Charter Document - 05360013

Nicolas de Tholon chantre d'Ostun chancellier de la Bourgogne au maieur de Diion ou a son lieutenant ou au premier de nos sergens sur ce requis salut Contenuz est en lettres scellees du scel de la court monseigneur le Duc que Jehan de Longecourt maire de Coichey retient a cense perpetuelle pour lui et ses hoirs de religieuses personnes le prieur de cloistre et du couuent du monastiere de Saint Estienne de Diion deux pieces de terre contenant enuiron vng journaul et demi assise ou finaige de Coichey la premiere es Arbues selon la terre dudit Jehan et la terre es hoirs dit Gondelineaul l'aultre es Crais de Fontenemolin selon la terre Laurent Viuien et la terre Hugues de Culley c'est assauoir pour vng quartaul de froment et avene parmi sung le disme du lieu le quel il promet et est tenuz rendre et paier chascun an perpetuelment aux diz prieur et couuent a la feste de la nativite nostre seigneur Et vuelt que les dictes deux pieces de terre demorent pour ce obligies a yceulx prieur et couuent Et ance ce oblige lidiz Jehanz lui ses hoirs et touz ses biens Et en vuelt estre controins par la court de monseigneur le Duc de Bourgongne auxi comme de chouse adiugie a la juridicion de laquelle court quant ad ce il submet lui ses hoirs et touz ses biens Or dit religieuse personne et honeste frere Guy d'Arc chanoine et procureur et en nom de procureur des religieux abbe et couuent du monastiere de Saint Estienne de Diion que lon leur ai cesse et deffailli de paier ledit quartaul de blef de quinze ans novellement et darrierement passez qui montent a quinze quartaulx dudit blef Dit encour lidiz procureur en nom que dessuiz que li diz Jehanz reteneurs est alez de vie a trespassement que de lui est demorez hoirs seulz et pour le tout Jehanz filz Guiot le Tauron de Coichey par le moien de Jehannote sa mere sur lequel Jehan et ses biens nous ai requis lidiz procureur par nom que dit est que nous pressions paier les diz religieux des diz quinze quartaulx du dit blef Pour ce est il que nous vous mandons et a chascun de vous per soi que vous le dit Jehan fil du dit Guiot controingnez troinchiement par la prise vendue et exploit de ses biens a rendre et a paier aux diz religieux les diz quinze quartaulx du dit blef et ny ait faulte se ycilz Jehanz filz du dit Guiot ne met avant cause pour laquelle il ne doigt ad ce estre controins laquelle avant mise adiournez le a Diion par devant nous ou notre lieutenant a noz jours qui emqui seront le mardi auant la feste de l'assumpcion Notre Dame proinchain venant ensemble l'auctorite de son dit pere et son dit pere pour lui donner auctorite de plaidoier sur ce se mestiers est pour dire et proposer ladicte cause pour respondre par sairement a l'interrogatoire se il est hoirs de feu ledit Jehan reteneur ou non et pour quelle porcion Et pour aller auant et respondre ycelli procureur en nom que dessuiz sur ce et toutes aultres chouses que il li vouldra demander de fait tuichent le scelle de la court monseigneur le Duc selon raison ce que fait en haurez nous resterpnez Donne le maardi apres l'uictauie de la feste saint Martin d'estey l'an mil CCCLX dix et huit Nous approuons en superscriptons diz