Charter Document - 05360038

En nom de nostre seigneur amen L'an de l'incarnacion d'icellui current mil troiscens quatre vins le XXIIII jour du mois d'octobre je Marion dite Clere femme de feu Girart le Gelenier d'Acceaulx jaidiz demorant a Diion barbier sauoir fais atouz ceulx qui verront et ouront ces presentes lettres que je non decehue et non controinte ou aucunement circonuenue mas de mon bon grey et volentey de bon propoux et de certaine science pour mon tres grant proffit et euident vtilitey vend cede quicte tramporte ouctroie et deliure perpetuelment pour moy et mes hers a religieuses personnes prieur et couuent du monastere de Saint Estienne de Diion de l'ordre de saint Augustini ou dyocese de Laingres frere Guy d'Arc en Barrois chanone du dit monastere present stipulant et acceptant en nom et au proffit des diz prieur et couuant et de leur successeurs en heritaige perpetuel vne maison ensamble ses appartenances essise a Diion en la rie au Conte ainsi comme elle se comporte des icelle rie jusques a la rie es Channex empres la maison Hugote femme Huguenin du quartier d'une part et la maison de moy la dite Clere d'autre part frainche et quicte pour sa perche Et ceste vendue je fais pour le pris et somme de six vins deniers d'or frans du coing du Roy de France nostre seigneur de bon or et de juste pois les quelx je cognois et confesse auoir ehuz et recehuz entieremant et parfaictement des diz religieux pour ceste cause en pecune bien et lealment nombree don je me tien pour bien paie et contente et en quicte yceulx religieux perpetuelment par ces presentes Pourquoy de la dite maison dessus confinee fons et appartenances d'icelle je deuest moy et mes hers du tout en tout et en reuest les diz prieur et couuent en la personne dudit frere Guy present et l'inuestiture au proffit de leur et de leur successeurs receuant corporelment ou ainxi par ces presentes et les en met desmaintenant en bonne saisine et possession hentiere et proprietaire pour en faire toute leur volentey saulue et reseruee a moy en icelle maison ma demorence jusques a la feste de la natiuitey saint Jehan Baptiste princhenement venant tant soulement et promet par mon sarrement donne pour ce sur sains euuangiles de Dieu corporelment et soubz l'obligacion de touz mes biens et de mes hers mobles et nonmobles presens et aduenir quelcunques la deuant dite maison fons et appartenances d'icelle aux diz religieurs enuers et contre touz perpetuelment condure et garentir frainchement comme dit est pour sa perche deffendre et faire en pais tenir en jugement et dehors a mes propres cousts frais et missions Et sur ce faire toutes chouses qui appartiennent a garancie et en cause d'euiction et contre la teneur de ces presentes lettres non venir Et nous Jehanz le Gelenier d'Acceaulx prestre frere et hers de feu ledit Girart et Jehanz filz de feu Perrot le Py de Courceney en la parroiche de Genilley clers a ce present sauoir faisons a touz que nous et vn chascun de nous en tant comme jl li tuiche et appartient puet tuichier et appartenir par quelque maniere que ce soit audit vendaige et a toutes les chouses ci dessus et desoubz escriptes nous consentons expressement et icelles volons louhons consentons ratiffions et approuons Et promettons non contre venir ne faire dire ou consentir aucunement au contraire Et renunceons quant a ce nous venderesse et ratiffieins dessuz nommez et vn chascun de nous en droit soy par nos sairemens a toutes excepcions decepcions cauillacions ruses et allegacions quelcunques tant de droit comme de fait qui contre la teneur de ces presentes lettres pourroit estre dites ou obiciees et au droit disant general renunciacion non valoir se li especial n'y est expressee et mise et quant a faire tenir garder et adcomplir les chouses dessus dites nous et vn chascun de nous en droit soy volons estre controins ainsi comme de chouse adiugie par la court de monseigneur le duc de Bourgoingne a la juridicion de la quelle court quant a ce nous et vn chascun de nous en droit soy et pour son fait submettons nous nos hers et touz nos biens En tesmoing des quelles chouses nous auons requis et obtenu le seel de la dite court monseigneur le Duc estre mis a ces presentes lettres faictes et passees en la presence de Guiot Jehan de Fontaine coadiuteur de Andrie de Faanay notaire de Diion presens messire Demoinge Griffon de Diion prestre et Jaquot Sauuaigeot de Saint Legey barbier tesmoings a ce appellez et requis l'an et le jour dessus diz