Charter Document - 05390083

Alexander episcopus servus servorum Dei Guilielmo venerabili abbati Floriacensis monasterii ubi venerabile corpus beati Benedicti requiescit ejusque successoribus regulariter intrantibus in perpetuum Si in apostolica sede presidenti hec sollicitudo et cura singularis incumbit ut ex ipsa consideratione regiminis omnibus ecclesiis et venerabilibus locis tam in temporali defensione et corroboratione diligentiam quam in spirituali speculatione et doctrina quantum Deo auxiliante prevalet vigilantiam adhibere debeat valde congruit ut earum provectui et utilitatibus que sub tutela sancte Romane ecclesie specialiter constitute sunt tanto propensioris cure studium impertiatur quanto et generalis providentie corpus cum ceteris et singularem apostolici privilegii lineam pre ceteris sortiuntur Nos itaque in apostolatus administratione non nostris meritis sed divina locati gratia petitionibus tuis karissime fili et frater in Xristo Guillelme cum omni caritatem et benivolentia consentientes venerabili loco cui preesse dinosceris tibi quoque tuisque successoribus nostre apostolice defensionis et confirmationis privilegium predecessorum nostrorum statuta servantes inpendimus statuentes et apostolica auctoritate corroborantes ut ipsum monasterium et possessiones ejus res tam mobiles quam immobiles seu cujuscunque modi bona sint que nunc ibidem juste sunt collata vel in posterum Deo annuente a fidelibus conferenda sine omni inquietudine sub tua tuorumque successorum gubernatione firma et inconvulsa permaneant ut nulla potestas secularis ecclesiastica seu aliqua persona magna vel parva idem monasterium vel ejus pertinentias invadere vel comminuere aut in quoquam molestare audeat nec subjectas illuc personas sine voluntate abbatis distringere vel quicquid fiscus exigit aliquo modo preripere presumat Addimus etiam ut quia venerabilis pater Benedictus monachorum legislator ex divina gratia dux est monastice religionis sit etiam qui eidem monasterio prefuerit primus inter abbates Gallie nec aliquis de ordine sacerdotali archiepiscopus scilicet aut episcopus aut inferioris ordinis eum inquietare nec contra voluntatem ipsius ad idem monasterium venire aut aliquam ordinationem facere vel missas celebrare presumat ut omni tempore quieti et securi absque omni molestia vel controversia monachi in eodem monasteriu Deo deservire possint Abbas vero qui ordinandus ibi est cum electione fratrum propter vite meritum et honestatem morum et non propter turpia lucra seu per pecuniam eligatur et absque ulla calumnia a quocunque episcopo prout sibi placuerit benedicatur De sacerdotibus vero aut diaconibus ordinandis id observetur quod in regula precipitur [ne] saltem [aliquis] episcopus subjectionem ab eis requirat quos ordinaverit nec unquam officio dignos ordinare differat Denique si cont[igerit ut abbas] accusetur de criminalibus causis non unius episcopi judicio determinetur sententia sed provincialis concilii expectetur censura aut si forte maluerit appellare sedem apostolicam res ad romani pontificis differatur audientiam et quotienscunque necessitas [urgebit] eum venire Romam modis omnibus liceat Solvendi et ligandi eam potestatem habeas quam antecessores tui per romana privilegia se probantur habuisse quod si peccatis habitatorum terre exigentibus excommunicationis anathema ad eos pervenerit id privilegium eidem monasterio indulsimus ut fratres ejusdem congregationis exclusis aliis omnibus ipsi absolute divinum officium peragant Visum quoque nobis est ut hanc licentiam eidem tribuamus quatinus fratres qui in quibusdam cenobiis degunt quod vivere regulariter nequeant si voluerint studio meliorande vite ad ipsum ducem monachorum confugere permittatur eis tandiu in ipso cenobio degere si contenti fuerint ut monastica consuetudine quousque in suis monasteriis videatur ordo redire Permittimus etiam ut si alicujus de ipsis fratribus onerosa conversatio fuerit ipse potius cum suo detrimento discedat quam alios inquinet Hec igitur omnia que hujus precepti decretique nostri pagina continet tam eidem abbati quam cunctis qui in eo quo est ordinem locoque successerint in perpetuum servanda decernimus Si quis vero regum sacerdotum atque quarumlibet personarum hanc constitutionis nostre paginam agnoscens contra eam venire temptaverit vel de ecclesia sancte [Marie] cum omnibus appendiciis pertinentibus ad ipsam ecclesiam que est in castro sancti Bricii quam Robertus dominus ipsius castri ipsi monasterio contulit potestatis honorisque sui dignitate careat reumque se divino judicio existere de perpetrata iniquitate cognoscat et nisi illa que ab illo sunt male ablata restituerit et digna satisfactione acta emendaverit sub anathematis interdictione fiat atque in eterno examine districte ultioni subjaceat Cunctis autem eidem loco justa servantibus sit pax Domini nostri Jhesu Xristi quatinus et hic fructum bone actionis recipiant et apud districtum judicem premia eterne pacis inveniant Bene Valete Datum Luce VIII idus novembris per manus Petri sancte romane ecclesie presbyter cardinalis anno XII pontificatus domni Alexandri pape indicione X