Charter Document - 05350022

Au nom de nostre Seignour amen en lan de lincarnation diceluy corrant mil trois cenz quarante et doux ou mois de nouembre Nous Iehans Girarde de Noiron demorans à Marcennay en montaigne et Girarde femme dou dit Iehan de lautoritey et dou consentement diceli Iehan mon mari facons sauoir a tous ceuls qui uiront et orront ces presentes lettres que nous uendons et quittons emperpetuitey a Iehan dit de Bretenere de Dyion drapier pour luy et pour ses hoirs et pour ceuls qui deli hauront cause dix souldees de terre censauls a la monoye qui courra communement deci en auant par les termes dannuel et perpetuel rente et ceste uendue nous facons pour le pris de cent souls de tournoy les quels nous hauons hahuz et recehuz dou dit Iehan en pecune bien et loyaulment nombree et nous en tenons pour paiez de luy pour quoy nous fumes tenuz pour nous et pour nos hoirs lesquelx nous obligeons a ce par nos sauremenz donnez corporelment sus sains euangiles de Dieu et sus lobligation de tous nos biens mobles et nonmobles presens et aduenir les diz dix souls censauls uendre et paier chascun an emperpetuitey audit Iehan de Bretenere et a ses hoirs ou a ceulx qui de li hauront cause le iour de la feste de saint Remy et ou cas que nous ou nostre hoir deffandriens de paier chascun an au dit terme les diz dix souls censauls au dit Iehan et es suens nous sumes tenus et promettons par nous et pour nos hoirs par nos diz sairemenz et sus lobligation dessus dite rendre et paier au dit Iehan et es suens alour requeste douze deniers de la dite monoye pour chascune semeigne toute fois et quantes fois que nous ou notre hoir y deffauderons ensemble coux missions et domaiges que li diz Iehans diront aux hauour encorus ou sostenuz pour le deffault et lesquelx dix souls censauls dannuel et perpetuel rente ensemble la dite poyne nous assetons et assignons au dit Iehan et a ses hoirs generalement sus touz nos bien mobles et nonmobles presenz et aduenir et especiaulement ie la dite Girarde dou leux dou consentement et de lauctoritey de moy Iean Girarde dessus dit sus douhes pièces de uigne essises ou finaige de Marcennay en montaigne li une est assise ou lieu que lon dit en rosex delez la uigne Constenot fils Iehanin au Iullet dune part et la uigne Uienot Gorgot dautre part et contient enuoiron douhes ourees li seconde est assise ou lieu que lon dit en la uaul decoste la uigne Esteuenin fil feu Oudot Morizot de Chenoues dune part et decoste la uigne maistre Pierre Dart dautre part Item sus une maison essise deuant le four de Mercenney decoste la maison Regnaut Uolant dune part et decoste la maison Morizot le colon dautre part Et uolons et nous consentons et chascuns de nous que pour chascun deffaut de la paie de la dicte cense li diz Iehans de Bretenere et suy hoirs puissient recouure de lour propre auctoritey esdictes maison et uigne yceles penre tenus et possideis en facent les fruz et issues lours iusques a ce que de tous les deffaulz de la dicte cense et des poynes nous et notres hoirs et haienz agree et satisfie au dit Iehan et a ses hoirs et a ce obligons nous et nos hoirs et renoncons en cest fait pour nous et pour nos hoirs par nos diz sairemenz a toutes exceptions raisons et allegations de droit et de fait qui contre la tenour de ces presentes lettres porrent estre dictes ou obities et au droit qui dit que generauls renonciations ne uault se li especiauls ni est mise et a tenir garder et acomplir les chouses dessus dictes nous uolons estre controinz auxi comme de chouse aduigie par la cour de monseignour le duc de Bourgoigne a la iuridicion de laquelle court nous submettons nous nos biens et nos hoirs En tesmoignage de laquel chouse nous hauons requis et obtenu le seaul de la dicte court estre mis en ces presentes lettres ce est fait en la presence de Iehan le lourant demorant a Dyion clerc adiutour de Hugonem Poissenot notaire de Dyion Iehan Fourrier de Chenoues et Iehan Lardeuoiset de Marcennay tesmoinz a ce appelez et requis en lan et mois dessus diz