Charter Document - 05350014

A tous ceux qui ces lettres uerront Guillaume Gormont garde de la preuoste de Paris salut sachent tuit que par deuant nous uindrent en iugement en leurs propres personne Jehan de Digon dit escharny huissier des requestes du palays royal et Jehanne Lestrocharde fame de feu Bonnot Lestrochant suer dicelui Jehan et recongnurent de leur bon gre eux auoir uendu octroie quictie et delessie desormez a tous iours et promis a garantir a leurs cous de touz troubles et empeschemens uers touz et contre touz a Guillemin le barbier de Fauergny pour lui pour ses hoirs et pour touz ceux qui de lui ont et auront cause ou temps auenir une maison si comme elle se comporte auec touz ses droits appartenences et appendences quelconques que les diz Jehan et Jeanne sa suer auoient pour nondinis de leur heritage si comme ilz disoient assise en la uille de Digon en la rue du temple tenent a la meson de la Cormiere dune part et dautre a la meson qui fu a le scoursier en la terre ou seigneurie du temple chargee de tel cens ou rente comme elle peut deuoir et est faite ceste uente pour le pris et la somme de uint et deux liures parisis que les diz uendeurs en confessent auoir eu et receu dudit achateur en bonne pecune nombree si comme ils disoient a sen tindrent pour bien paiez par deuant nous et parmi ce eux transporterent et delesserent ou dit achateur et en ses hoirs tout le droit et toute laction saisine et possession quelconque quil auoi eut et pouoient avoir en la meson par eux uendue comme dit est et dicelle se dessaisirent en notre main comme souueraine pour le Roy notre seigneur en uoulent et acordant que par lostencion de ces presentes ledit achateur en leur absence soit de la dicte meson mis en saisine et possession par les seigneurs trefonciers a qui il appartient Et promistrent yceux uendeurs par leurs foys et sermens baillez en notre main corporelement que contre ceste uente et quictance eux ne uenront ne uenir feront iamez a nul iour ou temps auenir et a rendre et paier touz cous et domages qui faiz soient par deffaut de leur dicte garantie ou autrement Sur lobligation de touz leurs biens et de leurs hoirs meubles et imeubles presens et auenir a iustice par toutes iustices ou ils soient trouuez pour ces lettres du tout enteriner esquelles nous en tesmoing de ce auons mis le scel de la preuoste de Paris lan de grace MCCC quarante et deux le lundi XXIX iour du moys de iullet