Charter Document - 05343068

Par la vertu des quelles lectres je Jehans de Richebourt sergens messire le Roy dessus dit tout le vandaige que je hauois fait par la vertu des lectres des quelles cestes dessus font mention rappele et met au neyant a monseigneur Jehan Dauuelers cheualier Guilleme son frere et touz autres a cuy la chouse puet appartenir remet et restaubli au droit a la saisine et a l'estat que il hauet et estient es chouses vandues par la cause dessus dite au temps que je les pris par la vertu des lectres dou Roy messire des quelles ces presentes font mention ce est a sauoir sus monseignour Jehan d'Auuilers la moitié d'Auuilers et sus Guilleme et ses autres freres et suers vint et cint liures de terre a Argilley et vint et cint a Auuilers Et deffan a Robin de Moncons et a Huguenin et a Guiot Rigaut et a chascun d'aux li quel hauient achetey les chouses dessus dites que de cy en auant ne s'an contreuienient en riens et se riens en ont recehu qu'il le randient audit monseignour Jehan et Guilleme et aus autres dessus diz a chascun por tant admil li appartient et lour deffan encor que dou pres qu'il hauient promis por les chouses dessus dites qu'il n'an paient riens et ce je Jehans dessus diz faiz a sauoir a touz que ge les chouses dictes hay faites par la vertu des dictes lettres nostre maitre le baillif de Sens et pour acomplir le mandement contenu en ycelles Ou tesmoignaige de laquel chouse je Jehanz de Richebourt dessus diz hay mis seel en ces presentes lettres Doney a Dyion le venredi voille de Saint Bartholomier apostre l'an de grace mil CCC trente et hun