Charter Document - 05390093

Oderisius Dei gratia cardinalis et abbas cum omnibus fratribus Cassinensis congregationis sancto et venerabili abbati illustri omnique ordini vel congregationi Floriacensis cenobii beatam vitam et Hierusalem celestem Venient ait Salvator ab oriente et occidente et recumbent cum Abraham Isaac et Jacob in regno celorum Necesse itaque et dignum est ut qui ad illam pervenire societatem plenam eterne charitatis et insatiabilis dulcedinis enituntur in presentis vite transitu mutue dilectionis colligati vinculo teneantur Si enim ex temporali cohabitatione magna quedam et sincera coalescit affectio quanto magis qui in eternum coheredes et concives futuri sunt eorum debet adhuc mortalium mentibus abundare dilectio denique cum sancta et universalis ecclesia pro sola spe sue fidei tanta necessitate ad fraternam exercendam charitatem constringitur necesse est ut quorum non solum fides sed et ordo viteque professio una est monachorum charitas precellere videatur Quanto enim viciniores esse divinitati ordinis sublimitate cernuntur tanto magis etiam in se debent preferre puritatis benignitatis et simplicitatis exemplum Quapropter nos ex magna devotione et sincera charitate decrevimus familiariter scribere sanctitati vestre ut vestrum et nostrum quasi unum sit monasterium et quodam spirituali atque inviolabili amore in perpetuum fede remur si quidem certa etiam et digna ratio est ut nostre et vestre fraternitatis conventus alterutrum sese pre ceteris diligant qui pari gaudio habere se incomparabilem thesaurum reliquiarum patris Benedicti exultant licet a nobis haberi multis miraculis et prodigiis ac revelationibus et quorumdam etiam nostrum oculis sit veritas comprobata verum sive illud habere vos quelibet occasio fecerit sive quid illius habere gratulanter speratis singularis utrique invicem nobis et precipui debitores sumus amoris Igitur nos sinceram vobis amicitiam societatemque promittimus et ut vos etiam amici nostri et socii existatis devotissime et humiliter flagitantes expetimus ita ut si ab aliquo fratrum nostrorum ad vestrum aut vestrorum aliquis ad nostrum monasterium ventum in evenerit confidenter quasi proprie suum adveniat omnemque charitatem illic et solatium necessitatis inveniat atque honorifice quamdiu voluerit ibidem commorari habeatur licentia siquidem et nomina omnium viventium nostrum ad presens vobis scripta per Walterium vestre sancte congregationis venerabilem fratrem direximus atque vestra nobis invicem dirigenda nomina desiderabiliter expectamus ut nostra inter vestra et vestra inter nostra nomina conscribantur quatenus et viventes et defuncti alterius intervenientibus meritis et orationibus a Domino protegamur