Charter Document - 05340020

Johannes episcopus seruus seruorum Dei dilectis filiis abbati monasterii sancti Benigni diuionensis lingonensis diocesis et decano ecclesie cabilonensis ac officiali Trecensis salutem et apostolicam benedictionem Ea que iudicio et concordia terminantur firma debent et illibata consistere et ne in recidiue contentionis scrupulo relabantur apostolico conuenit presidio communiri Exhibitu siquidem nobis dilectorum filiorum Ponczardi abbatis et conuentus monasterii Sancti Stephani de Diuione ordinis Sancti Augustinis ac Henrici decani et capituli capelle ducis Burgundie dicti loci de Diuione ad romanam ecclesiam nullo medio pertinentis lingonensis diocesis petitio continebat quod olim inter quondam Hugonem tunc abbatem et conuentum dicti monasterii ex parte vna et quondam Petrum decanum et capitulum dicte capelle ex altera super integritate seu perceptione cuiusdem integre prebende quum dicti abbas et conuentus prefatum monasterium obtinere dicebant in capella predicta faciendo in ea per canonicum regularem presbyterum eiusdem monasterii deseruiri nec non super perceptione fructuum redditum ex prouentuum primi anni omnium prebendarum dicte capelle pro tempore vacantium in eadem Jure quoque percipiendi decimas de quibusdam vineis dicte capelle sitis in territoriis decimalibus monasterii antedicti ac etiam super ius habendi cimiterium ac inhumandorum et clericorum eiusdem capelle quod prefati decanus et capitulum sibi nitebantur per priuilegia sedis apostolice vendicare et super quibusdam aliis articulis orta materia questionis Tandem post plures tractatus inter easdem partes habitos ex quibus plena concordia non exstitit subsecuta mediantibus bonis viris inter partes easdem super predictis aliisque variis et diuersis articulis amicabilis compositio interuenit per quam dicte partes mutuo videlicet certos redditus et census annuos et quedam alia iura in se ipsas transferre curarunt saluo tamen et reseruato sacrosancte romane ac uniuersalis summi pontificis beneplacito et consensu sine cuius auctoritate nihil in hac parte intendebant facere uel etiam attemptare quout in patentibus litteris inde confectis Hugonis abbatis et conuentus ac Petri decani et capituli predictorum sigillis munitis plenius continetur Et licet post modum omnibus et singulis supradictis felicis recordationis Clementi pape et predecessori nostro expositis fuisset eidem a dictis partibus humiliter supplicatum vt confirmationis sue robur eisdem ex certa scientia adicere dignaretur idemque predecessor predicta omnie et singula ex certa scientia confirmasset Quia tamen littere predecessoris eiusdem super huiusmodi confirmatione confecta bullate propter ipsius superuenientem obitum non fuerunt pro parte Ponczardi abbatis et conuentus ac Henrici decani et capituli predictorum nobis exstitit humiliter supplicatum vt compositionem predictam cum omnibus articulis contentis in ea confirmationis nostre munimine roborare auctoritate apostolica dignaremur Nos itaque abbatis et conuentus ac decani et capituli predictorum supplicationibus inclinati compositionem huiusmodi et omnia in ea contenta rata et gratia habentes illa auctoritate apostolica ex certa scientia confirmauimus supplentes omnem defectum si quis interuenisset forsitan in premissis vel aliquo premissorum de apostolice plenitudine potestatis quo circa discretioni vestre per apostolica scripta mandamus quatenus vos vel duo aut vnus vestrum per vos vel per alium seu alios predictis partibus efficacis defensionis presidio assistentes faciatis compositionem ipsam auctoritate nostra firmiter obseruari nec partes easdem et ipsarum alterutram ab aliquibus super predictis contra huiusmodi nostrarum confirmationis et suppletionis tenorem molestari indebite permittatis molestatores huiusmodi nec non contradictores quoslibet et rebelles per censuram ecclesiasticam appellatione post posita compescendo nec obstante si aliquibus a sede sit indultum predicta quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem Datum Auinione X kalendas janua pontificatus nostri anno nono