Charter Document - 05390070

[In nomine] sancte et individue Trinitatis Hugo gratia Dei Francorum rex Mos et consuetudo regum predecessorum nostrorum semper extitit ut ecclesias [Dei sub]limarent et justis petitionibus servorum Dei clementer faverent et oppressiones eorum benigne sublevarent ut Deum propitium haberent cujus amore id fecissent Hujus rei gratia auditis clamoribus venerabilis Abbonis abbatis monasterii sancte Marie sancti Petri et sancti Benedicti Floriacensis et monachorum sub eo degentium nostram presentiam adeuntium pro malis consuetudinibus et assiduis rapinis quas Arnulfus de castro Evere nomine advoc[atia] et vicaria accipiebat in potestatem ipsorum vocabulo Everam quod antea nullus unquam fecerat misi filium meum Rotbertum regem ad ipsam ut eam sub defensione et munitione nostra revocaret ut nullus suorum vel servus vel liber in ea aliquid presumeret tollere quod et ipse haut segniter executus est Interea orta contentione Odonis comitis adversus me inter ceteros necessarios et fideles nostros quos in apparatu nostro commonuimus etiam Arnulfum episcopum Aurelianensem in adjutorium nostrum premonuimus qua de causa petiit ut predicto Arnulfo nepoti suo redderemus consuetudines sicut prius ipse licet violenter tenuerat quem offendere pro suo servitio nolens evocans predictum abbatem rogavi ut XXX modios vini in vindemiis solveret de ipsa potestate ipsi Arnulfo quamdiu viveret episcopus avunculus ejus pro salvamento nostro ea ratione ut nullus suorum servus vel liber inibi amplius exquireret post mortem vero ejus nec ipse Arnulfus nec aliquis successorum suorum vel hoc ipsum vel aliud aliquid in ipsa potestate requirere audeat aut in ea ingredi aut tollere ulterius quicquam presumat Ob rei ergo firmitatem et notitiam hoc inmunitatis nostre preceptum pro ipsa causa predicto loco feci et manu propria subterfirmavi et filio meo Rotberto regi firmare feci et anuli mei inpressione signavi ut nulla unquam ulterius persona episcopus abbas dux comes vicecomes vicarius thelonearius vel quilibet publicus exactor pro aliqua re exigenda nostris et futuris temporibus in ea ingredi valeat vel aliquid exigere presumat sed liceat abbati et congregationi predicti loci sub inmunitatis nostre defensione ipsam possessionem quieto ordine possidere et sicut cetere res predicti loci per precepta antecessorum nostrorum regum Francorum munite et defense perseverant ita et hec presenti auctoritate precepti nostri munita et inrevocata permaneat pro anime mee et filii mei elemosina et stabilitate imperii nostri perpetua Actum Parisius civitate publice anno dominice incarnationis DCCCCXCIII indictione VI anno VII regnante gloriosissimo rege Hugone et inclito filio ejus Rotberto Signum gloriosissimi Hugonis regis [Si]gnum Rotberti incliti regis