Charter Document - 05390073
| Charter Number: | 05390073 |
|---|---|
| Cartulary Title: | Recueil des chartes de l'abbaye de Saint-Benoît-sur-Loire |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1005 - 1014 |
| Date type: | Assigned |
| Resource Link(s): |
|
Charter:
Christi domini vocem ipsius servorum minimus ego Durandus pavescens dicentis qui non bajulat crucem suam et sequitur me non est me dignus et iterum non potestis Deo servire et mammone et qui reliquerit domum aut uxorem aut filios aut agros propter nomen meum centuplum accipiet et vitam eternam possidebit Credulus ejus promissionibus hujus mundi delectamenta pro suo contemnens amore cenobium ejus dilecti Benedicti expetii positum super amnem Ligericum Floriacum vocitatum reverendum patrem poscens Gauzlinum habitu monachili vestiri exoptans ad patris Benedicti imperia Christo domino ipsique famulari Qui optata adipiscens obtuli eidem loco pro mee remedio anime quicquid ex paterno vel materno jure possederam seu quicquid emeram in pago scilicet Cabillonense in parrochia sancti Michaelis in villa que dicitur Bulduria unum mansum cum vineis pratis silvis et aquis et uno farinario in aqua que dicitur Bruinada clausum quoque unum in Monte Sironis ad quercum vocatum cujus partem quamdam a piro magno ad meridiem mediam Gunterio archipresbitero et ejus fratri mutuaveram pro alodo quodam in Bainarias ea ratione ut si predictum alodum repeterent quod mutuo acceperant redderent Terminatur autem ipse clausus duabus partibus terra Seguinia et Bernardi sui fratris tertia sancti Michaelis quarta via publica In Poliaco autem villa unum mansum cum vineis et campis Quorum omnium tertiam partem uxori mee reliqui Alexandre eo tenore ut post suum obitum predicto loco cuncta subiciantur cum reditibus et consuetudinibus omnium rerum sub hujusmodi voto ut quicumque aliquid horum que dicta sunt repetere aut infringere temptaverit cum Juda proditore Anna et Caipha damnationem accipiat cum diabolo et angelis ejus in ignem eternum eique cui litem intulerit sociante fisco auri libras X persolvat et sua omnimodis frustretur repetitio Hec vero cartula ut firmior sit cum stipulatione subnixa et testibus subscriptis eam subterfirmavi Actum Floriaco tempore Rotberti regis et Gauzlini abbatis Durandi S Alexandra Deodatus presbiter SS Isembardi