Charter Document - 05360018

In nomine domini amen Anno incarnacionis eiusdem millesimo trecentesimo septuagesimo nono die sextadecima mensis januarii ego Johannes de Espannereyo decanus christianitatis Diuionis notum facio vniuersis et singulis presentes litteras inspecturis quod cum venerabiles et religiosi viri frater Johannes de Marigneyo abbas ac prior et conuentus monasterii sancti Stephani de dicta Diuione ordinis sancti Augustini capitulariter congregati michi concesserint sepulturam corporis mei in ecclesia sua ante altare sancti Benigni sub cruce statuerintque et ordinauerint pro me necnon parentum et amicorum ac benefactorum meorum animarum remedio tres missas qualibet ebdomada videlicet diebus lune mercurii et veneris submissa voce per conuentum et canonicos eiusdem monasterii cum cereo in eleuacione corporis Christi in suarum et successorum suorum animarum periculo perpetuo celebrandas Ego premissorum contemplacione priori et conuentui supradictis perpetuo contuli dedi cessi et concessi ac tenore presentium confero do cedo et concedo duodecim libras turonenses paruorum annui et perpetui redditus seu census cum litteris aquisicionis eiusdem et quicquid juris michi competit et competere potest in ipsis virtute dictarum litterarum quas duodecim libras dudum aquisiui situatas supra quandam domum mansum et pertinencias eiusdem sitam Diuione in vico Verrerie quam tenet et possidet Aubricus de Accellis poterius stanni iuxta domum Stephani le Chassignet espicerii ex vna parte et domum dicti Aubrici ex altera et vna cum hoc eisdem priori et conuentui dedi numeraui et tradidi realiter et de facto ducentos francos boni auri et justi ponderis cugni domini nostri francorum Regis pro censibus seu redditibus emendis et conuertendis cum predictis duodecim libris annui et perpetui redditus seu census ad opus dictarum missarum jta quod preditte duodecim libre annui et perpetui redditus seu census cum ceteris redditibus qui de dictis ducentis francis aquirendi sunt prefatis priori et conuentui perpetuo remanebunt et in ipsis dictus dominus abbas vel successores sui nichil habebunt nec eisdem onus aliquod de celebracione dictarum missarum incombet De quibus quidem duodecim libris redditus seu census et ducentis francis supra dictis deuestio me et heredes meos ac prefatos priorem et conuentum jnuestio perpetuo per presentes Promittens per juramentum meum propter hoc ad sancta Dei euuangelia corporaliter datum et sub bonorum meorum omnium ypotheca et obligacione huiusmodi donacionem et cessionem ratas et firmas imperpetuum habere tenere et obseruare et in nullo decreto per me uel alium seu alios tacite uel expresse contrauenire omnibus exceptionibus juris et facti quibus contra premissa dici posset obici uel opponi cessantibus et remotis Volens et expresse consenciens me et heredes meos ad hoc cogi et compelli quasi ex re adiudicata per curiam domini ducis Burgundie cuius curie jurisdiccioni et compulsioni me et heredes meos ac omnia et singula mea et heredum meorum bona mobilia et inmobilia presencia et futura quecumque suppono quo ad hec pariter et obligo In cuius rei testimonium sigillum dicte curie requisiui et obtinui presentibus apponi Actum in loco capitulari dictorum religiosorum coram Johanne de Maroilliis clerico coadiutore Andree de Faanay notarii Diuionis presentibus Ytherio Arnoleti Guillemeto Girardi et Guillelmo Raymondi de Broichone clericis Diuione commorantibus vocatis ad hec testibus et rogatis