Charter Document - 05360035

Nicolas de Tholon chantre d'Ostun chancelier de Bourgoingne au maieur de Diion ou a son lieutenant ou au premier de noz sergens sur ce requis salut Une cause j'ay piecea ay este mehue a Diion en nostre court entre les religieux abbe et couuent du monastere de Saint Estienne de Diion d'une part et Jehan fil Guiot le Tanron de Coichey de l'auctoritey de som dit pere et le dit Guiot per tant commil li tuiche d'aultre part De et sur ce que par vertuz de execucion donne de notre court a la requeste des diz religieux sur lettres seellees du seel de la court monseigneur le Duc contenent en substance la teneur et le fait des dictes lettres fuit et estoit mandoit de nous controindre troinchiement ledit Jehan par la prise vandue et exploit de ses biens a rendre et a paier es diz religieux quinze quartaulx de blef pour mi froment et auoingne que il leur doit des arraiges de termes passes comme hoirs soubz et par le tout de feu Jehan de Longecourt maire de Coiche par le moyen de Jehannote sa mere a cause d'un quartaul de froment et auoingne par moitief de cense perpetuelle se il ne mettoit auant cause par la quelle il ne dehust ad ce estre controinz la quelle auant mise que il fust adiournez a Diion par deuant nous ou notre lieutenant a vng certain jour contenu en la dicte execucion ensamble l'auctoritey de som dit pere et som dit pere pour li donne auttoritey de pladoier se mestiers estoit pour dire et proposer la dicte cause pour repondre pour serement a l'interrogatoire don mencion est faite en la dicte execucion et pour aler avant selon raison Et en ycelle cause apres certaine journee en estat comparurent en jugement a Diion par devant nous le mardi apres la feste Saint Denis l'an mil CCCLX dix et huit religieuse personne frere Guy d'Arc chanoingne et procureur et en nom de procureur des diz religieux d'une part lidiz Jehans filz dudit Guiot de l'auttorite de som dit pere et li diz Guioz per tant comme il li tuiche d'aultre part Et prierent apointement a oir droit par intellocutoire que dire le pouroit bonnement sauoir mont se li diz religieux estoient suffisement fondez par vertuz de leur procuration de par eux exhibee judiciaulment par deuant nous et successiuement sur ce se l'execucion des diz religieux estoit bien donnee sur leur dites lettres vehues ycelles la dicte procuracion execucion et mouemans que les dictes parties baillerient par estre chascun les seruens a la fin a quoy il tant et pour aler auant selon raison Et apres plusieurs journees assignees a oir droit fuit et ay este dit de nous par notre sentence intellocutoire que les diz religieux estoient bien et suffissamment fondez par vertuz de leur dicte procuracion et que l'execucion et jmpetracion des diz religieux donnees sur leurs dictes lettres est bien donnee vehues ycelles Si condampnons et auons condamne par notre dicte sentence intellocutoire ledit Guiot per tant comme il li tuiche et ledit Jehan de l'auctoritey de som dit pere a proceder avec les diz religieux ou leur procureur en nom de procureur selon le contenu de leur dicte jmpetracion delaquelle santence fuit appelle de nous par les diz Guiot et Jehan som fil a noz signours les auditeurs et la quelle notre santence fuit par yceux conformee Pour ce estre que nous vous mandons et a chascun de vous personne que vous a la requeste des diz religieux ou de leur procureur en nom de procureur adiourner a Diion par deuant nous ou notre lieutenant a noz jours qui enqui seront le jeudi auant la saint Pierre entrant haoust prochain venant le dit Guiot per tant comme il li tuiche et le dit Jehan som fil ensamble l'auctoritey de som dit pere et som dit pere pour lui donner auctorite sur ce de pladoier se mestiers est par proceder avec les diz religieux ou leur procureur en nom de procureur selon le contenu de la dicte jmpetracion et pour aler auant et es chouses contenues et comprises en la dicte jmpetracion selon raison et le stille de notre court Ce que fait en aurez nous resterpnez Donne le diemanche auant la feste de la Magdellaine mil CCC quatre vins