Charter Document - 05360025

En nom de nostre seigneur amen L'an de l'incarnacion d'icelui courant mil troicens soixante dix neuf le quatriesme jour du mois de juing je Jehannote fille de fu Laurent Caillot d'Auon faiz sauoir atouz ceulz qui verront et orront ces presentes lettres que comme Jehan dit Narduin autrement Chioz de Diion chauderonnier soit tenuz et obligiez amoy en la somme de cent et dix sept florins de Florence de bon or et de iuste pois si comme il appert en certainnes lettres seellees du seel de la court monseigneur le Duc de Bourgoingne que j'ay imonstrees et exhibees sainnes et entieres en la presence du coadiuteur et des tesmoins nommez en la fin de ces presentes des quelles lettres la teneur sensuit de mot a mot en ceste forme Je ycelle Jehannote non deceue contrainte ou circonuenue en aucune maniere mais comme bien ainsie par grant et meure deliberacion senz fraude ou cautele par la bone affection que j'ay de subuenir au remede de l'ame de moy et par la deuocion que j'ay a l'eglise du monastere de Saint Estienne de Diion donne perpetuement par pure parfaite et irreuocable donacion faite entre les vis et cede quicte baille deliure et transporte en perpetuite pour moy et les miens par la real tradicion des lettres dessus transcriptes et d'autres lettres semblables seellees du seel de la court de Lengres a religieuses et honestes personnes le prieur et le couuent dudit monastere de Saint Estienne presens et acceptans et pour ce especial assemblez en leur chapitre pour leur et leurs successeurs atouiours mais pour Dieu et en aumosne et pour prier pour l'ame de moy et auoir participacion en leurs orisons et bienfaiz cent florins de Florence de bon or et de iuste pois de la somme des dessus diz cent et dix sept florins contenuz es lettres dessus transcriptes ensamble toute l'accion reelle personnelle utile directe taisible ou expresse que j'ay puis ou doy auoir contre le dit Jehan Narduin par vertu des dites lettres a cause de la dite somme de cent florins et m'en desuis et en reuis yceulz religieux et leurs successeurs perpetuement par la confeccion de ces presentes et les constitue procureurs en ce comme en leur propre chose et les en met en mon lieu par ainsi que desmaintenant en leur nom du droit et accion que j'ay de la dite somme de cent florins par vertu des dites lettres enuers le dit Jehan Narduin il puissient contre ycellui Jehan et ses hoirs pour la dite somme de cent florins d'or faire accion deffendre repliquer poursuir demander et receuoir ycelle somme et conuertir en leur usaige ensamble tout dommaiges despens interest et faire toutes autres choses que je feisse et peusse faire contre le dit Jehan pour les diz cent florins auant la dite donacion promettant aux diz religieux presens et acceptans comme dit est et dabundant au coadiuteur cy dessoubz nomme comme personne publique present et stipulant aleuure et au proffit de touz ceulx a qui il appartient ou appartendra par mon serement pour ce donne corporelment aus sains euuangilles de Dieu et soubz l'obligacion de touz mes biens meubles et non meubles presens et auenir quelxconques ceste presente donacion cession quictance et transport auoir tenir et garder ferme estable et aggraable atous jours senz contreuenir et contre la teneur de ces presentes lettres ou aucunes des choses contenues en ycelles non faire dire ou venir cay en ariers en aucune maniere renuncens en ce fait de ma certainne science a l'excepcion de mal de fraude de barat lesion circonuencion et deceuance oultre la moitie de iuste pris a l'excepcion de la dite donacion cession quictance et transport non auoir este faiz et atoutes autres excepcions de tout droit canon et ciuil par les quelz l'an pourroit dire ou venir contre ces presentes lettres ou aucunes des choses contenues en ycelles mesmement au droit disant general renunciacion non valoir se l'especial ne precede voulans a l'obseruance des choses dessus dites et de chascune d'icelles moy et mes hoirs estre contrains ainsi comme de chose adiugie par la court de monseigneur le Duc de Bourgoingne a la jurisdicion et contrainte de la quelle court quant a ce je submet moy mes hoirs et touz les biens de moy et de mes hoirs meubles et non meubles presens et auenir quelconques En tesmoin des quelx choses j'ay requis et obtenu le seel de la dite court monseigneur le Duc estre mis a ces presentes lettres C'est fait en la presence de Jehan de Maroilles clerc coadiuteur de discret homme Andrie de Faanay notaire de Diion pour mondit seigneur le Duc de Jehan Arnolot de Flurey demeurant a Diion Guillelme le Garneret de Grancey et Regnaut Patou d'Aucerre clerc demeurant a Diion ou dit monastere tesmoins a ce appellez et especialment requis l'an et le jour premierement diz