Charter Document - 05390094
| Charter Number: | 05390094 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Concession |
| Date: | 1088 |
| Date type: | Internal, A.D., Regnal |
| Resource Link(s): |
|
Charter:
In Nomine Sancte et Individue Trinitatis Ego Robertus Dei gratia Lingonensium episcopus notum volo fieri omnibus sancte Dei ecclesie fidelibus qualiter monachi Floriacensis cenobii in honore sancte Marie constructi ubi beatus Benedictus corpore requiescit nostram humiliter clementiam deprecantes quatinus respectu divine misericordie ecclesiam Donnemonie a nostra pietate sibi dari inpetrarent Quorum racionabilibus precibus adquiescentes concedimus eis nostre auctoritatis scripto consensu et laude nostrorum canonicorum scilicet Lingonensis ecclesie atque ceterorum fidelium predictam ecclesiam Donnemonie perpetuo possidendam et aliam eis ecclesiam confirmamus videlicet Vesambliensis ville in honore sancti Cirici consecratam eo tenore ut annis singulis sinodum et paratas statutis reddant temporibus et uno quoque anno duos sextarios olei ad altare sancte Marie quod est in turre Lingonensis ecclesie in kalendis martii persolvere non neglegant Si vero uno anno vel sterilitate vel neglegentia persolvere distulerint in alio restituant quod si reddere neglexerint in jus nostrum et successorum nostrorum predicte ecclesie redeant Ut autem firmiorem hec nostra concessio obtineat vigorem hanc cartam inde fieri jussimus quam manu propria firmando manibus canonicorum nostrorum ecclesie Lingonensis seu aliorum fidelium confirmandam tradidimus S Amalrici decani S Lanberti archidiaconi S Girardi archidiaconi S Hugonis archidiaconi S Norgaudi archidiaconi S Warnerii archidiaconi S Girardi decani S Widrici decani S Theoderici decani S Gilleberti decani Acta sunt hec Lingonis anno ab incarnatione Domini millesimo [octogesimo] octavo regnante Philippo rege anno XXX indictione XI Stephano cancellario