Charter Document - 05390085
| Charter Number: | 05390085 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1077 |
| Date type: | Internal, A.D., Regnal |
| Resource Link(s): |
|
Charter:
In nomine sancte Trinitatis Philippus Dei gratia Francorum rex Sicut est regie celsitudinis ac majestatis statum regni emendare moribus legibus exornare ita etiam et eo studiosius ecclesiasticis negotiis et personis in ecclesiis Deo militantibus regali diligentia caritatis sollicitudinem debemus adhibere ipsi namque pro statu regni nostri sine intermissione Deum exorant eundemque pro nostris excessibus offensum nobis repropitiando conciliant Unde notum fieri volumus cunctis fidelibus sancte matris ecclesie tam presentibus quam futuris Pontium de Glena ecclesiam sancti Symphoriani in Eduensi suburbio sitam ejusdem beatissimi Symphoriani martyris presentia corporis ac spiritus sublimatam fultamque patrocinio in qua ordo monachalis beato Germano ejusdem loci fratre ac monacho postmodum vero Parisiorum episcopo antiquitus floruerat adnullatam deinceps peccatis nostris facientibus nunc vero Deo propitiante ad formam et honorem ejusdem ordinis revocatam per auctoritatem sedis Romane presulis videlicet domni Gregorii faciente idipsum et laudante duce Burgundionum domno Hugone concedente etiam et approbante ejusdem Edue civitatis episcopo Aganone per assensum Adelidis uxoris supradicti Pontii et eorum filiorum sancte Dei genitrici sanctoque Benedicto Floriacensi contulisse Hanc autem ecclesiam liberam faciunt et clamant supranominati advocato tamen ejusdem loci Pontio remanente et ut nos ipsam donationem laudemus et auctoritate nostra firmemus expostulant Quorum petitioni annuendo ecclesiam illam sancti Symphoriani sicut supradictum est sancte Dei genitrici sanctoque Benedicto Floriacensi solutam et quietam amodo in posterum concedimus Et ut donatio ista et concessio nostra firma et inconvulsa permaneat memoriale istud inde fieri precepimus et nostri nominis caractere et sigillo nostro adstipulatione etiam nostre manus in presentia archiepiscoporum et episcoporum nostrorum et optimatum palatii nostri quorum nomina subtitulata sunt corroborando signamus et signando corroboramus Signum Philippi regis Francorum S Berthe regine S Manasse archipresulis Remensis S Richerii archipresulis Senonensis S Richardi archipresulis Bituricensis S Aganonis Eduensis episcopi S Rainerii episcopi Aurelianensis S Roderii episcopi Cabilonensis S Widonis episcopi Belvacensis S Landrici episcopi Matisconensis S Rabodi episcopi Noviomensis S Tetbodi episcopi Suessionensis S Hugonis episcopi Nivernensis S Frederici dapiferi S Hugonis constabularii S Gualeranni camerarii S Hervei magistri pincernarum S Widonis comitis Pictaviensis S Stephani comitis Campanensis S Willelmi Nivernensium comitis S filii ejus Rainaldi S Odo dux Burgundie Actum publice Aurelianis in palatio nostro celebrato regali concilio anno incarnati Verbi MLXXVII anno regni nostri XVIII Gosfridus Parisiorum episcopus regis cancellarius relegendo laudavi