Charter Document - 05350009

En nom de nostre Seigneur amen En lan de lincarnacion dicelui courrant mil trois cenz quarante et hum ou mois dahost nous freres Poinz humbles abbes dou monastere de saint Estienne de Dyion et tous li conuenz de cest meisme lue au son de la cloiche ensint comil est de costume pour ce personelmant estaubliz et Auduez li Gandelez et Preinz de Marcennay ou bois demoranz a Hahuit pour aux et comme procureours et en nom de procureours des habitanz de la ville dahuit hommes des diz religieux et dou dit monastere si comme il appert pour une procuracon saalee dou seaul dou dit abbey de la quelle la tenours est cy desouz escripte dune part et je Eudes de Saulx sires de Ventoux cheualiers dautre facons sauoir a touz que comme descors fust ou pehut estre entre nous les dites parties sur ce que je li diz sires de Ventoux les diz religieux et habitanz empoichoye pasturer lour bestes es reuenues et coupeis de mes bois de Ventoux es quelx bois li diz religieux et habitanz disoient aux hauoir droit de pasturer lour bestes en quelque ils fussient pour titre de lettres des quelles la tenours sansuet [] Et pour ce que descors ne contens ne soit de ce en auant et ne puisse estre entre nous les dictes parties sur le pasturaige des diz bois accourdez est entre nous les dictes parties sur le pasturaige des diz bois par bien de paiz moenanz prodommes en la manere qui sansuet Premerement que li dit religioux et li diz habitans Dahuit se tenront de pasturer et faire pasturer lour bestes aumailles es coupeiz de mes bois de Ventoux iusques a ce que trois fuelles soient cheoites des diz bois tant soulement cest asauoir a la feste de la natiuitey mesme apres ce que la tierce fuelle hi haura estey Item garderont li dits religieux et habitanz lour bestes menues laine pourtanz de pasturer es diz coupeis iusques a ce que douhes fuelles hi soient hahues et iusques a la feste de la natiuitey nostre seignour comme dessus et non plus soul es diz religioux et habitanz Dahuit que se les bestes de moy le diz soigneur de Ventoux ou de mes successours soignours de Ventoux ou des diz bois ou les bestes de mes hommes de Ventoux ne gardoient les diz coupeiz en la manere dessus dicte et dehue li dicts religioux et habitanz Dahuit ne lour bestes ne seront tenuz dou garder et sur ce cest a sauoir se ie ou my successours et my dits hommes de Ventoux garderons de noz dictes bestes les diz coupeiz ou non Je uel que li forestiers des bois Dahuit des diz religioux ou trois prodomes Dahuit de bone fame en soient crehuz et que se li diz forestiers Dahuit ou li miens hi trouuoit aucun de mes maignies ou de mes hommes ie leuera lamande de celuy que li diz forestiers Dahuit hi trouuera et me rapourtera et en sera crehuz ycelz forestiers et delamande que ie en leuera Ie deura dix huit deniers aleglise Dahuit et lampooichement quiest mis ou chemin ancien pour le quel lon soloit mener les bestes dois le bois abreuer a la riuere se empooichemanz hi est mis puis uint anz cay ie le fera oster et est asavoir que ie ne pourra pas mettre touz mes diz bois en coupeiz ne en deffens en hum meisme temps maz laissera touz iours les douhes pars dictes en uaine pasture pour les bestes aumailles et menues laine pourtanz et pour les cheuaulx des diz religioux et habitanz Dahuit et seront li diz bois deuisiez en trois parties par tele maniere que bestes pourront entrer senz dommaige en chascune des parties au temps que le sera en uaine pasture a fin que ie ne puisse mettre ne faire mettre en coupeiz ne en deffens que lune partie apres lautre et que touz iours demorient les douhes pars des diz bois et hi pastureront senz contredit Item li cheuaulx des diz religioux et habitanz Dahuit yront et pastureront es diz bois la premere fuelle cheoite des diz bois cest asauoir ala feste de la natiuitey mes apres ce que la premere fuelle hi haura estey en quelquez estat que li diz bois soient dois enqui en auant ce est asauoir li dits habitans pour paant la redeuance contenue es lettres dessus dictes et pour ce que li dicts pasturages ne descroisce Ie my hoir ou successours ce quest orandroit en bois ne pourrons mettre en tout ne en partie en curtiuage de bles ne de uignes Et est asauoir que se li dits habitanz Dahuit ou aucuns daux estoient trouez pasturant a garde faite senz fraude et senz barat es diz coupeiz contre ce qui est dessus dit chascum pastours des bestes qui seront trouees pasturant paera au dit soignour de Ventoux trois soulx six deniers damande monoye adonques courrent ou duchie de Bourgoigne saul es diz habitanz que se en hum tropel de bestes nauoit plus de six uins bestes combien quil hahut plus pastours ou dit tropel tuit li pastours ne paeroyent que une amande et se plus en hi hauoit chascuns pastours paeroit une amande au dit soignour de Ventoux Item est encour acourdey que ie li diz sires de Ventoux my hoir ou successours soignours dou dit bois ne pourrons houoir es diz bois que doux forestiers li quelx forestiers ou li huns daux et nuls autres pourront prenre et gaigier ou dit bois dehuement et ne prenront mie les bestes des diz religieux et habitanz Dahuit se eles estient trouees pasturant pour mon ou par mes diz forestiers es dictes reuenues a garde faite mas il pourront gaigier les pastours se il hont gaiges qui uaillient la dicte amande et se li pastours ne hont gaiges qui uaillient lamande ou se il sen suet il prenront des bestes iusques a la ualour des dictes amandes et yces Ie ou my hoirs ou successours soignours des diz bois pourrons suigre des diz trois soulx six deniers damande et tuit li autres droiz que li dit religieux et habitanz Dahuit hont es diz bois et es finauges de Ventoux si commil sont contenuz es lettres dessus transcriptes les queles lettres et toutes les choses contenues en yceles et ou transcriptes dessus escriptes Ie confesse estre uerites demorent saulx es diz religieux et habitanz Dahuit lesquels acors dessus diz et toutes les choses dessus dictes et une chascune pour soy ensint comme eles sont dessus deuisies Nous les dictes parties et chascune de nous es noms que dessus promectons li une partie a lautre cest asauoir nous li diz abbes et couuenz de Sainct Estiene dessus dit en bone foy par nous et nos successours et souz lobligation des biens temporels dou dit monastere et nous li dessus nommes procureurs des diz habitanz Dahuit tant en nom de nous comme en nom de procureurs des diz habitanz pour nous et nos hoirs et les hoirs ou successours des diz habitanz par nos sarremanz donez corporelment sur sains euangiles de Dieu tant en noz ames comme es ames des diz habitanz et souz lobligation de nos biens et des biens des diz habitanz E ie li diz sires de Ventoux pour moy et pour mes hoirs ou successours soignours de Ventoux par mon sarrement doney corporelment sur sains euangiles de Dieu et souz lobligation de touz mes biens tenir garder et acomplir de point en point senz riens corrumpre ne uenir encontre par nous ou par autre taisiblement ou en appert Et quant a tenir garder et accomplir les choses dessus dictes a une chascune pour soy nous les dictes parties et chascune de nous es noms que dessus uolons estre controintes auxi comme de chose adiugie par la court de moseignour le duc de Bourgoigne a la iuridiction de la quele court quant a ce nous es noms que dessus submectons cest asauoir nous li diz abbes et couuenz nous et noz successours nous li dit procureurs des diz habitanz submectons nous et les diz habitanz et nos hoirs ou successours et ie li diz sires de Ventoux submet moy et mes hoirs En tesmoignage des quelx choses nous les dictes parties et chascune de nous es noms que dessus hauons requis et obtenu le seaul de la dicte court estre mis en ces lettres et es semblaubles triplees de mot a mot Ce est la tenours de la procuracion dessus dicte Nous freres Poncarz humbles abbes dou monastere de saint Estiene de Dyion facons sauoir a touz que en la presence de nostre ame chapelain Bertrant Dostum curie de Chanceaulx auquel quant ace et a plus grant chose nous adioutons foy plenere pour ce en lor propres persones estaubliz Estienes diz berniers Jehan li granpez Andriez Denisoz Villemoz Rebillarz Mathey dauteuille Michiez dauteuille Jehans filz sire Arnoul Jehans filz au baulet Raoulanz de Uentoux Jehanz filz Jacot au maistre Perrenoz li beachoux Robers li cornuz Perrenoz Ouderamer Perreaux filz au Uenticet Perrenoz filz Jehan Cognon Jacoz Bounex Amioz ses freres Marienoz fille Garnier Lalement Aubrioz de Chaignoot Auberz Rebillars Monins Rucheranz Lamberz de Potangey Auberz filz Monet Delor Jehanz Cadoz Jehan Uarnex Auberz Barchex Hugues Chenilloz Bertheaux Rabiganz Monoz li bouous Ondoz de Marcennay Jehanz li groetez Morisoz li coifferez Jacoz Micheloz Jehan filz au Toillie Jehannoz li bonoux Perronoz Machorz Perreaux filz Jehan Humbert Hugues Dagoneaux Huguenioz Andrie Jehanz Moichoz Perreaux li roux Jehanz Liesuiriez Hugues Moichoz Aubertine Teneuot Humberz filz Gigot Richarz li beuffos Estienes filz Jehan Alaison Bartholomus li tixeranz Villemoz li pichez Vienins genres Monin au Rauer Jehanz filz Perrenot Chauuot Jehanete femme Aubert de la borde Beneoiz de Marcennay Bartholomete qui fut femme Perrenot Larconcey Jehanete qui fut femme Humbert Larconcey Jehanz Oudemers Jehans Cognome Hugues Grouote Jehanz Dauraoul Hugues Chaudeaux Perrenoz filz Costiot Estienes filz Raoul de la borde Beloz fille Jehannot Dauraoul Jehanete femme Humblot de la borde Marie fille Aubert de la borde Mariote qui fut femme a la Lambaut Hugote fille Jacot tout le monde Jehanoz filz Cheurot Jacoz li vellerandoz Jacoz Moingerons Perrenoz filz au Miallet Jacoz Moichoz Perreaux li pichez Reenete femme au quoy Guioz tartilloz Jehanz Garnex Michiez li plouuerez Lamberz filz Estienne au monoier Perrenoz diz li miallez Renaux Destaules Jehanoz dou pois Andrioz filz su emboisse Huguenoz Fluroz Demoingeoz Grilleoz Jacoz de Dole Monins li quoy et Bertheaux fils Jehanot Besancon notre hommes et habitanz de la uile Dahuit de nostre licence autorite et consentement tant conioint comme diuiesement hont fait estaubli et ordeney lour procurours generaux et messaiges especiaux Andrie dit le gaudelet Odot Chandeaul Odot fils Thibaut Cognome Andrie Gigot Perrin de Marcennay Villemot Moingion Aubert dit Rebillart et Jehanz Moreaul Dahuit porteours de ces lettres ensamble et les doux de lour senz moinz en tel manere que la condition des occupanz ne soit moillour et que ce qui sera encommancie par les uns puisse estre parsugny par les autres es causes quil hont ou entandent a auoir contre noble homme monsignour Eude soignour de Ventoux cheualier tant par raison des droiz et usaiges quil hont puent et doiuent hauoir de faire pasturer lour bestes grosses et menues es bois et es finaiges de Ventoux comme autremant et auxi en toutes autres causes quil pourrient hauoir contre toutes autres personnes par cause de uaine pasture et tant par lor comme contre lour par deuant touz iuges tant deglise comme seculers quelx quil soient et par quelquez non quel soient appalez Et hont doney li diz habitanz tant coioint comme diuiseement a lor deuant diz procurours ensamble et es doux daux au moins plain pouoir et comandement especiaul de demander par lour de lor et chascun de lour deffendre quant es causes quil hont ou pourrient hauoir sur les deuant dictes choses de proposer de repliquer de baillie libelle de plait entammer sur yceles causes de proposer toutes exceptions dilatoires declinatoires et perhemptoires de iurer en lour ames de chalonge et de ueritey tant sur le principaul comme sur les accessoires et les despans et de faire touz autres sairemanz que sont requis es causes de produre tesmoinz et mettre lettres et instrumanz en manere de prouue de ueoir iurer les tesmoinz qui serient amenez contre aux de dire contre lour et lour diz et contre les lettres et instrumanz qui serient mis et mostrez contre lour en manere de pariure de conclure et renoncie de oir sentences interlocutoires et diffinitiues dicelles appeler et de touz autres griefs de lour appeaulx persuigre de demander despans dou ueoir taxer et adiuger et dou reciuoir de faire compromis sur les dictes causes et chascune diceles dou dit compromis ualler en la manere qui bon lour samblera dacorder transiger composer et convenir sur icelles causes et chascune diceles de demander et requerir la recreance des bestes biens et chatelx qui serient prises et detenues ou pris et detenus par quelque persone ou par quelque iustice que ce fust des diz habitanz ou daucuns de lour et de ploigier la recreance des dictes bestes biens et chatelx se mesters est et de faire toutes autres et singuleres choses qui touchent ou porrient touchier les choses deuant dictes quil serient ou pourrient faire sil estient presenz Et hons promis en bone foy et sur lobligation de touz lour biens au dit notre chapelain en lieu de nous stipulant et reciuant au profit de touz a cuy il appartient et pourra appartenir ou temps et auenir hauoir fest et estaible et tenir fermement tout ce qui par lour diz procurours ou les doux de lor au moins sera fait et procurie sur les deuant dictes choses et chascune diceles et de paier laduige se mesters est Ou tesmoin de laquele chose a la relation de notre dit chapelain auquel quant a ce et en plus grant chose nous adioutons foy plenere a la requeste des diz habitanz noz hommes nous hauons fait mettre notre scel en ces presentes lettres Ce fut fait Ahuit en la presence de Perrenot Mouseron maire de la dicte uile Perrenot le potier Dasneres demorant à Dyion Guiot fils Thiebaut Posteaul dou dit lieu Garnier dit Galiot de Darrois et Oudot dit largnelot de Messigney tesmoinz a ce appalez et especiaulement requis le diemoinge apres la feste de lascencion nostre Seignour lan de grace mil trois cenz quarante et hum Ce est fait en la presence de Huguenin Poissenot de Dyion clerc notaire dou dit lieu pour monseignour le duc de Bourgogne de discrete persone maistre Jehan Pynot de Thorey clerc sauge de droit demorant a Dyion et de Amiot de Lille escuier tesmoinz a ce appalez et requis le uenredi iour de la feste de saint Bartholomet apostre dou contrant de moy Eude de Saulx soignor de Ventoux dessus dit dou contrant de nous abbey et couuent de saint Estiene et de nous procurours dessus diz en nom de procurours des habitanz Dahuit dessus diz Ce est fait en la presence dou dit notaire de monseignour Bertrant curie de Chanceaulx et de Martin de Molin en Auuerne demorant ou monastere de saint Estiene dessus dit tesmoinz a ce appalez et requis le sambadi ensuigant la dicte feste de saint Bartholomet en lan et ou mois dessus diz