Charter Document - 05340071

En nom de nostre Seignour amen En l'an de l'incarnacion d'iceli anl CCC trante et un ou mois de decembre c'est a sauoir le mardi apres la feste de saint Andrier nous frere Poincarz humbles abbes de l'eglise de Saint Estienne de Dyion et touz li couanz de ladite eglise de l'ordre de Saint Augustin de la dyocese de Laingres au son de la cloiche si comme il est de costume a lore de chapitre tenir por ce especialmant essamblez appelez sollempnemant touz ces qui sont a apeler et presant touz ces qui hont volu pehu et dehu estre d'une part et nous Humbers diz Arconcex et Richarz diz dou Poins homes et habitanz de la vile d'Ahuit procurours des autres homes et habitanz de la dite vile d'Ahuit d'autre part facons sauoir a touz ces qui verront ces presantes lectres que nous c'est a sauoir Nous li diz abbes et couanz en non de nous et de nostre dite eglise et nous li diz Humberz et Richarz en non de nous et en non de procurourz et comme procurourz des autres homes et habitanz de la dicte vile d'Ahuit et en non d'aux et pour aux Premeremant hahue sur les chouses ci desoupz escriptes pruehue deliberation et tratie diligent vehu et considere le profit euident de nous li diz abbei et couant et de nostre dite eglise et auxi de nous Humberz et Richarz deuant diz et des autres habitanz de ladite vile d'Ahuit sur les plaiz destorz et controuerses qui estient entre nous les dites parties acordons pacifions et transsigons en la meniere qui s'ansuit Premeremant sur ce que nous li diz abbes et couant affermiens les diz homes et habitanz d'Ahuit et lor biens ladite vile d'Ahuit et les heritaiges des diz homes et habitanz assis ou finaige d'Ahuit estre taillaubles et esploitauble a nous et a nostre dite eglise de haut et de bas les homes et habitanz d'Ahuit disanz au contraire et affermanz que il estoient franz de toutes tailles por cent liures digenois les queles il deuoient chascun anz a nous et a nostre eglise por taille et non plus Nous les dites parties es nons que desus por bien de pais voillons acordons et estaublisons que nous Humberz et Richarz et li autres habitanz d'Ahuit qui sont et seront por le tamps paierons chascun an es diz abbei et couant dedeanz la feste de saint Remy por taille et en non de taille sex vinz liures de bons digenois fors en bons digenois ou autre monoie a la natour de bons digenois selon le pois a la loy et le cours que bons digenois furent faiz et estaubliz et plus ne porrons nous li diz abbes et couant en non de taille et por taille leuer des diz habitanz Et nam porrons nuns frainchir excepte tant solemant celuy qui seray maires et celui qui seray sergenz de la dite vile d'Ahuit li quex por le tamps qu'il seront ou seruise de la marie et de la sergenterie d'Ahuit ne contribueront es dites sex vinz liures mas les paieront li autres habitanz de la dite vile d'Ahuit entieremant Et por les dites sex vinz liures de tailles estre sauues a touz iours mais es diz abbes et couant et lour dite eglise nous li diz procurours en non que dessus voillons confessons ordenons et estaublissons touz les biens mobles de nous et des diz habitanz en queque leu et en queque partie que ce soient et touz les heritaiges que nous et li diz habitanz ou chascuns d'aux hauont ou haurons hont ou hauront ou tamps a auenir en la vile et ou finaige d'Ahuit estre et demorer taillaubles et obligiez es diz religioux et a lor sucessours et lor dite eglise tanques a la some des dites sex vinz liures digenois de taille por chascun anz en tel meniere que quicunques tanray des diz heritaiges de queque luy et en queque leu qu'il soit ou demoroit paiera por les diz heritaiges ce qui li seray getie et impose de la dite taille por quatre prodomes qui seront chascun anz esliz dedeanz la feste sainz Bartholomier c'est a sauoir doux de par nous li diz religieux ou de nostre commandemant et doux de par li diz habitanz Et ou cas que nous les diz religioux ou nostre commandemanz ou les diz habitanz n'auoient esliz les doux prodomes dedeanz la dite feste de sainz Bartholomier la partie qui seray diligenz les porray eslire tous quatre quant a celle foiz et controindrons nous li diz abbes et ciz qui sera abbes de la dite eglise por le temps les diz esliz a panre la charge et a faire le giez de ladite taille et feronz li diz quatre prodomes esliz en la main de nous les diz religioux ou de nostre commandemant sairemant de getier et de imposer la dite taille sur chascun leaumement a lor auis et de ce qui sera getiez por les diz quatre prodomes iuriez acordemant ne le porra nuns plaindre Et ou cas qu'il y auroit descort l'abbes de la dite eglise qui sera por le temps ou les commandemanz l'acordera raisonaublemant a son auis Et sera getie ladite taille chascun anz a la dite feste sainz Bartholomier ou enuiron et porrons nous li diz religioux dois adonc que la dite taille sera getie saisir les biens et les fruz de ces de cuy nous nous doterons qu'il ne les transportient autre part mas nous n'an porrons nuns vandre ne esploitier iusques a la dite feste saint Remi Et serons tenuz faire recreanee sanz difficultei a ces qui ploigeront paier dedeanz la dite feste saint Remi ce qui lour sera getiez et impose de la dite taille Et se aucuns qui ne seront des diz habitanz d'Ahuit tenient des diz heritaiges et ne paient dedans la dite feste sainz Remi ce qui lor sera getie et impose de la dite taille il paieront sept soulz d'amande et se il celloient de paier iusques a la feste de la Chandelouse apres en suyant nous li diz religioux porrons panre lour diz heritaiges et vendre ou loer a autre por la dite taille et por l'amande li quelx deuqui en auant paieroit la dite taille si cum dessus est dit sauf tant que ciz qui aurai deffailli si cum dessus est dit vient paier dedanz ant anz apres les tailles et les amandes il porrai recourer son heritaige ensine vuit de fruit comme il l'aurai laissiez Et tant comme ciz qui ne seront des diz habitanz tenanz des diz heritaiges paieront ou autres por aux ce qui lor serai impose de la dite taille dedanz le terme desus dit por raison des diz heritaiges qu'il tenront nous li diz religioux ne porrons ne deurons mettre la main por la cause desus dite Derechief nous li diz procurours en non que desus confessons et acordons que nous li diz habitanz qui sont a et qui seront ou tamps a auenir et chascuns d'aux qui tiendrai feu en la dite ville d'Ahuit doit et est tenuz de paier es diz religioux chascun anz a la feste de touz sainz vn bichot d'auoine d'annuel rante que l'on appale sauuemant et por chascun jornaul de terre assis ou dit finaige d'Ahuit exceptez ces que l'on appale les aleux demi quartaul de blef pormi conseaul et auoine a la mesure de Dyion de annuel rante que l'on appale ranterre et dou plux le plux et dou moins le moins selonc la quantite de la terre et a ce sont tenues et obligiees les dites terres es diz religioux Derechief nous li diz procurours en non que dessus quitons et remettons es diz religioux pormi c'est present acort le droit de penre liens se point en hont li diz habitanz es bois d'Ahuit Et nous li diz religioux ou nostre commandemanz es diz habitanz danrons et baillerons raortes tant et mestiers lor sorai por lour charrues Et est a sauoir que pormi cest acort est sauf es diz habitanz li elections des messiers et des vigniers dou finaige d'Ahuit et tous bons usaiges ou il hont este d'ancienetey et sont sauues auxi a nous les diz religioux les coruees des charrues de la dite ville d'Ahuit et les coruees de sacler et de moissener qui sont celles c'est a sauoir de chascune charrue des diz habitanz d'Ahuit chascun anz un jornaul de soure vn jorneaul de vaain et un jorneaul de tremis Item de moissener li hons et li femme mariez qui tainent feu de chascune persone vne coruee Item dou sacler de chascun feu vne persone et es dites coruees facent nous li diz religioux deuons doner es diz habitanz facent les dites coruees dou pain doues foiz le iour Et sauf encor a nous les diz religioux la cense des uignes la iustice le droit que nostres sergenz du dit leu hai a costume de panre quant aucuns acquiert maison vigne ou terre en la dite ville et ou finaige d'Ahuit ensamble toutes nous autres droitures Et pormi c'est present acort touz despanz missions et amandes sur le commun des diz habitanz et sur nous les diz religioux ou tamps passey seront quites d'une partie et d'autre Et ne porrons gemais nous li diz religioux ne li diz habitanz faire querele ne complainte au roy ne au duc ne autre part sauf a nous les diz religioux les arrages dou sauuement et de la ranterre que li diz habitanz nous doiuent por raison dou tamps passey Les quex acort pacificacion et transaction et toutes les autres chouses dessus dites et chascune d'icelles por la meniere que dessus sont dites et diuisees nous li religioux en non de nous et de nostre eglise por nous et por nos successours et nous li diz procurours en non de nous et por aux et lour hoirs et successours et cels qui hont et auront cause de nous et d'aux sur ce sumes tenuz et promettons c'est a sauoir nous li diz religioux en bone foy et sous le vou de nostre religion et souz l'obligation de touz les biens de nostre dite eglise et nous li diz procurours en non que desus par nos sairemanz donez corporelmant sur sainz euuangiles et sous l'obligacion de tous les biens de nous et des autres habitanz d'Ahuit desus diz tant mobles cum non mobles presanz et auenir c'est a sauoir chascune de nous les dites parties par tant comme a li es nons que dessus toiche et apertient tant conioinctement comme diuisement par stipulation ferme leaul et sollempnel garder tenir faire et accomplir et non contre venir ne consantir que autres y vaine en jugement ne deffors taisiblement ne expressement par fait ou par paroles par droit ou par costume ou par autre meniere quex quelle soit Et por plus grant fermetey et seurtey des chouses dessus dites nous Micheloz Cadoz Monias li Vauex Hugo Grenote Jaquoz Matoilloz Micheaux de Varranges Humberz li Arconcex Marienot qui fut femme Theuenot Au bertins les filz Jaquoz li maistres Huguenoz filz Flurot Melenote qui fut femme Perenin Tout le monde Garniers li Aulemanz Jehannoz et Villemoz Aulemanz freres Doonins qui fut femme Jehannot Besancon Raoux de la Borde Aubers de la Borde Jehans li Esuiriez Perrenoz Auxions Jehans filz Perreaul Grenote Andriers et Jaquoz anfanz au Vaillant Bone fille au Moine Mathex filx Durant Juhannote femme Humbeloz de la Borde Esteuenins filz au Peletey Renaux destaubles Jaquoz Moichoz Reynote li Baretee Renaux de Gemeaux Jaquoz Bouex Monins Bouex Aliote femme Hugo Bouer Perrenote qui fut femme Mathey dou Poins Jehannoz et Richarz ses anfanz Hugo Cheuuilloz Marions femme fue Garnier Noiroz Jehans Cadoz Prenoz li Buitheux Humberz Gigoz ses genres Andrier Gigot ses genres Nepnote qui fut fille Perrenoz Liachote et sa seurs Arambours qui fut femme Tartillot Michies li Plonez Guiot Tartilloz Jaquoz li Bouex Auberz Rebillars Monins Vintherans Jehan Varnex Rouse sa seur Mathelie qui fut femme Raoul Mangeron Mathex et Demoingeoz qui furent anfanz Perreaul Grillot Jehans Danrooul Ysebeaux Daute Ville Michies et Mathex ses anfanz Jehannote qui fut femme au Baulet Jaquoz li Villerandez Jehanz Charrelois Hugues Moichoz Aubrioz de Chaigneot Monoz Moichoz Esteuenote qui fut fille Martene Odelenote qui fut femme lou Vallot le Tixerant Garniers li Couex Lamberz de Poteingey Jacote niece Moingote Marienoz li Boussarde Villemoz Humberz Moingote qui fut femme Gaichot Roberz de Nuiz Jehanz Moreaux Hugues Chaudeaux Moingears fille Matherot Moingears femme au Daui Humberz li Coilliez Jehannote qui fut femme Cheurot Parisoz ses filz Bertheaux filz Rabigant Humberz filz au Daui Jehan Rincheraus Perrenoz li Maires et sa femme Beloz fille Changey Odoz et Guioz Chaudeaux Osannote qui fut femme Odot Lambin et Juhannote sa fille Jehans Oudemers Jehanz li Coiferez Morisoz filz au Coifferet Guiote fille au Coifferet Jehannoz filz au Bonon Hugues Andriers Andrioz ses genres Perreaux li Roux Guioz li Cornuz Lorete qui fut femme Jaquoz Tout le monde Andriers li Moniaz Costenoz li Tateruz Perrenoz Oudemer Jehanz Golloz Sebile qui fut femme Jehan Alaison Marguerite qui fut fille Gigot Raymont Jaquoz et Arambours enfanz Michelot Dammichel Villemoz Moingeons Andriers Denisoz Bertheaux li Esuiriez Jaquoz li Lois Doonins qui fut femme au Sutardet Marions fille Perreaul Michie Villemoz Rebillarz Marion qui fut femme Jaquot Berton Juhannote fille a Lallebaut Aruiers filz a la Mugnote Jehannoz de Sainz Thiebaut Jehans Cognoos Andrier Barroz Villemoz li Maistres Guarnierz li Bouex Jehanz fil a la Noire Perrenoz li Miarllez et Perrenoz ses filz Villemoz li Pichez Perreaux li Pichez Jehannote sa suer Jehannoz li Tixerans et Humbeloz ses filz Doonoz li Rousse de Marcennay tuit habitanz de la dite ville d'Ahuit por ce nommeemant dus en vs aiornez et especiaulmant essamblez presenz touz ces qui hont voluy dehu et pehu estre deuant l'eglise de la ville d'Ahuit le diemange apres la sainz Nicholas d'yuer a l'ore de la messe parroichaul de la dite eglise l'an et le mois dessuis dit c'est a sauoir chascun de nous desus nommez li vns apres l'autre singulerement appelez et nous tuit ansamble en communs nuns de nous dessus nommez contredisanz les diz acors transaction et toutes les autres chouses dessus dites et chascune d'icelles en la meniere et en la forme que desus sunt escriptes et deuisees cognoissons estre faites por nous et en nostre non et volons louons aggraons rattifions et promettons por nous et por nos hoirs et successours et ces qui hont ou auront sur ce cause de nous par nos sairemanz donez corporellement sus sainz euuangiles et souz l'obligation de touz nos biens mobles et non mobles presenz et a uenir faire tenir garder et acomplir sanz corrumpre et sanz auler encontre ne consentir que autres y vainent en jugemant ou dessors por droit ou por costume por fait ou por parole ou por quelque autre meniere que ce soit taisiblement ou en appert Et renuncons nous li diz religioux et procurours es nons que dessus et nous li habitanz dessus nommez por tant comme a vn chascun de nous toiche et apertient sous le vou et sairemant que dessus de certeinne science en ce fait a toute lesion decepcion ou circonuencion et errour de fait et de droit et a touz droit escript et non escript statut et costume locaul et generaul et a toutes autres exceptions raisons et allegacions de fait et de droit por les quex nous ou aucuns de nous porriens ou porroit aler ou dire encontre la tenour de ces presentes lectres ou por quoi les chouses dessus dites en tout ou en partie porrient estre adnulleez ou empeschies por quelque meniere que ce fut et especiaulemant au droit disant la generaul renunciation non valoir Et volons estre controinz c'est a sauoir nous li diz religioux nous et nous successours et nous li diz procurours nous en nostre non et les autres habitanz d'Ahuit por les quex nous sumes procurours et lor hoirs et successours et nous habitanz d'Ahuit dessus nommez nous et nos hoirs et successours et ces qui hont ou hauront cause de nous ou tamps a auenir quant a tenir garder et acomplir tous les chouses dessus dites et vne chascune d'iceles por tant comme a vn chascun de nous appertient auxi comme de chouse adiugiee por la court de monseigneur le duc de Borgogne a la iuridicion de la quele quant a ce nous sogmettons c'est a sauoir nous li diz religioux nous et nos successours et nous li diz procurours en non que dessus et nous li habitanz dessus nommez nous et hoirs et successours En tesmoinaige de la quel chouse nous auons requis et supplie le seaul de la dite court estre mis en ces presentes lettres et essambles doublees por nous les dites parties ensamble les seaux de nous abbe et couant dessus diz les quex nous auons mis es samblaubles de cestes doublees por les diz procurours et habitanz C'est fait en la presence de Jehanz le Curtelier de Dyion clerc iurie de la dite court coadiutour de Jehanz le Ratat notaire de Dyion l'an le mois es jours hores et leux dessus diz c'est a sauoir dou contraut de nous religioux et procurours dessus diz Present maistre Guiy Vienne Hayme de Dompierre et Jehanz de Breteniere saiges en droit et dou contraut de nous habitanz dessus nommez present Guienot le Chargerat Odot et Thierri de Corbeton freres es chouses dessus dites tesmoins requis et appelez