Charter Document - 05340017

Nous Eudes dux de Bourgoigne facons sauoir a touz que cum li doyens et li chapitres de nostre chapale de Dyion haient baillie et baillient a religioux hommes labbey et le couant de Saint Estiene de Dyion les bans de la vendue des vins en la ville de Dygeon et tout le droit qu'il hont es diz bans por raison d'une composition faite entre les dictes parties et par eschaange des vantes et des setiers que li dit religioux hauoient en la ville de Dyion nous pour le bien de pais entre les dictes parties et lour eglises nous consantons a la dicte tradicion et au dit eschaange et le loons et confermons non obstant que li diz bans fussient de nostre fie ou de nostre fundation et que les rentes des personaiges de la tresorerie de la chantrerie et de la preuostey de nostre dicte chapale estient assignez surs les diz bans et que par ce li tresoriers li chantres et li preuoz nous doiuent faire hommaige En tesmoingnaige de la quel chouse nous hauons fait mettre nostre grant seaul en ces presentes lettres donnees le vanredy apres la feste saint Denis l'an de grace mil trois cenz vint et trois