Charter Document - 05360048

En nom de nostre signeur amen L'an de l'incarnation d'icelli courant mil troicens quatrevins et vng le dixhuitime jour du mois de juillet nous Eude signeur de Grancey cheualier faisons sauoir atous ceulx qui verront et orront ces presentes lettres que comme debas fust meuz ou esperez a mouoir entre reuerent pere en Dieu frere Jehan de Marigny docteur en decrex abbe du monastere de Saint Estiene de Diion de l'ordre Saint Augustin ou diocese de Langres et le couuent d'icelli monastere et aussi frere Robert de Chaignay chanoine dudit monastere et maistre de l'ospital de Nostre Dame de Diion appartenant a ycelli monastere et messire Philippe de Vaiurotes prestre cure de Gemeaulx et de Pichanges d'une part et nous le dit signeur de Grancey d'autre part de et sur ce que les diz religieux comme vraiz patroniers et le dit messire Philippe comme vraiz curez ou vicaire perpetuel de la dite cure disoient et maintenoient au proffit dudit hospital et de la dite cure que de droit commun et de silong et encien temps qu'il n'estoit memoire du contraire leur appartenoit et auoient este et encoir estoient en bonne possession et saisine de leuer et perceuoir chascun an par tout le finaige de Pichanges la moitie du gros disme des terres franches c'est assauoir ou l'on a acoustume pranre de treze gerbes vne et la quarte partie du gros disme des terres serues c'est assauoir ou l'on a acoustume pranre de sept gerbes vne et aussi la moitie du gros disme de tous les mex qui ont testes ferans sur la dite ville de Pichanges soient vignes ou terres et que en ycelle possession les auoit troublez feu noble et puissant seigneur monseigneur Eude jadiz signeur de Grancey nostre pere cui Dieux prodouit Et nous encoir les y troublions a tort et senz cause raisonnable si comme il disoient nous le dit signeur de Grancey disans et maintenens au contraire par plusieurs moiens mesmement pour ce que par l'espace de trente six ans et plus feu notre dit pere que dieux absoille auoit este et encoir estoit par le temps de son trespas et nous mesmes depuis ycelli trespas auions este et encoir estions en possession de receuoir et perceuoir seulx et pour le tout tous les dismes dessus diz senz ce que les diz religieux et cure y eussent ne preissent aucun droit et se aucun droit y auoient si n'estoit il point quote ne declarie par tiltre qu'il en eussent ne autrement maiz auions acoustume feu nostre dit pere et nous et noz predecesseurs de donner en aumosne aus diz religieux et cure du blef du dit disme vne foiz plus vne autre moins selon ce que bon nous sembloit et aussi que pour sauoir le droit des diz religieux et cure plusieurs informacions auoient este faites par les quelles l'on ne trouoit pas que yceulx religieux et cure eussent vnques receu des dites terres franches et serues le disme qu'il pretendoient fors seulement par deux foiz enuiron a trente six ans et plus ne que yceulx religieux et cure eussent vnques aucune chose receu de disme es mex qui ont testes ferans sur la dite ville de Pichanges les quelles choses n'aqueroient pas aus diz religieux et cure droit de possession ne de quote et par plusieurs autres causes et raisons que nous maintenions les diz religieux et cure replicans au contraire par plusieurs causes et raisons finablement aprez plusieurs raisons et replicacions meues et debatues decay et delay nous le dit signeur de Grancey pour eschiuer despens et matiere de question et pour obtenir perpetuement le bien de pais auec les diz religieux et cure et leurs successeurs et mesmement pour la bonne deuocion que nous auons de acroistre le droit de l'eglise et du dit monastere de Saint Estiene de Diion et pour deschargier l'ame de nostre dit pere se aucunement estoit pour ce chargie sur les chouses dessus dites auec les diz religieux et cure pour eulx et leurs successeurs auons traictie transigie compose et accorde et par la teneur de ces presentes lettres traictons transigons composons et acordons perpetuement pour nous et noz hoirs et aiens cause en la maniere qui s'ensuit c'est assauoir que de toutes les terres du finage de Pichanges que doiuent de treze gerbes vne et de toutes les terres d'icely finage que doiuent de sept gerbes vne et aussi de tous les mex du dit finage de Pichanges qui ont et auront testes ferans sur la dite ville de Pichanges suppose que ce soient vignes qui aient este terres ou terres qui aient este vignes ou qui soient vignes d'enciennete ou terres d'enciennete les diz religieux et le dit cure auront et emporteront perpetuement pour eulx et leurs successeurs la quarte partie du gros disme soit de blefs ou de vins c'est assauoir les diz religieux la moitie d'icelle quarte partie a l'euure et au proffit du dit hospital et le dit cure l'autre moitie d'icelle quarte partie au proffit de sa dite cure et ne voulons pas que ja pour ce soit faite aucune mutation de la leuee au proffit des diz dismes ne de nostre iustice mais seront touiours leuez yceulx dismes en la maniere acoustumee qui est celle que les habitanz de la dite ville de Pichanges qui doiuent le dit disme sont tenuz amener leurs gerbes chascun an en moissons deuant nostre grange au dit lieu de Pichanges pour en pranre le disme auant ce qu'il les puissient mettre en leur grange et en prent nostre commandement nostre portion du disme et semblablement en prent et pranra doresenauant le commandement des diz religieux et dudit cure leur portion la quelle portion des diz religieux et cure yceulx religieux et cure ou leur commandement en portent et mettent doresenauant en porteront ou feront porter a leurs missions et despens la ou il leur plaira Et est assauoir que ou cas que les diz habitans feroient le contraire chascun defaillent est pour ce amendable a nous Item les dismes des blefs et vins des vignes et terres des diz mex qui ont testes ferans sur la dite ville de Pichanges seront aussi leuez selon la maniere que l'on les a acoustumez leuer senz preiudice de nostre iustice et en porteront les diz religieux et le dit cure ou leur commandement leur portion d'iceulx dismes la ou il leur plaira Sauf et reserue a touiours a nous le dit signeur et a noz hoirs et aiens cause sur tous les dismes dessusdiz nostre justice nostre garde et seignorie et noz amendes sur ce et que par ce les diz religieux et le dit cure ne puissent jamais auoir ne aquerir justice seignorie donacion nouelle maniere de leuer les diz dismes ne autre chose que leur dicte quarte partie se n'estoit par la voulente de nous ou de noz hoirs ou aiens cause en ceste partie et est assauoir que parmi ce present traictie nous le dit signeur de Grancey quittons perpetuement pour nous et noz hoirs les diz religieux et le dit cure et leurs successeurs de tout ce en quoy il pourroient estre tenuz a nous pour occasion des diz dismes de tout le temps passe iusques au jourduy et aussi nous demeurerons et serons quittes perpetuement et noz hoirs et aiens cause de tout ce en quoy nous pourrions estre tenuz aus diz religieux et cure pour les arraiges des diz dismes ou autrement pour occasion d'iceulx de tout le temps qui est passe jusques a present Promettens nous le dit signeur de Grancey pour nous et noz hoirs et aiens cause au coadiuteur cy aprez nomme comme personne publique present et stipulant a l'euure et au proffit des diz religieux et du dit cure et de leurs successeurs et tous autres a qui il appartient ou appartendra par nostre serement pour ce donne corporelment aus sains euuangilles de Dieu et soubz l'obligation de tous noz biens meubles et non meubles presens et auenir quelconques ce present acort transaction traictie et composition et toutes les choses dessus dites et chascune d'icelles en tant comme elles nous tuichent et appartiennent garder tenir obseruer et acomplir fermement a touiours senz jamais venir encontre par nous ou autre taisiblement ou en apparent en aucune maniere Renuncens en ce fait de certaine science soubz le serement et obligation que dessus a l'exception de mal de fraude de barat lesion circonuention ou deceuance a toute action contre ce fait condition senz cause ou par moins juste cause a l'exception de la chose non auoir este faite par la maniere que dit est ou par maniere deue et a toutes autres exceptions de tout droit canon et ciuil par les quelz l'an pourroit dire ou venir contre les choses dessus dites ou aucunes d'icelles et mesmement au droit disant general renunciation non valoir se l'especial n'est deuant mise Voulens a l'obseruance perpetuele des choses dessus dites et de chascune d'icelles nous en tant comme il nous tuiche et nos hoirs estre contrains ainsi comme de chose adiugie par la court de monseigneur le duc de Bourgoingne a la juridiction de la quelle court quant a ce nous submettons et obligons nous et noz hoirs et tous noz biens meubles et non meubles presens et auenir quelconques En tesmoin de ce nous auons requis et obtenu le seel de la dite court monseigneur le duc estre mis et auec ycelli auons fait mettre nostre seel a ces presentes lettres les quelles nous voulons estre faites au dictie de saiges tout par la meilleur forme et maniere que l'an pourra la substance gardee C'est fait par deuant Jehan de Maroilles clerc coadiuteur de honorable homme et saige Andrie de Faanay notaire de Diion pour mon dit signeur le duc presens Nicholas de Vinex escuier et Jehan dit le Put hoste de Grancey tesmoins a ce appelez et especialment requis l'an le mois et le jour dessus diz