Charter Document - 05350064

Au nom de nostre seigneur amen En l'an de lincarnacion dicelui courrant mil trois cenz quarante et cincq le uingtieme jour du moys de feurier Nous freres Regnaux humbles abbes dou monastere de saint Estienne de Dyion en nom de nous et pour nous frères Henriz dis Allemans et Othes Daichey chanoines du dit monastere procureur et en nom de procureur dou couuent du dit monastere par uertu dune procuration saalee des seaulx de nous le dit abbey et dou dit couuent haenz puissance entre les autres chouses de faire compromis si commil appert per la teneur de la dicte procuration de la quele la teneurs est cy apres escripte dunepart et nous Iean Frerouhoz maires de la commune de Dyion en tant commil nous touche et appartient comme mahour de la dicte vile et en nostre personne et nous Guillaumes Bourgeoise Iehanz Lambert Iacob li Uertuoux Uuillemoz Malechaiz et Iehan Symone procureur et en nom de procureur de escheuins et de la commune de la uille de Dyion par uertu dune procuration saalee du seaul de la dicte commune haenz puissance entre les autres chouses de faire compromis si commil appert par la teneur de la dicte procuration cy après escripte d'autre part Cy sanseuquent les tenours des dictes procurations et premierement sanseut la tenours de la procuration de nous les dis religieux et est tele [] Item sansuet la teneur de la procuration de la dicte commune et est telle A tous ceux qui uerront et oront ces presentes lettres nous Iehans Frerouhoz maires de la commune de Dyion li escheuins et toute li commune de la uile de Dyion facons sauoir que lan de grace mil trois cens quarante et cincq le diemange deuant la saint Andrie a hore de prime essamblez on cimetier de saint Benigne de Dyion pour aucunes des besoignes denous de la dicte commune tratier et ordener et especialement pour choses contenues en ces presentes lettres le cor premier corney et criey parmi la dicte uille si comme il est de costume de une commune uolontey et de commun assentement facons ordonnons et establissons nos amez Uillemot le uertueux Guillaume Bourgeoise Iehan Lambert Iacob le uertueux Uillemot Maulechart Bertholomot Goulot et Iehan Symone de Dyion clers pourteurs de ces lettres noz procureurs generaux et mandemanz especiaulx tous ensamble les sept les six les cinc les quatre ou les trois dou moins ensamble en tel meniere que li condition de locupant ne soit mendre aincoiz quanque sera faicte ou commanciez par les dicts sept six cinc quatre ou les trois dictes ou moins puisse estre terminez moyenez et finiz par lautre en toutes nos causes mehues et amouoir quelles quelles soient et en quelque menere que eles puissent touchier nostre commune dessus dicte tant apresent comme ou temps aduenir tant par deuant tres excellant prince nostre tres chier et redoutey soignour monsoignour le duc de Bourgoigne cuen Dartois et de Bourgoigne palatin et soignour de Salins ses commissairs ou ses auditeurs baillis ou officiers hum ou plusieurs comme par deuant les auditeurs commissaires baillis officiers ou deputez quels qu'ils soient de nostre sire le Roy de France ou par deuant les maistres des foires de Champaigne et de Brie et autres iuges et officiers quels quil soient tant ecclesiastiques comme seculiers soient ordeniares ou extraordenaires ou lour leuxtenantes encontre toutes persones tant ecclesiastiques comme seculiers et donnons a nos dicts procureurs tous ensamble es sept es six es cinc es quatre ou es trois aumoins parlain pouoir generaul licence et mandement especial de demander pour nous et denous deffendre de dire et proposer exceptions et raisons tant de faict comme de droit de entaumer plaid de iurer de calumpnie et de ueritey dire tant sur le principaul comme sur lactessoire de poser de articuler de rendre apositer et articuler de décliner cour et iugement de excuser et de informer de prouer tant par tesmoinz comme par autres instrumanz et lettres de reprouer et contredire tesmoinz et lour dicts actes instrumanz et autres lettres de aduerse partie de demander et receuoir restitutions auoul et court tant de persones comme de biens de oir sentence tant interlocutoire quant diffinitiue de appeller de sentence et de grief quels qui soient de inuouer intimer et presenger appeaulx de demander et obtenir apostres de empetrer absolutions et toutes lettres contenanz tant grace comme droiture de demander despans et interest et don receuoir et se mestiers est de iurier sur yces de faire compromis de ualler le compromis la poine et le sermant de proroguer ledit compromis segon ce que mestiers et il uerront que mestiers sera et generalement de toutes autres choses appertenantes à celes dessus dictes faire que nous faciens ou pouriens faire se nous estiens presents et que bons et leaulx procureurs pourrient et deurient faire et promettons au profit de touz cels a cuy il puet appertenir souz lipotheque et obligation des biens de nostre commune dessus dicte hauoir fort et agreable quanque sera faict ou procure par nos dicts procureurs les sept les six les cinc les quatre ou les trois aumoins ester en iugement et paier la diugie se mestiers est En tesmoingnage de ce nous hauons mis le seaul de nostre commune dessus dicte en ces presentes lettres faites et donees lan et le iour dessus dicts Nous les dictes parties es noms que dessus facons sauoir atouz que sur les destors estanz entre nous le dit abbey et ledit couuent du dit monastere de saint Estiene dune part et nous ledit mahour les escheuis et commune de la dicte uile de Dyion dautre sur le fait de la aulte iustice des uiles Dahuit et de Cutigney de laquele iustice chascune partie se disoit estre en saisie et en possession Item et pour cause et occasion dun estang que nous le dict abbes et li dict couuent hauons fait ou commancie a faire ou finage de Cutigney Item et pour cause et occasion dou banc des uignes assizes ou finage Dahuit et generalment sur tous autres descors mehus et a mouoir entre nous les dits religieux et nous la dicte commune nous les dictes parties et noms que dessus hauons fait et par la teneur de ces lettres facons compromis en reuerent pare en Dieu Monseigneur Iehan Aubriot par la grace de Dieu et dou saint Sege de Rome euesque de Chalon comme en arbitre arbitratour ou amiauble compositour eslehu et nommey du commun assentement de nous les dictes parties auquel reuerent pare en Dieu nous les dictes parties es noms que dessus hauons donney et donnons par la tenour de ces lettres plain pouhoir de nous acorder et mectre a pais sur tous les dicts discors par droit par pais assentie ou par uoluntey ensit commil pourra meaux et que bon li semblera et durera li pouhoirs que nous donons au dict reverent pare en Dieu iusques a Pasques prochain uenanz et le rapport la pronunciation et declaration que lidict messire leuesque pronuncera et raportera sur les dits descors a une fois ou a plus dedanz le dict terme nous les dictes parties et chascun de nous es noms que dessus sumes tenuz promettre tenir garder et acomplir de point en point senz iamais uenir en contre par nous ou par autre taisiblement ou en appert ne soffrir que autres y ueigne et nous li dict Iehans Aubriot pour la grace de Dieu et du saint Sege de Rome euesque de Chalon qui autrefois ensemble monseignour Guillaume de Musigney cheualier au temps quil uiuoit ensamble le dict abbey et les dicts procureurs du dict couuent et ensamble le mahour de Dyion et les procureurs de la dicte commune qui pour le temps estient et pour lesdictes parties acorder sur les dicts descors hauiens estey es lieux et sus les lieux de quoy et pour occasion des quelx li descors estient entre les dictes parties et hauiens fait mectre plusieurs soings en plusieurs lieux en lieu de bornes pour la declaration et debornement faire de la dicte iustice debanz mettre pais entre nos uoisins et especiaulement entre les dictes parties Nous par la uertu dou pouhoir que nous est donez des dictes parties es noms que dessus et si comme dessus est dict sur les dicts descors hauons habuz plusieurs traitez de pais entre les dictes parties et pour lien de pais prononcons et rapportons en la meniere qui sansuet cest assauoir que sur les dicts descors les dictes parties seront a pais et a acort perpetuellement par tel que es lieux ou autrefois furent mis li dictes soings seront mises bornes depre qui seront la declaration et le debornement de la dicte iustice cest assauoir que entre les uiles de Dyion et de Cutigney sus le bout dou fossey qui est sus le chemin de Dyion qui tant a Cheuigney sainct Sauveur et est pres dou rehussel qui descent de la fontaine dou bois Doissel et qui diuise le finage de Cutigney et de Cheuigney sera mise une borne et demore touz li dicts chemins par deuers Dyion et dois celu lieux en descendent dans le mes qui suit Guillemin de Cutigney ou quel lieu fut mis huns autres soins sera mise une borne ou lieu ou fut mis li soins ou dict mes dauers chiez le dict Guillemin et dois le dict mes en descendent au dessus dou bout de la haye qui descent sus le biez dessouz en troinchant tout le chemin li quelx chemins demore tous par deuers Dyion au dessus dou bout de la dicte haye ou fut mis huns soins sera mise une borne qui regardera iusques au chemin de sainct Appolome et demora touz iours li dictz chemins par deuers Dyion Item entre les uiles de Dyion et Dahuit es lieux ou autre foiz furent mis soins pour la declaration et debornement faire de la dicte iustice seront mises bornes cest assauoir a la croix deuant la Malaidere Dahuit dessure la uille Dahuit par dessus Dyion sera mise une borne et dois en montant au dessus des uignes de la coste Dahuit en hun murgier qui est au dessus de la uigne Iehan le formaulier en regardant par deuers Aulte uile sera mise une borne ou dit murgier et dois la borne qui sera mise a la croix deuant la Malaidere Dahuit en descendent par deuers Suson entre la riviere de Suson et la couruee des dicts religieux sus le bout de la dicte couruee par deuers Suson sera mise une autre borne et dois celu lieu en descendent entre la riuiere de Suson en la combote qui est appellee la combe Pourriot sera mise une autre borne au chief de la dicte combe et demore toute la dicte combe par deuers Dyion et dois la dicte combe en montant a hun grant chemin qui tant de Dyion a Messigney sera mise ou dit grant chemin une borne en regardant contre le dessus dou finage de Roiffey par deuers Asneres et prononcons que es lieux dessus designez pour mettre les dictes bornes seront mises bones et grosses bornes de pierre et que es dicts lieux eles seront et tenront perpetuellement prononcons encour et raportons pour lien de pais que dedanz les dictes bornes entant comme elles se estandent par deuers les dictes uiles Dahuit et de Cutigney lesdicts religieux pour lour et lour successeurs hauront perpetuellement toute iustice aulte et basse sur toutes menieres de genz soient des dictes uiles ou dessuers exceptey cels qui senz fraude demoreront en la uile de Dyion ou es uiles estanz en la banllue cest assauoir a Lairey a Crimolois a Chenoues a Marcenai a Lonui a Ouges a Senecey a Mirandes a sainct Appolomey a Suilley a Roiffey a Poilley a Fontaines a Pourbles et es granges de la nouhe de Bray et de Morueaux fort qui y demorient comme chief dostel ou comme marcenniers ou familiers et excepte celz de Dyion ou aucuns dicelz qui demorrient es dictes uiles et finages Dahuit et de Cutigney es demonies qui haurient es dicts lieux ou aucun dicelz et excepte auxi lour maignies familiers et marcenniers demoranz en lour dicts demonies ou en aucun dicelz lesquels persones tant chiefs dostel comme marcenniers ou familiers pourront demorer tant conioinctement comme separement es dictes uiles et finages Dahuit et de Cutigney se demoines de cels de Dyion ou daucunes dicelz senz ceque les dicts religieux haient sur yceles persones aucun exercitement de iustice fors que de cas de basse iustice mas en tels persones la iustice en touz cas qui ne seront de basse iustice demorra perpetuellement a la uile de Dyion en cognoissance et en iugement ce excepte que es dictes uilles Dahuit et de Cutigney et dedanz les dictes bornes li maires et li escheuins ou lour commandemanz qui seront a Dyion pour le temps ne hauront point de prise de lour gens se ce nestoit quil les trouessient mesfacenz es dicts lieux en cas de present et qui ne fust cas de basse iustice mas se le dict mahour escheuins ou lour commandemanz les trouient mesfacenz es dicts lieux en cas de present et qui ne fust de basse iustice li dict mahour escheuins ou lour commandemanz pourrient pranre le mesfacent ou les mesfacenz et amener a Dyion pour faire raison et ce en la dicte prise facent aucuns debaz mouoir entre les genz des dicts religieux de sainct Estienne le mahour escheuins de Dyion ou lour commandement sur ce que li dict religieux ou lour gens pourrient dire que li dicts prisonniers ne seroit pas des habitanz ou demourants de la dicte uile de Dyion ou des uiles de la banllue dessus dictes ou que li cas pour quoy il seroit pris ne appertenest pas a la iustice de Dyion quare ce estoit cas de basse iustice ou quel cas la uile de Dyion nay aucune iustice li dicts prisonniers pour le dict debat demorroit en la prison des dicts religieux au lieu ou il hauroit estey pris ou arrestez iusques a ce quil fust cognehuz et sehu au quel la iustice appartiendroit ou es dicts religieux ou a cels de Dyion la quel chouse sera sehue en la meniere contenue en larticle cy dessouz escripte Item se il auenoit que aucuns des habitanz de la dicte uile de Dyion ou des uiles de la banllue de Dyion dessus dictes fust pris pour les dicts religieux ou pour lour commandement dedans les bornes par deuers les dictes uiles Dahuit et de Cutigney pour cas qui ne fust de basse iustice fust en fait present ou non present tantost comme li maires de Dyion ou ses commandemenz requerra le prisonier es dicts religieux ou a lour commandemant li dict religieux ou lour commandement seront tenuz en contenant et senz difficultey dou monstrer et exhiber au dit mahour ou a son commandement et se li dict prisoniers se aduouhoit estre des habitanz de la uile de Dyion ou delune des autres uiles dessus nommees de la banllue de Dyion li dicts religieux ou lour commandement seront tenuz de rendre le dict prisonier ensemble touz les biens au dict mahour ou a son commandement paiez les despans raisenaubles qui hauroient estey faiz raisenaublement en la prison des dicts religieux pour le dict prisonnier et pour telz qui laurient gardey et se li dicts prisonier se aduouhoit pour les dicts religieux ou pour autre que les dicts religieux et li dicts maires ou ses commandements pouhoit ou uoloit enformer sommerement et de plain et sens figure de iugement dedanz six iours apres ce que la prise dou dict prisonnier seroit uenue a sa cognoissance que li dict prisoniers fust des habitanz et si comme dessus de la uile de Dyion ou daucunes des uiles dessus nommees estanz en la banllue li dicts religieux ou lour commandemenz linformacion faite seront tenuz de rendre bailler et deliurer le dict prisonier ensemble touz ses biens au dict mahour ou a son commandement senz nule difficultey ou empoichement mettre et ce pendent li dict religieux garderont le dict prisonier senz iayne senz translater de lieu en autre et senz autre uilenie faire fors tant soulement simple garde selon ce que li cas le requara et seil auenoit que li dict prisonier se liest en la court des dicts religieux par ny ou par cognoissence ou per autre menere de liens quel quil fust li dicts liens seroit de nule ualour amtois serient tenuz li dicts religieux de rendre le dit prisonier au dict mahour ou a son commandement si tost commil seroit monstre le dict prisonier estre lour iustizauble de la dicte uile de Dyion ou delune des dictes uiles de la banllue et se il auenoit pour aucune auanture que iai ne soit que li dit religieux ou lour gens es dictes uiles Dahuit et de Cutigney ou deans les bornes par deuers les dictes uiles aucuns des habitanz de Dyion de lour familiers ou marcenniers ou des dictes uiles de la banllue priessient senz cause cuident li dicts religieux amanderient au prisonier au regart des genz de monseigneur le duc et auxi se aucuns des hommes ou habitanz des dicts religieux ou de lour dictes uiles Dahuit et de Cutigney en lour prison se auouhoit pour la dicte commune de Dyion il seroit renduz au mahour pour ledict auoul et ce dedanz six iours apres la dicte rendue li dicts religieux uolient enformer le mahour de Dyion le dit prison estre de lour dictes uiles Dahuit ou de Cutigney li dicts maires sera tenuz dou rendre pour faire raison paiez les despanz raisenaubles faiz pour le dict prisonier et pour ceulz qui larront gardey Item demorront par deuers les dicts religieux li prisoniers des habitans des uiles es queles la commune de Dyion debatoit la aute iustice et debat hauoir ou cas quil seroit declarie la dicte uile de Dyion non hauoir la aulte iustice et de celz ne seront pas tenuz li dicts religieux de faire la rendue au dict mahour ne a la uile des prises qui se ferient apres la dicte declaration et est entenduz es articles des prises qui serient faites apres la dicte declaration Item dessuers les dictes bornes deuers Dyion en touz cas qui ne sont de basse iustice et sur toutes manieres de genz soient des uiles Dahuit de Cutigney ou dautres lieux li maires et la commune de Dyion hauront la iustice quant a la prise la cognoiscence dou cas et le iugement tant soulement et la basse iustice demourra a celz qui en hont usey anciennement saul que se aucuns des hommes des dicts religieux des dictes uiles Dahuit et de Cutigney hi estorent pris en fait non present et pour cas qui ne fust de basse iustice li dicts maires le rendroit selon lus et costume dou paiis et tous li demoranz de la iustice et toute la basse iustice hors des dictes bornes par deuers Hahuit et Cutigney tant comme li finages Dahuit et de Cutigney compragnent demore es dits religieux saul et reseruey au mahour escheuins et commune la iustice es dicts lieux en meniere et forme contenues es articles dessus dicts Item sus le debat dou bant des uignes seanz ou estanz es finages Dahuit et de Cutigney tant apresent comme ou temps a auenir prononcons et raportons par la meniere qui sansuet cest assauoir que li maires de Dyion mectra le bant de uenoinges se il li plait sur les uignes estanz en la banllue de Dyion en la meniere quil hai acostumey a faire et son dict ban fera garder pour son commandement sus et par les habitanz ou demoranz en la uile de Dyion en toutes les uignes quil hont ou hauraient es finages Dahuit et de Cutigney et se li maires ou ses commandemenz trouoit aucun des habitanz de la uile de Dyion qui hahusient brisie ou brisessient son ban ou finage Dahuit ou de Cutigney li dicts maires ou ses commandemenz le pourrient getie hors de la uigne et luy gaigier pour paier la mande accoustumee et li abbe de sainct Estienne qui maintenant est et qui pour le temps sera ou ses commandements pouront mettre le ban des uenoinges en la uille Dahuit de Cutigney et es finages et faire garder sus ses hommes et sus tous autres exceptez les habitans de la uille de Dyion li quels habitans ou demourants dans la dicte uille de Dyion ne seront pas tenus de garder ne de tenir le ban mis par ledict abbey et pour ensuit huns chascun des dicts abbey et mahour fera garder le ban mis par luy a ses subgies et iustisaubles et non a autres Item prononcons et ordenons que pour aucun droit que li maires escheuins et habitans de Dyion disoient hauoir ou fonz dou sege de lestang que lidict religieux hont faict ou commancie a faire li dicts religioux bailleront es dict mahour escheuins et habitans de Dyion leur maisenements et le mes que tenoit Perrenot li berbiers de Saux au temps qui uiuoit li quels maisonnemans et mes sont assis a Dyion en la rue noue selon la maison et le mes qui furent maistre Eude le motot dune part et le chemin commun qui est deuant la maison maistre Iehan dou pois ou lon dict chies les braiser dautre ensint comme li dis maisements et mes se portent et estandent dou lont dois la dicte rue noue iusque ses mes et maisons de bois qui sont des dicts religious et saillent en la rue dauers leglise de sainct Michie et les dicts maisenements et mes bailleront li dicts religious es dict mahour escheuins et habitanz frans de toute charge et pour mi ce li fons dou dict estang demore es dicts religious et iceux religioux parferont le dict estang par la meniere que commancie le hont en tel meniere toute uoyes quil ne porront aulsier la chaucie en meniere que laigue atoichoit ou passoit la borne qui sera mise arres dou chemin contre la chaucie et la uile de Cutigney et que li aigue dou dict estang ne puisse entrer ne occuper le dict chemin encour prononcons et raportons que li dict religious pour ensint comme li chemins qui doys Cromay et dois la uile de sainct Appolomey descendent sus le dict estang li dict religious deliueront a cels de Dyion chemin dou lont dou dict estan dou gros de uint et cint piez a main pour passer lour cherotes et bestes au lont dou dict estan pour descendre en la uile de Cutigney et a chemin qui uay uers le molin de Lamprey pour tel que ceulx de Dyion ne porront et ne deuront mener cherrotes cheuaulx ne autres bestes grosses ou menues par sus la chaucie dou dict estan et demore la iustice dou dict estan a lune partie et alautre ensint commil est deuisiez es articles dessus escriptz des uiles et finages Dahuit et de Cutigney et la prononciation et acors dessus diz nous raportons et facons saul et retenu le consentement de monsignour le duc en tant comme aluy puet apartenir pour raison de iustice ou de souuerainetey et se aucune chouse ou ocultey hauoit es choses dessus dictes prononcies et raportees par nous nous en retenons a nous la declaration iusques au terme dessus dict et nous li dictz abbes en nom de nous et par nous li dit Henry Aulemanz et Othes Daichey procureurs et en nom de procureurs des dictz religious dune part et nous li dictz Iehans Frerouhoz maires de la dicte uile de Diion en nom de nous et par nous et nous li dessus dict Guillaumes Bourgeoise Iehans Lambert Iacoz li Uertuoux Uillemoz Malechart et Iehans Symone procureurs et en nom de procureurs des escheuins et de la dicte commune de Diion dautre la pronnociation et la cort dessus diz et toutes les chouses dessus prononcies et raportees dou dit monseigneur leuesque ensint et par la meniere que eles sont diuisies uolons emologons ratifions et approuons et promectons nous li diz abbes en bone foy et nous li dit procureurs en nom de procureurs des diz religieux et dou couuent dou dit monastere et nous li diz maires de la uile de Diion et li dit procureurs en nom de procureurs des escheuins et de la commune de Diion pour nous et pour nos successours par nos seremanz donez corporelement sur sains euangiles et souz lobligation de touz les biens temporels dou dit monastere et des biens de la dite commune le dit acort la prononciation et raport dessus diz et toutes les chouses et singuleres dessus dites ensint et par la meniere que eles sont cy dessus diuisies et escriptes hauoir et tenir fermes et yceles garder et acomplir de point en point senz corrompre en aucune meniere et senz iamais uenir encontre par nous ou par autre taisiblement ou en appert ne soffrir ques autres hi ueigne et a tenir garder et acomplir les chouses dessus dites nous les dites parties et chascune de nous es noms que dessus uolons estre controintes auxi comme de chouse adiugie par la court de Monseigneur le duc de Bourgogne a la iuridiction de la quele court quant a ce nous li diz abbes et procureurs en nom de procureurs dou dit couuent submettons nous nos successeurs et les biens dou dit monastere et nous li dit maires et procureurs en nom de procureurs des diz escheuins et commune de Diion submettons tous nous nos successeurs et les biens de la dicte commune En tesmoignage des quelx chouses nous li diz euesques et nous les dictes parties es noms que dessus hauons requis et obtenu le seaul de la dicte court estre mis en ces presentes lettres et es samblaubles doublees de mot a mot Ceu est fait en la presence de Hugue Poissenot de Diyon clerc tabellion dou dit lieu pour monseigneur le duc de discrete persone maistre Hayme de Dompre doyen de la chapelle monseigneur le duc de Diyon de maistre Iehan Deschenon preuost de saint Iehan et de Clemant dit des champs de Saline tesmoinz a ce appalez et requis lan et le iour dessus diz