturos Juraverunt ut diximus majores nostri Bernardus de Monasteriolo Osbertus de Curia et Arnulfus Tebaudus de Gelliaco Rotbertus de Tegiaco Milites Jocerannus major Godefredus buticularius miles de Camera Actum est hoc in capitulo presentibus nobis astantibus quoque militibus et servientibus nostris anno ab incarnatione Domini MCXLVI regnante Ludovico rege Francorum et duce Aquitanorum anno X regni ipsius