Charter Document - 05340040

A touz ces qui verront et orront ces presentes lettres nous Jehanz de Dynteuille cheualiers bailliz de Dygenois facons sauoir que comme par deuent noble home et saige monsoignour Jeham de Chastoillon cheualier adunques baillif de Dygenois nostre deuentier plaiz fuist assis entre le procurour de l'abbey et dou couuent de Saint Estiene de Dyion d'une part et Odot Sarron de Cuttigney d'autre sor ce que li diz procurour proposoit que comme la dicte yglise de Saint Estiene fuist saissie de la basse iustice de la ville et dou finaige de Cugtygney et li procurour de la dicte yglise haust trait en cause par deuent le dit abbey comme par deuent iuge ordenaire dou dit leu et qui estoit ou dit temps en saisine de la dicte iustice lou dit Oudot Sarron suis plusors heritaiges c'est asauoir mes maisons terres prez et suis toutes les choses non mobles que li diz Odoz tenoit en la ville et ou fynaige de Cuttigney et sor ce plusours proces faiz la saisigne des dictes choses demandees fuit adiugie a la dicte yglisse par le commissaire dou dit abbey doney sor ce et apres ce li fuit la dicte saisine deliuree par vertu de l'exeqution de la dicte sentence Et li diz bailliz nostre deuantier hahust ostey les dictes choses de la main de la dicte yglisse et de ses genz et baillies au dit Odot si comme l'on disoit si requeroit li diz procurour ou nom que dessus a nostre dit deuantier que les dictes chosses remeist en la main de la dicte yglise ou point et en l'estat queles estoient au temps qu'il y mit la main lou dit Odot disant au contraire et deffendent que la dicte requeste ne deuoist estre faite par ce que la dicte sentence estoit nule et donee de non son iuge quant au temps quale fuit donee la basse iustice de Cugtyney estoit en la main monsoignour le duc comme en main soueraigne par le debat des diz religioux d'une part et de mahour des escheuinz et de la commune de Dyion d'autre les queles choses proposees de par le dit Odot li diz procurour en tant comme elles li sont contraires mit en ny et soffray de prouer de son fait ce que lam soffirait a la fin a quoy il tendoit et auxi li diz Odoz nia le fait proposey de par le dit procurour et soffray de prouer le siem a la fin a quoy il tendoit et sur les entencions des dictes parties plusours tesmoings furent produz de l'une partie et de l'autre iure apellee partie dehuement et examinez diligemment publication faite et repruches sur les tesmoings baillies raisons de droit de l'une partie et de l'autre conclux en la cause et requis a oir droit de noz deuentiers baillifz de Dygenois et le proces venu a nous collacion faite d'yceluy presentes les parties a la parfin iournee hont estey plusours assignees tant de nos deuentiers bailliz de Dygenois cum de nous a oir droit sur le dit proceps darrerement iournee assignee a Dyion a nostre essize dou dit leu qui se commencay le semadi apres le dyemoinge que l'on chante oculi mei iusques au quel iour nostre essize de Dyion fuit demendee dou iuedi apres la feste de saint Pere en feurier Vehu les proces deuent diz heu consoil et deliberacion des saiges sur ycels ou nom de nostre soignour amen Nous prononcons et a droit par nostre sentence diffinitive que li dit religioux hont soffisamment prouee lour entencion a la fin a quoy il tendent et Odoz Sarrons moins soffisamment a la fin a quoy il tend si seray faite la requeste des diz religioux Ou tesmoig de la quel chose nous hauons mis nostre grant seaul dou quel nous vsons en nostre bailliaige en ces presentes lettres doney le dit semadi l'am de grace mil trois cenz vint et sept Jehanz de Dynteuille cheualiers bailliz de Dygenois au preuost de Dyion salut nous vous mandons et commectons que la sentence donee de nous pour les religioux de Seint Estiene de Dyion contre Oudot Sarron de Cuctigney a la quele sentence ces presentes lettres sont ennexees vous mettez a execucion selon sa tenour Done a Chalon le mardi deuent la Natiuite de Nostre Dame l'an de grace mil trois cenz vint et huit