Charter Document - 05390115

In nomine sancte et individue Trinitatis amen Quoniam a patribus ratum habemus ut ea que memorie facta tradi volumus litteris commendare debeamus quo ad notitiam posterorum pervenire valeant veracius idcirco ego Adelardus Cimiensis castri dominus cum uxore mea Basilia filiisque meis ac filiabus simul etiam cum omnibus heredibus per presens scriptum notum fieri volo tam presentibus quam futuris omnibus quatenus venerabili Bosone cum quampluribus primi ac secundi ordinis probissimis viris interpellante abbate Floriacensis monasterii sancte Dei genitricis Marie et beati Benedicti monachorum legislatoris eximii quod situm est super fluvium Ligerim in pago Aurelianensi illicitam consuetudinem et pravam matre mea Havildi superstite Milonis Virivensis violenti ambitione contra jus institutam quam in venditione annone Auxonie sanctorum jamdictorum ville injuste tenebam ob animarum nostrarum remedium genitorumque aut predecessorum nostrorum Deo prefatisque sanctis remisi ac remitto in perpetuum Igitur monachus supradicte ville prepositus vel villicus suus pro voluntate libere et absolute modis omnibus ejusdem ville utatur annona quibus vult distribuat equorum porcorum pedum pecudumque omnium ex ea suum faciat nutrimentum cui etiam vel quando voluerit eam sine occasione absque ulla calumnia vel advocati vel alicujus heredis mei licite vendat excepto quod prius villico meo moletren non alias eam venalem offerat qui si eodem pretio quo quilibet alter eam comparare voluerit infra XV dies pretium omne persolvat quod si tempore XV dierum transacto pretium persolvere neglexerit jam deinceps cuilibet ut dictum est vendat licite Si quis igitur quod absit rei hujus unquam contradictor vel pacte hujus conventionis violator seu adversarius esse voluerit particeps pene existat in inferno Jude proditoris Ut autem ratum hoc scriptum permaneat et inconvulsum subterscriptorum testium annotatione nominum munivimus Signum Adelardi Sign Basilie uxoris ejus Sig Adelardi S Gileberti clerici S Rogeri S Godefridi filiorum eorum S Godefridi nepotis sui S Rohardi clerici Lobiensis S Macarii Cimiensis S Guillelmi Signum Gualdrici de Hauvez S Raineri de Hamineio S Evrardi prepositi S Theoderici de Dalleis Sig Radulphi de Lauduno S Werici de Valle Actum publice Rhemis in concilio Callixti II pape anno incarnati verbi MCXX episcopante Frederico comite Godefrido imperante Henrico