Charter Document - 05350052

Richard de Champ repus receueur de la baillie de Sens à Guillaume du Puis et à Gile Theneux sergent a cheuaul dou roi nostre seignour en la dicte baillue les lettres du roy nostre seignour auons recehues contenanz la forme qui sensuet Philippe par la grace de Dieu rois de France a notre receueur de Sens ou a son leutenenz salut comme plusieurs grans et diuerses somes dargent soient dehues a nous de plusours et diuerses persones a cause de ta recepte en la baillie de Sens et es ressors dicelle desquelles les paiemans sont mont et hont estey par plusieurs forz retardez par les lons proces seruices et cauillations des debitoure et pour aucuns lor creditours qui se efforcent et uuelent par lors malices estre porez au deuant de nos dictes debtes et se efforcent de toy mettre et tenir en proces sur ce es iuridicions daucuns et plusieurs iustices autres que les notres ou grant dommaige et preiudice de nous et comme la cognoissance exercice et declaracion de nos dictes debtes ne apparteigne a aucun iustice que au nos ne ne doiuent nos gens proceder pour nos debtes en autres cours ou iurisdicion quecunques que es notres nous te mandons et comettons que toutes les debtes qui a cause de ta recepte de la dicte baillie et ressort et qui par nous par extrait de la chambre de nos comptes a Paris te font ou feront baillier a esploiter leuer et receuoir tu liures et esploite par nous et en notre nom auant toutes autres debtes quelles que elles soient et a qui que elles soient dehues et a ce que sattisfacion en soit faite deuers toy controing rigoreusement les debtours dicelles par prise uendue et explectation de lours biens dost et sanz delay et detencion des corps se mestiers est si comme il est a faire pour nos propres debtes et si aucun si opposoit au contraire notre main soffisamment garnie si comme il appartiendra assigne iour certain et competant aus opposanz deuaut nos amez et feauz genz de nos diz comptes de Paris pour proceder et aler auant sur ce si comme de raisons sera dou quil iour tu certiffies deuement nos dictz gens de ce faire te donons pouoir et mandons et commandons a touz les sugez et iusticiers de notre reduire que a toy en ce facent obeissent et ne te y empeschent en aucune menere non obstans queconques proces sur ce encommanciez ne lettres subreptices empetres ou a empetrer au contraire Donné à Paris le troisième iour de may lan de grace mil trois cent quarante et cinc et est ensuit signet en la marge par les genz des comptes G du boys Par la uertu des quelles lettres dessus transcriptes et par ycelles acomplir de point en point nous uous enuerons un role forcle de notre scel lequel nous ha este enuoiez de nos seignours de la chambre des comptes en quelle plusieurs persones sont contenues et nommees qui sont tenues du dit seignour en plusieurs et diuerses somes dargent pour quoy nous uous mandons et comettons por nous et en leu de nous a touz deux ensamble et a chascun pour soy que uous uous transportez par tout la ou trouer porrez les personnes condennees et nommees ou dit rolle et sur ycelles faites execution a ploin et sur chascune persone par soy par la some et iusques aus somes contenues et esclarcies ou dit rolle par prise uendue et explectacion de lor biens et de lor corps mettre et tenir en persone fermes par tout la ou trouer les porrez hors lieu saint a lor propres couz et despens en acomplissant de point en point les lettres du roy notre dit seignour selont lor teneur et si il y a aucun qui se uuille apposer au contre la main du roy notre seignour garnie soffisamment donez iour aus opposanz par deuant nos seigneurs des comptes pour aler auant si comme raison sera en nous certiffiant de ce que fait en haurez de ce faire uous donnes pouoir par la tenour de ces lettres mandons a tous a qui il appartient de par le roy notre seignour preons et requerons a tous autres que a uous et a chascun de uous obeissance et entendement en ce facent a uous prestent conseil confort et ayde se mestre en auen a uous les en requerez donné souz notre scel le dix huitieme iour de may lan de grace mil trois cent quarante et cinc Iehanz de Crespi consoillier du roy notre seignour et son bailli de Sens a Guillaume du Puis et Gilet Teneux sergent du roy notre seignour salut Nous uous mandons et commettons que uous les lettres de honorable homme et saige sire Richard de Champ repus receueur de la baillie de Senz es quelles sont encor posees unes lettres dou roy notre seignour par mi les quelles ces notres presentes sont annexees enterinez et accomplissez dehuement selont lour teneur de ce faire nous donnons pouoir mandons et commandons a touz nos sugez requerons ceuz autres que a uous en ce faissons et obeissons Donné a Sens le lundi apres la saint Iehan lan mil trois cent quarante et cinc Donné pour copie souz les seaux de nous Guillaume du Puis et Gilet Teneux sergenz du roy notre seignour dessus diz le lundi iour de huictaue de la feste saint Martin destey l'an dessus dit