Charter Document - 05340054
Charter Number: | 05340054 |
---|---|
Cartulary Title: | Essai sur la fidéjussion dans l'ancienne Bourgogne et chartes de l'abbaye de Saint-Étienne de Dijon de 1321 à 1332. |
Charter Language: | French |
Charter Origin: | Religious |
Charter Type(s): | Judgement |
Date: | 1329 |
Date type: | Internal, A.D., Feast |
Resource Link(s): |
|
Charter:
En nom de nostre Soignour amen Nous Haymes de Dompierre tenenz le leu de honorauble homme et saige monsoignour Hugue de Courrabuef doien de Chalon chancelier monsoignour le duc de Bourgoigne ffacons sauoir a touz que comme religiouses persones l'abbes et li couuanz de Saint Estiene de Dyion ou leur procurour hahuissient fait aiourner au vanredi deuant la Magdelaine monsoignour Oudri de Vulpains chenone de Losanne selonc la forme et la tenour d'une citation de la quelle tenour est telle Hugues de Courrabuef doiens de Chalon clers le duc de Bourgoigne au preuost de Dyion et a celuy des sergenz monsoignour le duc et nostres que sur ce seray requis salut Il est contenuz en lectres seellees dou seaul de la court monsoignour le duc que messire Oudriz de Vulpains chenones de Losanne requenoit que l'abbes et li couuanz de Saint Estiene de Dyion li hont doney a sa vie tant solemant le mes de Sauigney le Sec en samble les maisons et les edifices les tailles le disme les terres les bois les vignes les tierces et la iustice grant et petite que il hont en la dicte vile et ou finaige pour trauaul consoil et aide faiz et a faire es diz religioux et que pour ce li diz Oudriz promet a doner consoil et aide es diz religioux en ce qu'il hauront a faire et promet encor qu'il tienray les dictes chouses et possideray et panray les fruiz tant comme il viuray en tel meniere que apres son deceps les dictes chouses retorneront es diz religioux paisiblement en samble touz les biens meubles que li diz Oudriz hauroy au dit leu au tamps de son deceps or dit li procurour des diz religioux que li diz Oudriz ne vuet donner consoil ne aide es diz religioux en leurs causes ne en leurs besoignes combien qu'il en hait estey plusours foiz soffisamant requis pour quoy la dicte donacion doit estre aneantie et rappellee et doit li diz Oudriz estre condampnez a perdre les dictes chouses donees a luy pour la cause dessus dicte Et dit encore que Vanconz de Loisseroy sergenz monsoignour le duc pour vertu de execucions donees de nous si comme il dit a la requeste dou procurour au soignour de Grancon hay pris et mis en la main monsoignour les choses dessus dictes et les hay vandues ou marchie de Dyion commes gaiges a Aubertin Lombart pour debte que il dit que li diz Oudriz doit au dit soignour de Grancon et ensinc les chouses dessus dictes sont fors de la main au dit Oudri et ne sont cultiuees les terres ne les vignes ne les edifices sostenuz soffisemmanz Et ensinc s'il auenoit que li diz Oudriz morest li diz religioux sarient ou pourrient estre ampoischiez pour cels qui sarient ensaisinees des dictes chouses a fin qu'il ne porrient paisiblemant recoure es dictes chouses ne hauoir les biens meubles qui sarient au dit leu la quelle chouse est contre la tenour des dictes lettres Si vous mandons que vous aiornoiz a nos iours qui saront a Dyion le vanredi deuant la Magdeloine le dit Oudri pour veoir rappeller ou adnuller ou declarier nulle la dicte donacion pour les causes dessus dictes et pour autres que li diz procurour voudray propouser et pour aler auant sur ce par tant cum raison seray Et aiournez auxi es diz iours pour deuant nous le dit soignour de Grancon ou son procurour et le dit Vancont et le dit Aubertin Lombart qui les dictes choses hay achetees si cum lou dit en samble toutes les lettres et execucions pour les quelles les dictes choses sont prises et vendues et pour oir bone cause de par le dit procurour pour quoy la dicte vandue est de nulle valour et en doit estre leuee la main monsoignour au profit des diz religioux et pour aler auant pour tant comme raison seray Doney le lundi deuant le dit vanredi l'an mil trois trois cenz vint et nuef sellees ce le commandemant fait ce que fait en hauroiz et les nous des aiornez nous rescripuez se vous en estes requis De rechief li diz religioux feirent aiorner le dit Oudri a Dyion par deuant le dit monsoignour le chancelier au macredi apres la feste de saint Luc euuangeliste selonc la forme et la tenour d'une autre citacion qui telle est Hugues de Courrabuef doiens de Chalon clers le duc de Bourgoigne a Vancont de Loisseroy nostre sergent et a celuy de noz sergenz qui requis en seray salut Aiorne a Dyion par deuant nous au macredi apres la saint Luc euuangelistre monsoignour Oudri de Vulpains chanone de Losanne pour apourter toutes lettres et esploiz seellez dou scel de la court monsoignour le duc pour vertu des quelx il dit luy hauoir droit es biens de Sauigney le Sec appertenanz a l'abbey et au couuant de Saint Estiene de Dyion c'est a sauoir mes maisons et les edifices tailles dismes tierces bois vignes terres et la iustice grant et petite et autres biens et pour oir bonnes causes de par les diz religioux pour quoy les dictes lettres sont et dauent estre de nulle valour et que li diz biens leur dauent demorer et leur dauent estre randuz bailliez et deliurez et pour aler auant et rendre es diz religioux sus les deuant dictes chouses pour tant comme raison seray Doney le sambady apres la saint Denis l'an de grace mil trois cenz vint et nuef seelles ces lettres le commandemant fait et les randez au pourteur d'icelles A la quelle iornee li diz Oudriz ne vint ne comparut ne autres pour luy et li procurour des diz religioux actandit tant comme il duit a la dicte iornee et fit sa demande contre le dit Oudri et en sabsence si comme si fust presenz et nous requist deffaut et raiornemant contre le dit Oudri Sus la dicte demande et nous li outroiemes la quelle demande et les autres choses dessus dictes sont contenues en hun memoriaul dou quel la tenour s'ansuit l'an de nostre Soignour mil trois cenz vint et nuef le macredi apres la feste de saint Luc euuangelistre attandit tant comme il duit pour deuant nous Hugue de Courrabuef doien de Chalon clerc monsoignour le duc de Bourgoigne maistres Iehanz de Breteniere clers procurour et en non de procurour des religioux l'abbe et le couuant de Saint Estienne de Dyion contre monsoignour Oudri de Vulpains chanone de Losanne li quelx estoit aiorne a la dicte iornee pour deuant nous a la requeste des diz religioux pour aporter toutes lettres seellees dou seel de la court monsoignour le duc pour la vertu des quelles li diz Oudriz disoit ou maintenoit luy hauoir droit ou mes en la maison et es autres biens a Sauigney le Sec appertenanz es diz religioux et pour oir bone cause de par le dit procurour pour quoy elles estient et dauient estre de nulle valour et pour rendre es diz religioux pour tant comme raison seroit sus fait de lettres seellees dou seel de la dicte court li quelx Oudriz ne vint ne autres pour luy et fit li diz procurour sa demande en requeste contre le dit Oudriz et en sabsence si comme s'il fust presenz en la meniere que s'ansuet Dit et propose en droit pour deuant vous monsoignour le chancelier de Bourgoigne maistres Iehanz de Breteniere clers procurour et en non de procurour de religiouses persones l'abbey et le couuant de Saint Estiene de Dyion contre monsoignour Oudri de Vulpains chanoine de Losanne que il est contenuz en lettres seellees dou seel de la court monsoignour le duc que messire Oudriz de Vulpains chanoine de Losanne cognoit et confesse que li religioux hont doney et baille au dit Oudri a sa vie tant solemant le mes la maison et toutes les chouses que il hauient et hont en la vile et ou finaige de Sauigney le Sec pour cause de ce que li diz Oudriz doit et promet par son sairemant et en bone foy estre dou consoil des diz religioux et leur promet pour ce donner consoil et aide en leurs causes et en leurs besoignes et qui seray feaux es diz religioux et a l'iglise et encor est contenuz es dictes lettres que li diz Oudriz promet tenir les dictes choses en sa main et cultiuer et maintenir bien et loialmant en tel meniere que apres son deceps les dictes chouses en samble touz les meubles qu'il hauray au dit leu au tamps de son deceps demorient paisiblemant es diz religioux les quelles lettres il vous offre a mostrer et encore dit li diz procurour que cum li diz religioux hahussient plait pour deuant le baillif de Dyion contre la commune de Dyion et contre plusours autres les habitanz d'Ahuit et pour deuant nous contre le soignour de Cux et contre plusours autres li diz Oudriz hait estey plusours foiz et soffisemmant requis de par les diz religioux tant par le dit abbey en persone comme par lettres et pour messaiges que veuest a Dyion pour doner consoil et aide es diz religioux sus les dictes choses et en plusours autres granz besoignes qu'il hauient a faire pour aux et pour leur yglise et que li diz Oudriz estoit et hauoit estey en deffaut et contumace tant de fait comme de parole d'auoir obei et encline a la dicte requeste et de done consoil et aide es diz religioux et a lour iglise et que li diz Oudriz hauoit le mes et les choses dessus dictes obligies de fait au soignour de Grancon en plusours granz somes d'argent et hauoit volu et s'estoit consantiz en facent la dicte obligation que s'il ne pahoit les dictes somes que li sires de Grancon les pehut panre et vandre et dit encore li diz procurour que pour cause de l'obligation et consantement dessus diz li sires de Grancon en ses commandemanz hay prises les choses vandues ou fait vandre et baillies a Barchelot Menet et transportees de fait en yceluy Barchelot et que pour ce li diz Oudriz s'estoit randuz et faiz ingrates et non feaux es diz religioux et a leur iglise et que pour ce il dauoit perdre et hauoit perdu tout le droit et le benefice de la dicte donacion et requiert li diz procurour le dit Oudri estre condampney es diz religioux par vostre santance a perdre tout le droit qu'il hauoit ou poeut hauoir es dictes choses pour cause de la dicte donacion et icelles randre restaublir et baillier es diz religioux en samble les fruiz qui puent estre leuez puis le deffaut et transport dessus diz les quelx li diz procurour extime sept vinz liures tornois maismement cum la dicte donacion hait estee faite senz cause raisonable et la sollempnitez que droiz vuet estre gardee es alienations des choses d'iglises non gardee et ce dit li diz procurour et demande par la meillour meniere et par le meillour droit qu'il puet et doit sauf a luy le benefice de droit de corriger d'aioster de hoster et cetera en implorant vostre office en ce qu'il fait a implorer a son profit et requiert encores que les lettres seelles dou seel de la dicte court se nulles en hay li diz Oudriz sus les choses dessus dictes soient adnullees ou au moins suspandues tant qu'il soit cognehu des choses dessus dictes comme il hait estey aiorney par elles apourter et il ne les hait aportees et soffre de prouer li diz procurour des choses dessus dictes ce qui l'an soffiray La quelle demande ensinc faite il nous mostray les lettres dessus dictes et nous requist deffaut et raiornement contre le dit Oudri et nous li outriemes Donne l'an et le iour dessus diz De rechief li diz Oudriz fut raiornez a la requeste des diz religioux ou de leur procurour au iusdi apres la saint Andrie selonc la tenour d'unes autres lettres en citation contenanz telle forme Hugues de Courrabuef doiens de Chalon clercs le duc de Bourgoiyne a Gantot de Loisseroi et a touz autres sergenz monsoignour le dnc et nostres a cuy ces lettres seront baillies salut Cum messire Oudriz de Vulpains chenone de Losanne fust aiornez a Dyion pour deuant nous au macredi apres la feste saint Luc euuangelistre pour aporter toutes lettres et esploiz dou seel de la court monsoignour le duc pour vertu des quelles il disoit luy hauoir droit en la maison en la vile et appertenances de Sauigney le Sec appertenanz a l'abbey et au couuant de saint Estienne de Dyion et pour oir bone cause de par le procurour des diz religioux pour quoy les dictes lettres estient et dauient estre de nulle valour et que li diz biens leur dauient demorer et leur dauient estre randuz bailliez et deliurez et pour aler auant et rendre et repondre au dit procurour sus les deuant dictes chouses pour tant comme raisons saroit au quel iour en l'absence dou dit Oudri li quelx ne vint ne autres pour luy li diz procurour fit sa requeste ou demande la quelle nous li outroiames baillees seellees et nous requist deffaut et raiornement contre le dit Oudri les quelx nous li outroiames Nous vous mandons que vous raiornoiz le dit Oudri a nos iours de Dyion qui saront le ieusdi apres la saint Andrie pour repondre au dit procurour sus les deuant dictes choses par tant comme raisons seray et prions et requerons en aide de droit a toutes iustices estanz fors dou destroit monsoignour le duc qui sur ce saront requises et qui troueront en leur destroit que aiornient le dit Oudri pour deuant nous a la dicte iornee selonc la forme dessus dicte et pour aler auant tant comme l'on pourray pour raison Doney le sambadi apres la feste saint Martin dyuer l'an de grace mil trois cenz vint et nuef seellees ces lettres le commandemant fait et ce que fait en hauroiz nous restituez a la dicte iornee au quel ieusdi actandit tant comme il duit a Dyion pour deuant nous li procurour des diz religioux contre le dit Oudri li quelx ne vint ne conparust a la dicte iornee ne autres pour luy Or nous requist li diz procurour des diz religioux dessus diz et raiornement contre le dit Oudri sus les chouses dessus dictes et nous li outroiames et fut encor raiornez li diz Oudriz a la requeste dou dit procurour a Dyion pour deuant le dit monsoignour le chancelier au iour de la voille de l'apparicion nostre soignour pour respondre es diz religioux et pour aler auant sus les dictes chouses pour tant cum raison seroit a la quelle iornee li diz Oudriz ne autres pour luy ne comparut point qui hahust grace de pladoier par procurour et pour ce selonc la costume generaul et notoire de Bourgoigne especialment selonc le stile de la court de monsoignour le chancelier nuls ne doit estre recehuz a pladoier pour procurour en demandent ne en deffandent s'il nay grace de pladoier pour procurour nous donames au dit procurour des diz religioux present et attandant tant comme il duit et requerant deffaut et raiornement pour descorper les deffauz faiz en la dicte cause et pour aler auant en icelle pour tant cum raison seroit Apres ce fut raiornez li diz Oudriz dou mandement dou dit monsoignour le chancelier a Dyion pour deuant luy ou pour deuant son leu tenant au vanredi apres la feste de la Chandelouse pour descourper les diz deffauz ou pour respondre et aler auant sus les chouses dessus dictes pour tant comme raisons seroit Au quel vanredi li diz Oudriz ne vint ne comparut ne autres pour luy et pour ce nous donames au dit procurour des diz religioux requerant a grant instance deffauz et raiornement pour oir droit sus les diz deffaus et pour veoir adiugier es diz religioux le profit que il dauient hauoir pour raison des diz deffauz et de rechief fut raiornez li diz Oudriz dou commandement dou dit monsoignour le chancelier a Dyion pour deuant luy ou pour deuant son leu tenant au lendemain des bordes pour oir droit se dire lou pooit lon sus les diz deffauz et pour adiuger es diz religioux le profit d'icels se faire le pooiens au quel iour se comparurent pour deuant nous maistres Jehanz de Bretenere clers procurour et en non de procurour pour les diz religioux d'une part et Raouls li Bornes de Bicey en la Coste procurour et en non de procurour dou dit Oudri d'autre part celuy iour nous requist li diz procurour des diz religioux que nous li deissiens droit sus les diz deffauz et adiugessiens a luy et es diz religioux le profit qu'il dauient hauoir pour raison des diz deffauz le dit procurour dou dit monsoignour Oudri disant au contraire que nous ne dauiens ne pooiens adiuger es diz religioux le profit des diz deffauz pour ce especial quar il offroit a paier les despanz faiz de par les diz religioux pour raison des diz deffauz et de doner camptoin de deffandre et poursuigre la dicte cause pour tant comme raisons seroit et disoit que a ce dauoit estre recehuz selonc droit meismement quar se tant estoit la saisine des dictes chouses adiugie es diz religioux et baillie pour raison des diz deffauz si denroit estre recehuz li diz Oudriz a la dicte saisine et li denroit estre deliuree paiez les despanz et donee la campcion dessus dicte et sus ce requeroit droit le procurour des diz religioux disant et affermant au contraire que selonc la costume de Bourgoigne generaul et notoire totes foiz que aucuns est aiornez sus biens non meubles et fait trois deffauz en la cause et apres ce est aiournez quarte foiz pour descorper les deffauz et il ne les descourpe a la iornee qui li est sus ce assignee il doit estre condampnez a perdre la saisine de la chouse demandee et doit estre adiugie au demandeour et dauqui en auant ciz qui hay fait les deffauz ne puet recouurer la saisine se n'est pour iugement de la proprietey Et cum li diz Oudriz hahut faiz trois deffaux en la dicte cause et sus les choses contenues en la dicte demande et hahut estey aiorney la quarte foiz pour descor pour les diz deffauz et il hahust riens descourpey nous requeroit que nous condampnessiens le dit Oudri a perdre la saisine des choses contenues en la dicte demande et icelle saisine adiugessiens au dit procurour et es diz religioux et sus ce meissiens silence au dit Oudri et nous requeroit encore que nous adnullessiens ou au moins suspandessiens toutes lettres que li diz Oudriz hay sus les chouses dessus dictes seellees dou seel de la court monsoignour le duc et disoit que ensinc le dauiens faire vehu et considerey la tenour de la dicte demande et dou procels dessus dit et sus ce requeroit droit les quelx chouses et plusours autres raisons proposees nous dou consantement des diz procurours assignames iournee es dictes parties au mardi deuant pasques fluries a oir droit sus les raisons proposees d'une partie et d'autre les quelles les dictes parties nous dauient baillier per escript dedans la dicte iournee et auxi pour oir droit comme dessus sus les diz deffauz et pour adiugier es diz religioux se adiugier le poorens le profit des diz deffauz au quel mardi ne se comparut li diz Oudriz ne autres pour luy pour deuant nous le procurour des diz religioux comparissant a grant instance que nous li deissiens droit sur les choses dessus dictes et li adiugessiens le profit des diz deffauz et a la parfin nous qui ne volons ne dauons defaillir a nuns de faire droit a la requeste dou dit procurour des diz religioux present et demandent droit a grant instance l'absence dou dit Oudri ramnplie et suppliee pour la presence de Dieu vehues les raisons que nous hont ostees baillies de par les diz religioux et considerey ce quay estey proposey de bouche vehues auxi les lettres des diz religioux pour la vertu des quelles ils hauient en cause le dit Oudri la demande et tout le procels dou consoil de prodomes et de saiges Dieu haienz tant solemant deuant les eauz consideree la costume de Bourgoigne et le stile de la court de la chancelerie estre telle comme li procurour des diz religioux l'ay proposee prononcons et a droit les raisons proposees de par le dit Oudri non estre receuaubles en l'estat de la cause et en la forme et a la fin quelles sont proposees et condampnons le dit Oudri a perdre la saisine qu'il hauoit ou pooit hauoir es choses contenues en la dicte demande des diz religioux et d'icelle saisine le priuons par nostre santance et mectons silence ou dit Oudri sus ycelle et la dicte saisine adiugeons es diz religioux et a lour procurour en non d'aux sauf au dit Oudri le droit de la proprietey et toutes lettres seellees dou seet de la court monsoignour que li diz Oudriz hay sus les dictes chouses suspandons a fin que execution ne soit donee sus ycelles et qu'il ne soit oiz pour voie de execution sus le fait des dictes lettres et se aucunes execution hauoit li diz Oudriz sus les dictes lettres nous les rappellons et mectons a neant en samble leur effez en tant comme elles pehuent toichier la saisine dessus dicte En tesmoin de la quelle chouse nous hauons fait mectre en ces presentes lettres le seel dou quel lon use a Dyion es causes de la dicte court Doney le mardi deuant pasques fluries dessus dit l'an de grace mil trois cenz vint et nuef Hugues de Courrabuef doiens de Chalon clers le duc de Bourgoigne au preuost de Dyion et a celuy de noz sergens qui requis en seray salut Nous mandons a vous en samble et a chascun de vous pour soy que la sentence donee de maistre Hayme de Dompierre nostre leu tenant en ces presentes annexee vous mectiez tromchiement a execucion selonc la tenour toutes foiz que vous en seroiz requis et gardez et faites tenir et garder de point en point la dicte santance et en touz ses poinz Doney le jeusdi deuant pasques flories l'an mil trois cenz vint et nuef seellez ce le commandemant fait et ce que fait en hauroiz nous rescriuez se vous en estes requis