Charter Document - 05341050

Quum appellationis remedium in fauorem oppressorum et opprimi sperantium sit a sanctissimis patribus introductum vt apud falsos et temerarios processus iudicum valeat subuerini et inique sententie contra iuris tenorem prolate habeant retractari Et vos dominus Amisius de Aurelianis decanus ecclesie parisiensis subdelegatus vt dicitur a reuerendo in Christo patre ac domino domino Hugone parisiensi episcopo qui se gerit pro iudice seu conseruatore priuilegiorum fratribus ordinis predicatorum in prouintia Francie a sede apostolica indultorum vna cum aliis collegis cum illa clausula quatinus vos vel duo aut vnus vestrum per vos vel per alium et cum feceritis ad instantiam fratris Symonis de Ycio procuratoris et procuratorio nomine religiosorum virorum prioris et conuentus fratrum predicti ordinis dyuionensis actorum dominum Guillermum de Balneolis rectorem ecclesie sancti Michaelis dyuionensis dominum Henricum Lalemant dominum Othonem de Atheys dominum Johannem de Courbeton dominum Johannem de Buxo dominum Hugonem de Arcons dominum Johannem Gaillart rectorem ecclesie beate Marie dyuionensis reos virtute dicte conseruationis et commissionis vobis facte coram nobis conueniri et procurator ipsorum citatorum nomine procuratorio ipsorum et pro ipsis cum protestationibus de non consentiendo in vos nisi quatenus de iure tenebantur coram vobis proposuit quod per ea que ex parte dictorum prioris et conuentus coram vobis erant exhibita non erat vobis aliqualiter iurisdicio attributa quoniam procurator dictorum religiosorum predictus ad fundandam iurisdicionem vestram solummodo exhibebat quoddam rescriptum apostolicum domini Benedicti pape vndecimi per quod domino parisiensi episcopo et eius collegis committi videbatur quatinus quamdam constitutionem ab ipso domino Benedicto editam que [que] incipiebat inter cunctas faceret in omnibus suis capitulis firmiter obseruari sed predicta constitutio per felicis recordationis dominum Clementem papam quintum approbante sacro generali concilio viennensi erat et est penitus reuocata et omnino cassata prout apparet per decretalem dicti domini Clementis que incipit dudum quare dicebat procurator eorum nomine procuratorio ipsorum et pro ipsis quod iurisdicio data ad eam exequendam seu conseruandam erat penitus annullata et quod dicto parisiensi episcopo et suis collegis non competit aliqua iurisdicio seu conseruacio que sibi fuerat per dictam constitutionem penitus annullatam et reuocatam attributa Item proponebat et dicebat procurator dictorum citatorum nomine procuratorio ipsorum et pro ipsis quod si procurator dictorum religiosorum diceret quod virtute cuiusdam clausule generalis que est in fine dicti rescripti in qua dicitur quod eadem iurisdicio seu conseruatio super aliis privilegiis dictorum fratrum est dicto domino parisiensi episcopo et eius collegis attributa quod vos possetis cognoscere quod nullatenus virtute dicte clausule generalis viso modo agendi debebatis cognoscere quia in dicto rescripto apostolico sit mentio specialis de priuilegiis datis fratribus super predicationibus faciendis libera sepultura et confessionibus audiendis et dicta clausula generalis non extenditur ad priuilegia de quibus specialiter cautum est si que dicti fratres habent sed ad alia priuilegia tantum et supposito siue preiudicato quod extenderetur ad alia priuilegia attamen dicebat et proponebat dictus procurator dictorum citatorum quod per dictum rescriptum apostolicum virtute cuius intebatur agere procurator dictorum religiosorum coram vobis quod iuridicis vestra non erat sufficienter fundata immo erat necessarium quod exhiberentur sua priuilegia quia vos non habetis nec habere potestis iuridicionem virtute dicti rescripti nisi super priuilegia sed de suis priuilegiis nunquam apparuit coram vobis nec sibi facta fuit copia quare iuridicio vestra si quam habebatis non erat sufficienter fundata Preterea predictus procurator dictorum citatorum proponebat quod peticiones dictorum religiosorum non procedebant et quod ipse non erant admittende tum quia in dictis petitionibus concluditur directe ad restitucionem rerum funeralium quod fieri non deberet sed deberet concludi alternatiue videlicet ad restitucionem rerum funeralium si extarent supposito siue preiudicato quod coram vobis peti possent et si non extarent ad valorem seu extimacionem earumdem cum secundum iura non entis nulla est restitucio tamen quod in extimacione bona funeralia in dictis peticionibus petuntur super quibus rationibus dictorum religiosorum seu eorum procuratoris dies iouis post festum beati Mathei apostoli quod fuit anno domino millesimo trecentesimo viginti et octauo