Charter Document - 05390102
| Charter Number: | 05390102 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1108 - 1118 |
| Date type: | Assigned |
| Resource Link(s): |
|
Charter:
In Christi nomine Ego Lugdovicus Dei gratia rex Francorum notum fieri volo tam futuris quam presentibus quoniam cum abbate sancti Benedicti Floriacensis monasterii quoddam placitum fecimus pro quibusdam hominibus et mulieribus quos ut nobis relatum est beate Marie Carnotensis servos reclamabamus et putabamus Verum dum die constitute ad causam super hoc venissemus deficientibus probatoribus et testibus eos ad opus beate Marie prout antea nostre regie majestati intimatum fuerat adquirere nullatenus potuimus immo ipse abbas et monachi sancti Benedicti servos esse legitime approbarunt Nos igitur justitie et rectitudini obviare nolentes jus ecclesie Floriacensis recognovimus et exinde advocatos et defensores ejusdem ecclesie super hoc nos esse promisimus Verum ut hoc ratum et firmum permaneat in sempiternum presentem cartam sigilli nostri impressione signatam et nominis nostri caractere corroboratam fieri disposuimus Hec autem sunt nomina eorum pro quibus placitavimus [] Huic etiam placito interfuerunt Stephanus cancellarius Ansellus dapifer Guilelmus de Garlanda Herluinus Bartholomeus Hugo de Vico novo Hugo de Monte Barresio et inde sunt testes