Charter Document - 05340035

A touz cels qui ces lettres uerront Hugues de Cruse garde de la preuostey de Paris saichient onc que nous hauons vehu les lectres dou roy messire scellees de son grant seaul contenant la forme qui sansuit Charles par la grace de Dieu rois de France et de Nauarre a notre amey maistre Rahoul le Scutrier dien de Mortain clerc salut et dilection Comme moe foiz vous haions mande et commis par noz lettres passees de certaine sciance de nous genz des compes que controignessiez ou faissiez controindre les ploiges de l'abbey de Saint Estienne de Dyion ou lour hoirs por l'esploicement et vandue de lour biens tant por arreges que nous fut dehuz por vne composicion jadis faite entre nous et les freres de l'ospitaul de saint Jehan de Brechon comme por les arreges dehuz au dit hospitaul en quoi les diz ploiges sont tenuz a nous et au dit hospitaul por certaine cause contenues au dit mandemant por la vertu des quelles vous hauez commancie assurer execucion sus les biens des hoirs des ploiges dessuz diz la quelle execucion vous hauez retardee a faire por la vertu d'aucune lettre empechois tahue la vertu de nos lettres execoutoires dessus dites a vous enuoies ou dommaige et ou retardemant de la paie de nous et dou dit hospitaul dou dit il nous desplait se il est enxint Pour quoy nous vous mandons et commettons de rechief que non quittant lettres empechiees por les diz ploiges lour hoirs et le dit abbey et couuant et autres a empecier subrepticionses vous alez auant en la dite execucion selonc la forme et la tenour de nos dites lettres a vous enuoies et commises Doney a Paris le XXVII jour de januier l'an de grace mil CCC vinc et sex Por la vertu des quelles li diz maistres Rahoulz por ce presenz por deuant nous le quel en leu de luy commis et estaubli a faire la dite execution et enterener le mandemant dou dit messire le Roy [] de troyes moilloz son venent vssier de la chambre dou parlement dou dit messire le Roy [] de ces lettres selonc la forme et tenour des premeres lettres dou dit messire le Roy a lui enuoies et commises les quelles sont encorporees es lettres pour les quelles ces presentes sont annexees seaulees dou seaul de la dite preuostey de Paris et dou seaul dou dit maistre Rahoul dont nous hauons ehu l'originaul et li donnay autre pooir [] done li hauoit por vertu des dites lettres por les quelles cestes sont annexees mandans et commandanz por la tenour d'ycelles a touz les justiciers et subiez dou dit messire le Roy requerant a touz autres de par ycelluy soiz nous et pranre de por lui que [] en ce facent obeissient et [] Datum pro copiam sub sigillo nostri capituli die decima februarii anno domini millesimo CCC vicesimo sexto []