Charter Document - 05350006

Au nom de nostre soignour amen En lan de lincarnation dyceluy mil trois cenz quarante et ung ou mois dauril apres pasques Ie Pierres de Fauerney cheualiers non decehuz et non contrainz mas de mon espoyne grey et bien pouruehuz fais sauoir a touz Que comme Iehanz li Piquardez de Tasnay escuyers fuet tenuz et obligiez de ancienetey a religiouses persones labbey et le couuent de saint Esthiene de Dyion en doues amines et ung bichot de froment de annuel et perpetuel rante Laquelle rante ly deuantier et predecessour dou dit Iehan donerent et outroyerent a la dicte eglise de saint Esthiene et en hayent obligie tant ly diz Iehanz comme suy deuantier a la dicte eglise et es religioux dycelle en lettres seellees dou seaul de la court monsoignour lou duc de Bourgoigne tout ceu que ly diz Iehanz et suy deuantier auyent en la ville et ou finaige de Tasnay Et especialment les chouses cy apres escriptes cest asauoir lou mex es enfanz au Racleul lou mex Ioffroy Racleul le mex Botebortin le mex es enfanz a la Bouere le mex au Mercier le mex au fil Aruisenet le mex Lambelot au Racleul le mex a la Uaichere Item dix iournaux de terre seanz ou chemin croisie Item quatre iournauls de terre seanz dessus le prez Item quatre iournauls de terre seanz au poisot et dix iournauls de terre seanz es foillies Item et cum ly diz Iehanz Piquardez fuet tenuz et obligiez es diz religioux pour les erraiges de la dicte rante de plusours annees en une grant quantitey de blef Et pour cause dou dit blef dehu es diz religioux pour les erraiges de plusours annees Item et pour plusours summes dargent es quex ly diz Iehanz estoit tenuz et obligiez a plusours iuys et ly quel debte des iuhiz sunt aduenu et escheoit a monsoignour le duc et y estoit obligiez en lettres seellees du seaul de la court dou dit monsoignour le duc Et par la vertuz des executions traites sus ycelles lettres ly preuoz de Dyion moit uendu touz les biens que ly diz Iehanz Piquardez auoit et tenoit au temps quil uiuoit en la dicte uille de Tasnay ou finaige et es appartenantes dycelle tant en hommes tailles censiues redeuances terres prez comme en autres chouses quexquelles soyent pour le pris de quatre uinz liures de tournois des quex iay paye uint liures es diz religioux qui lour estoyent dehues pour cause des erraiges de la dicte rante dou temps passey de plusours annees si cum dessus est Et les autres soixante liures iay paye au dit monsoignour lou duc pour les debtes que ly diz Iehanz deuait es iuyz qui sunt eschoit au dit monsoignour le duc si cum dessus est dit Je adecertes cognois et confesse pour moy et pour mes hoirs moy estre tenu et obligie es diz religioux et a lour successours es dictes doues amines et ung bichot de froment de annuel et perpetuel rante pour cause et pour raison des diz heretaiges que ly diz Iehans Piquardez tenoit en la uille et ou finaige de Tasnay les quex ie tiens et hay aquis si cum dessus est dit Et uuil et me consent que ycil heretaige soyent et demorent chargie de la dicte rante en la forme et en la meniere quil estoyent au temps que ly diz Iehanz les tenoit et possidoit Et uuil encour et me consent que ly dit religioux puissent recourre et assigner es chouses et heretaiges dessus diz au deffaut de paye de la dicte rante et ycelles puissent tenir et utiffruer iusques a ceu quil soyent satisfie a ploin de la dicte rante Laquelle rante ie promet par mon sairement randre et payer es diz religioux perpetuelment la dicte rante chascun an a la feste de touz sainz et a ceu ie oblige mes hoirs et mes successours Et toutes les chouses dessus dictes et une chascune pour soy ie promet par mon sairement tenir fermement es diz religioux senz gemais uenir alancontre par moy ne par autre ne consentir que lon y uaigne et a ceu ie oblige moy mes hoirs et touz mes biens Et renunce par mon dit sairement en cest fait a toutes exceptions et raisons de fait et de droit a condition senz cause a toutes graces et a touz preuileges empetrez et a empetrez a tout droit escript et non escript et au droit qui dit que generauls ne uault Et quant a toutes ces chouses tenir faire et accomplir ie uuil estre controinz par la court monsoignour lou duc de Bourgoigne auxi comme de chouse adiugie a la iuridicion de la quel ie submet quant a ceu moy mes hoirs et touz mes biens En tesmoin de la quel chouse iay requis lou seaul de la dicte court estre mis en ces lettres Cest fait en la presence de Guiot Cossenot de Flurey clerc coadiutour Huguenin Poissenot tabellion de Dyion de maistre Iehan de Bretenere clerc et de Guillermin de Cutigney escuyer tesmoins a ceu especialment appellez et requis lan et lou mois dessus diz