Charter Document - 05360009

En nom de Nostre Seigneur amen L'an de l'incarnacion d'icelli courant mil troicens soixante dix sept le vint deux jour du mois de nouembre je Agneaul femme Jehan Lambelot de Saliue de la licence et auttorite dudit Jehan mon mari ad ce present et moy donnant licence et auttorite de faire le choses qui sensuiguent a la quelle je le dit Jehan donne et octroie par ces presentes licence et auttorite de faire toutes les choses cy apres escriptes et contenues en ces presentes lettres faiz sauoir atous ceulx qui verront et orront ces presentes lettres que je la dicte Agneaul de la licence et auttorite que dessus donne perpetuement par vne foiz pour moy et mes hoirs et aiens cause par pure et irreuocable donacion faite entre les vifs a religieuses et honnestes personnes les prieur et couuent du monastere de Saint Estienne de Diion freres Jocerant de la Chapelle prieur Guillelme de Nantuel enformier Guy d'Arc grenetier Jehan de Molins religieux et frere Paris de Lux pictancier couuent dudit monastere presens et tenens chapitre pour ceste cause et stipulans quarente frans de bon or et de iuste pois du coing du Roy nostre seigneur en augmentacion de la chapellenie fondee en ycelli monastere par feu Alais Dauou femme de feu Aymonin dit Baronde a paier au dit couuent ou a leur certain commandement par les hoirs de moy la dicte Agneaul et aiens cause ou par les executeurs de mon testament tantost et auant toute euure aprez le decez de moy ycelle Agneaul et les diz quarente frans d'or je assie et assigne par vne foiz aus diz prieur et couuent sur vne faux de pre assise ou finaige de Saliue ou lieudit en Estaulot autrement en Velers de coste le prey Esteneuot de Loisseroy de Saliue d'une part et le pre es enfans Hugue Besuchot d'autre part et sur vne piece de terre assise oudit finaige ou lieu dit ou Clou de Chasot decoste les hoirs Hugue Besuchot d'une part et la voie commune d'autre les quelx assignaulx je ne pourray vendre ne aliener ma vie durant et vuilz que apres mon trespas les diz prieur et couuent puissent recourre aux diz assignaulx au deffaut de paie et les tenir et possider et faire les fruis leur jusques afin de paie des diz quarente frans d'or par vne fois come dit est Promettans je la dite Agneaul par mon serement pour ce donne corporelment aus sains euuangiles de Dieu et soubz l'obligacion de touz mes biens meubles et non meubles presens et auenir quelconques et ou qu'il soient ceste presente donacion et toutes les choses contenues en ces presentes lettres tenir perpetuement senz contre venir et garantir les diz quarente frans d'or et aussi les diz assignaulx frans de toutes charges parmi leur disme Et renunce en ce fait je la dite Agneaul soubz le serement obligacion et de la licence que dessus a l'excepcion de mal de fraude de barat lesion circonuencion et deceuance a la loy de Julie et atoutes autres et singuleres excepcions de tout droit canon et ciuil par les quelx l'an pourroit dire ou venir contre la teneur de ces presentes lettres ou aucunes des choses contenues en ycelles mesmement au droit disant general renunciacion non valoir se l'especial n'est deuant mise Voulens je la dite Agneaul de la licence et auttorite que dessus à l'obseruance perpetuelle des choses dessus dites et de chacune d'icelles estre contrainte ainsi comme de chose adiugie par la court de monseigneur le duc de Bourgoingne a la juridiccion et contrainte de la quelle court quant a ce je submet et oblige moy mes hoirs et touz les biens de moy et de mes hoirs meubles et non meubles presens et auenir quelconques En tesmoin des quelx choses j'ay requis et obtenu le seaul de la dite court estre mis a ces presentes lettres les quelles je vuilz estre faites au dictier de saiges par la meilleur forme et maniere que l'an pourra au proffit des diz religieux la substance gardee C'est fait par deuant Jehan de Maroilles clerc coadiuteur de Andrie de Faanay notaire de Diion pour mondit signeur le Duc Presens Symonot Thomas de Ys et Estienne filz Henriot le Rouhier de Talemer clers demeurant a Diion tesmoins ad ce appellez et especialment requis l'an et le jour dessus diz