Charter Document - 05350004

A touz ceux qui verront et ouront ces presentes lettres Nous Girars de Roichefort chevaliers baillifs dou dygenois facons sauoir que iay pieca li maiours li escheuiz et li commune de Dyion ferrent appeler pour deuant nous les religioux abbey et conuent de saint Estiene dou dit leu Et baillerent contre les diz religioux une demande par escript en la quelle il afferment aux estre saisiz par plusours annees et par les darreres de mectre et faire tenir et garder le banc de non venoingier es vignes Dahuit et dou finaige chascun an et que en la dicte saisine li diz religioux les empoichent a tort et senz cause et de noueaul pour quoy requerent es diz religioux que dou dit empoichement cessessient et a ce fussent condempnez et controinz pour nous à la quelle demande furent baillies de par le procurour des diz religioux a une certayne iournee a ce assignee de nous es dictes parties et dou consantemant des [des] procurours dycelles parties responces par escript en iugemant pour deuant nous presenz les procurours des diz mayour escheuiz et commune es quelles est contenuz entre plusours autres choses que li diz religioux sont et hont esthey saisiz par plusours annees et pour les darreres dou droit de mectre et faire tenir et garder le dit banc de venoingier es vignes Dahuit et dou finaige et que en la dicte saisine les troblent et empoichent indehuement et de noueaul les diz mayours escheuiz et commune pour quoy requerent es diz mayour escheuiz et commune que des diz troble et empoichement cessient et a nous que a ce les condempnons et condempnez controignons et met en ny la saisine alleguee de par les diz mayour escheuiz et commune ce ensint fait uindrent et comparurent en iugemant pour deuant maistre Jehan de Houdri adonc tenent nostre siege cest assauoir le samadi apres la quinzene des bordes lan mil trois cenz trante et nuef li procurour des diz mayour escheuiz et commune contre le procurour des diz religioux disanz que a la dicte iournee estoit iournee assis au dit procurour des diz religioux de respondre a lour demande a la quelle il hauoit iay responduy sy comme dit est et pour ce que li procurour des diz religioux ne uint ne comparut donnay li diz maistre Jehans deffaut es procurour de la dicte ville contre le procurour des diz religioux pour le quel deffaut et diserent et proposerent a une autre certayne iournee a la quelle il furent en iugemant pour deuant nous quil hauient gaignie la possession dou dit banc et y celle lour deuiens adiugier pour cause dou dit deffaut et sur ce nous requerent droit le procureur des diz religieux disant au contraire pour plusours raisons contenues en hum proces fait sur ceu pour deuant nous entre les dictes parties le dit iour les quelles raisons mies ensemble tout ce que chascune partie uolt dire et proposer nous lour assignames iour a oir droit sauoir mont se la dicte ville hauoit gaignie on non la saisine dou dit banc pour cause dou dit deffaut non obstant les raisons proposees de la partie aduerse et plusours iournees sur ce assignees a oir droit Et darreremant à nostre assise de Dyion qui commenca le uenredi apres le dymainche que lon chante letare Iherusalem passey noualement au quel iour les procureurs des dictes parties se conparurent en iugemant pour deuant nous et nous requerient que nous lour deissienz le dit droit et nous la dicte iournee doir droit lour meymes au sambadi suignent au quel sambadi les diz procureurs des dictes parties estanz en iugemant pour deuant nous et nous requeranz a grant instance que nous lour deissiens le dit droit en non dou pere et dou fil et dou saint esperit dou consoil de prodommes et saiges usez en ce Dieu eanz deuant les eaux prononcons et a droit par nostre sentence intellocutoire que li procureur de la dicte uille nont pas gaignie la possession dou banc deuant dit selonc les raisons proposees de la partie aduerse et deuent proceder aultre en la cause dou dit banc et les condempnons es despens dou dit procureur des diz religieux faiz leaulmant par ceste cause des quelx nous reseruons a nous la taxation En tesmoignaige de la quel chose nous hauons mis nostre grant seaul en ces presentes lettres faites et donnees le samadi dessus dit lan de grace mil trois cenz et quarante