Charter Document - 05390015

In nomine Domini Dei et salvatoris nostri Jhesu Christi Hludowicus divina ordinante providentia imperator augustus omnibus episcopis abbatibus ducibus comitibus vicariis centenariis telonariis actionariis vel omnibus rem publicam administrantibus seu ceteris fidelibus sancte Dei ecclesie et nostris tam presentibus quam futuris notum sit quia venerabilis vir Adalgaudus abba ex monasterio Floriacensi quod est constructum in pago Aurelianensi super fluvium Ligeris in honore videlicet sancti Petri principis apostolorum et sancti Benedicti confessoris ubi ipse sanctus Benedictus corpore requiescit detulit nobis auctoritatem preceptionis domni genitoris nostri bone memorie Caroli piissimi augusti in qua continebatur quod avus noster Pippinus quondam rex seu idem genitor noster concessissent eidem monasterio teloneum de quatuor navibus que per Ligeris flumen seu cetera flumina propter sal et cetera commercia discurrebant necnon et de carris et de sagmariis necessaria ipsius monasterii vel congregationis ibidem Deo famulantis deferentibus et de villis vel de omnibus undecunque fiscus teloneum exigere poterat Pro firmitatis namque studio postulavit nobis prefatus abba ut paternum seu predecessorum nostrorum morem sequentes hujuscemodi auctoritatis nostre beneficium eidem concederemus vel confirmaremus monasterio Cujus precibus nobis ob amorem Dei et venerationem sancti Benedicti annuere et hoc preceptum munificentie nostre firmitatis gratia circa ipsum monasterium fieri libuit per quod jubemus atque precipimus ut nullus fidelium nostrorum nec quilibet exactor judiciarie potestatis de carris vel de sagmariis seu villis ipsius monasterii vel de quolibet commercio undecunque videlicet fiscus teloneum exigere potest ullum teloneum accipere vel exigere presumat naves vero quatuor que sive per flumen Ligeris sive per cetera flumina infra ditionem imperii nostri ob utilitatem et necessitatem ipsius monasterii discurrunt ad quascunque civitates castella aut portus vel cetera loca accessum habuerint nullus ex eis aut hominibus qui eas provident ullum teloneum aut ripaticum aut pontaticum aut portaticum aut salutaticum aut cespitaticum aut cenaticum aut pastionem aut laudaticum aut branaticum aut pulveraticum aut ullum occursum vel ullum censum aut ullam redibitionem accipere vel exigere audeat sed licitum sit absque alicujus inlicita contrarietate vel detentione per hanc nostram auctoritatem naves et homines qui eas providere debent cum his que deferunt per universum imperium nostrum libere atque secure ire et redire et si aliquas moras in quolibet loco fecerint aut aliquid mercati fuerint aut vendiderint nichil ab eis prorsus ut dictum est exigatur Hec vero auctoritas ut pleniorem in Dei nomine obtineat vigorem et a fidelibus nostris certius credatur et diligentius conservetur eam manu propria subter firmavimus et anuli nostri impressione sigillari jussimus Signum Hludowici serenissimi imperatoris Durandus diaconus ad vicem Helisachar recognovit Data VI kalendas augusti anno Christo propitio V imperii domni Hludowici piissimi augusti indictione XI Actum Aurelianis civitate in Dei nomine feliciter amen