Charter Document - 05340022

Nous Pierres de Semur clercs le duc de Bourgogne facons sauoir a touz que cum cause fust mehue pour deuant nous entre le procurour de religieuses persones l'abbey et li couant de Saint Estienne de Diion en non de procurour d'une part et Huguenot de Troicheres demorans à Mombart ou non de luy et de Lore sa femme qui fut suer Jeham de Perrecey d'autre sur ce que li diz procurour ou non que dessus propousay por deuant nous contre les diz mariez que vne maison assise a Diion en la rue es Nonains de Thart en la quelle demore Hugues Chappey appertient es diz religieux por droit de soignorie ou auxi et que vne autre maison assise entre la dite maison d'une part et vne autre maison qui est des diz religieux d'autre estoit au dit Jeham de Perrecey au temps que il viuoit et que il ala de vie a mort et en estoit sasiz comme de la soe propre et que par vertu de couenances contenues en lectres seaulees dou seaul de la court monseigneur le duc faites entre les diz religieux et li dit Jeham au temps que li diz Jehans tenoit la dite maison comme soe sus le fait et le droit des dites maisons la maison dou dit Jeham ne li diz Jehans ne sui successours ne cilz qui de lui hont ou hauront cause ne hauoient pouhoient droit sasine ne proprietey ne seruitute en la dite maison des diz religieux ne ou mur d'ycelle manques tant solemant de mectre et de tenir mis ou dit mur trois boichoz issanz dou gros de hun poin dou dit mur pour deuer la maison dou dit Jeham et cum puis la confection des dites lectres et contre la tenour d'ycelles li murs de la maison des diz religieux hoit estey perciez en plusiours leux et mis marrien ou dit mur por sostenir la maison dou dit Jeham et hoit l'on mis et estandu vne partie dou toit d'yceley maison sus le dit mur ou griez et ou preiudice des diz religieux et li diz Hugues et sa femme a cuy est auenue la dite maison apres le deceps dou dit Jeham et la tenent en disant qu'il sont sasis dauoir pertuis et fenestres ou dit mur et d'apuier et sostenir le marrien de la dite maison ou dit mur et d'auoir le toit de la dite maison sur le dit mur empoichoient les diz religieux a oster les chouses dessus dites faites et mises ou dit mur et sus yceluy outre les diz trois boichoz Nous requerroit li diz procurour ou non que dessus que nous desclaressiens le dit Hugues et sa femme et lour dite maison non hauoir droit ou mur de la maison des diz religieux maques des diz trois boichoz hauoir et tenir ou dit mur si cum dessus est dit et que li pertuis fenestres et marrien et li toiz de la maison des diz mariez et les autres chouses mises ou dit mur fors que ce qui est sur les diz trois boichoz fussient ostez et que li diz mariez cessient de l'ampoicher es diz religieux en ostant et deffacent les chouses dessus dites faites et mises en lour dit mur et que a ce les condempnessions Et des chouses dessus dites s'offroit a prouer li diz procurour en non que dessus ce qui l'an soffiroit se niez ly estoit A quoy respondit li diz Hugues en non de luy et de sa dite femme que il n'estoient pas hoirs dou dit Jeham et que les dites lectres ne les toichoient en riens et lou fait dou dit procurour en tant comme il estoit contraires à aux mit en ny le dit procourour en non que dessus disant au contraire que il estoient hoirs ou successours et hauoient cause dou dit Jeham et des biens d'ycelluy se estoient heuz entremis apres son deceps et que nous deuiens faire la requeste dou dit procurour moimement comme li diz Jehans tenist la dite maison por soe et en morit li diz Jehans sires et sasiz et de ce soffrit à prouer ce qui li s'offirait a fonder santancion Es quelx chouses prouer a luy noies dou dit Hugues en non que dessus Li diz procurour en non qve dessus amenay plusiours tesmoignaiges et mit en meniere de proue les lectres faites sus l'acort dessus dit Desquelx tesmoignaiges recehuz les sairemanz yceaulx diligemmant examinez le dit Hugues ou non que dessuz adiorne soffisammant pour deuant nous pour vehoir faire la publicacion des lectres et des attestacions des diz tesmoignaiges la dite publicacion faite en l'absance dou dit Hugues plusiours jours assignez por deuant nous es dites parties a oyr droit a la parfin le sambadi apres la quinzaine des Bordes continuee de nous de jour en jour dou juedi deuant au quel juedi li diz Hugues et sa femme estoient adiornez por deuant nous a oyr droit en la dite cause le procurour des diz religieux estant en jugement por deuant nous et à nous requerrant instammant droit a luy estre dit en ceste dite cause les diz mariez absenz par contumace usey dou consoil de prodomes et saiges deu haiant tant solement deuant les eaulz ou non dou pere et dou fil et dou saint esprit prononceons et a droit por notre sentance diffinitiue le dit procurour des diz religieux hauoir soffisammant prouee santancion et por notre dite sentance declairons le dit Hugues et sa femme et lour dite maison non hauoir droit ou mur de la maison des diz religieux fors solemant des diz trois boichoz hauoir et tenir ou dit mur si cum dessus est dit Et les pertuis fenestres le marrien et le toit de lour dite maison et les autres chouses mises ou mur des diz religieux d'auoir estre ostez demolliz et deffaiz fors que ce qui est sus les diz trois boichoz et que ils cessoient de trobler empoicher les diz religieux es chouses dessus dites Et a ce les condempnons par notre dite santance et sur ce lour mettons perpetuel sillence Ou tesmoignaige de la quel chouse nous hauons fait mectre lou seaul dou quel l'on vse es causes de la cort mons le duc à Diion Fait et doney le sambadi dessus dit l'an de grace mil CCC vint et quatre