Charter Document - 05390105
| Charter Number: | 05390105 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1109 |
| Date type: | Internal, A.D., Regnal |
| Resource Link(s): |
|
Charter:
In nomine sancte et individue Trinitatis Ludovicus Dei gratia Francorum rex universis sancte Dei ecclesie cultoribus tam posteris quam et instantibus notum fieri volumus quia quandam ex familia nostra filiam Gisleberti majoris Matheiam nomine quam debito servitutis et ex dono maxime Bosonis Floriacensis abbatis possidebamus petitione prefati Gisleberti necnon et assensu Bosonis predicti abbatis cum benevolentia totius capituli sibi commissi excussis denariis regio more in presentia eorum libertati donavimus et ab omni respectu servitutis qua detenta fuerat perpetualiter immunem concessimus Quod ne alicujus usurpatoris calumpnia potuisset infirmari litterarum memorie voluimus commendari et nostri nominis caractere et sigillo signari precepimus et corroborari presentibus de capitulo et assensum prebentibus fratre Goisberto tunc temporis sancte Floriacensis ecclesie decano Lamberto preposito Andrea thesaurario Leterico beati Petri Geomensis priore Affuerunt quoque in testimonio veritatis de palatio nostro quorum nomina sub titulata sunt et signa Signum Anselli tunc temporis dapiferi nostri Signum Hugonis constabularii nostri Signum Widonis Silvanectensis buticularii nostri Signum Widonis camerarii nostri Actum publice in capitulo sancti Benedicti anno incarnationis dominice millesimo centesimo nono consecrationis nostre primo Stephanus cancellarius relegendo subscripsit