Charter Document - 05350080

Richard de Champ repus receueur de la baillie de Sens a Iehan de Champ repus Symon du saint sepulcre sergents du roy notre seignour et a touz autres sergens connus de par nous salut nous uous mandons que dores en auant uous ne contraigniez labbe ou abbaye de saint Estienne de Diion a cause de uingt liures de rente que leu leur demandoit par lextrait de la chambre des comptes pour le fait du temple et se pour ce aucune chose auez pris saisi ou arreste du leur pour ceste cause si leur mettez au deliure ces lettres ueues Donné a Sens sous notre seel le uingt et unième iour de iuillet lan mil trois cent quarante et six A touz ceuls qui ces lettres uerront ou orront Richard de Champ repus receueur de la baillie de Senz salut les lettres de noz seigneurs des comptes auons receues contenans la fourme qui sensuet les genz des comptes notre seignour le roy à Paris au receueur de Senz salut nous nous mandons que labbe ou abbaye de Saint Estiene de Diyon a cause de uingt liures de rente et labbe de Saint Benigne de Diyon a cause de cinc cents florins de Florence que leu leur demandoit par lestrait pour le fait du temple uous ne contraigniez dores en auant en aucune manere car nous les auons fait acquittier es debtes deus nous pour ce que nous sauons que le roy ueult quil en soient quittes et demeurent paisibles donne à Paris le dix septieme iour de iuillet lan mil trois cent quarante six et estoit ainsi signee I Clabart donné a Senz souz notre seel le uingt et unieme iour de iuillet lan dessus dict