Charter Document - 05340005

A touz ces qui verront et orront ces presentes lettres nous Jehans de Chastoillon cheualiers bailliz de Digenois facons sauoir que cum plaiz fust mehuz par deuant nous entre frere Hugue d'Ostun procureur et en non de procureur de religiouses persones labbey et le couuant de Saint Estienne de Dyion d'une part et Raoul Moingeron et Villemot Moingeon d'Ahuist en non daux et pour aux et comme procureur et en non de procureur des autres hommes et habitanz de la dite vile d'Ahuist d'autre part En affermant de par le procureur des diz religioux en non que dessus que par la generaul et notoire costume de Bourgoigne tuit habitant sont taillauble haut et bas se il ne monstrent tytre de frainchise au contraire et pour ce disoit et affermoit li diz procureur en non que dessus que li dit religioux en non d'aux et de lour dite yglise estoient et hauoient estey pour plusours annees et pour les darriere en saisine et en possession paisible de leuer taille haut et bas sus les diz habitans d'Auhist chascun an vne foiz plus autre foiz moins selon ce qu'il lour sembloit bon Item estoient et hauoient estey en saisine en la meniere que des sus de leur et perceuoir chascun an d'un chascun des diz habitans d'Ahuist qui tient feu et leu en la dite vile hun bichot d'auoine que l'on appelle sauuement Item estoient et hauoient estey en saisine en la meniere que dessus de leuer et perceuoir chascun an d'un iornaul de terre assis ou finaige d'Ahuist demi quartaul de bley de rente parmi conseaul et auoine la quele rente est appelee renterre exceptez des terres assises ou dit finaige que l'on appelle les aleux Si nous requeroit li diz procureur en non que dessus que se li procureur des diz habitanz en non que dessus cognoissoient les choses dessus dites estre uoires que nous les condampnessens et condampnez controingnessens a cesser dou trouble et de l'empeschemant que il metoient es diz religioux en lour dite saisine et auxi les condampnessiens et condampnez controignessiens a paier es diz religioux les dites tailles et rentes Et se il les metoient en ny li procureur des diz religious en non que dessus les offroit de prouer a fin de santancion Contre la quele entation fut dit et apposey de par les diz Raoul et Villemot en non d'aux et pour aux et comme procureur et en non de procureur des autres habitanz d'Ahuist que il et li autre habitant d'Ahuist estoient et auoient estey pour les darreres annees et pour plus et pour tant de temps comme il assiert a tenir et a acquerir droit de proprietey en saisine et en possession paisible de vendre et aliener franchement a cuy qu'il lor plait miez et de quelque condition qu'il soient lour heritaiges qui sient en la vile d'Ahuist Item de marier leur filles et de doner de lour heritaiges Item estoient en saisine en la meniere que dessus d'auoir leur parcours sur ces de Dyion et des viles voisines et de vendre lour heritaiges franchement et de tenir lour heritaiges franchement dois quelque leu qu'il lour plait demoirer pour paiant cens et disme Item estoient en saisine en la meniere que dessus de demorer franchement en la dite ville d'Ahuist pour paiant chascun an vne foiz es diz religioux cent libres de dygenois ou la valour et sont gitees et hugalees les dites cent libres pour quatre ou six prodomes que li dit habitant eslisent Item estoient en saisine en la meniere que dessus de eslire messiers et vigniers chascun an en la vile d'Ahuist pour guarder lour blez et lour vignes Et li dit religioux ou lour comandemanz recurent le sairement des diz messiers et vigniers de faire l'office bien et loiaulmant Item estoient en saisine en la meniere que dessus de panre et cuillir chascun an roortes pour lour charrues et liens pour lour moissons es boiz des diz religioux qui sont assis dessus Ahuist pour raison des coruees que li dit habitant en paient chascun an es diz religioux Item estoient en saisine en la meniere que dessus de estre de la haute iustice de Dyion et de la banlee et de viure et joir des priuileges de Dyion toutes foiz que mestiers lou faire En la quele saisine et possession les trobloient et empeschoient li dit religioux si comme il disoient Si nous requeroient li procureur des diz habitanz en non que dessus que se li procureur des diz religioux cognoissoit les choses dessus dites estre voires que nous condampnessiens les diz religioux et condampnez controignessiens a cesser dou trouble et de l'ampoischemant que il lour y mettoieut Et se il les metoit en ny li procureur des diz habitanz en non que dessus les offroient de prouer a fin de lour entantion Sus les quex faix et articles ensine proposez d'une part et d'autre et niez de cay et delay et affermez a prouuer ce que mestiers lour en feroient En protestant que ce qu'il en proueroient en tout ou en partie lour vaussist et fust sauf Nous moismes la chose dou debat en la main de mons Et sur ce plusours tesmoins produiz et amenez d'une partie et d'autre et plusours faiz proposez deuant publication de tesmoins et nyez de la partie aduerse et auxi plusours tesmoins produiz et amenez et examinez tant sus le fait principaul cum sus les faiz proposez deuant publication Et fus les faiz auxi contenuz es raisons proposees contre les tesmoins et les diz des temoins amenez d'une partie et d'autre et plusours raisons de fait et de droit proposees de cay et delay et sur ce plusours iournees assignees es dites parties a oyr conclux et renoncie en la dite cause a la parfin iournee assignee es dites parties a oyr droit troinchiement en la dite cause C'est a sauoir a nostre assise de Dyion qui sont commancay le mercredi apres les Bordes a la quele iournee les dites parties estanz en iugement par deuant nous et requerant droit sur ce a grant instance Vehu tout le proces et le demeney de la cause et diligemmant examiney vsez dou consoil de prodons hommes et saiges haianz Dieu tant solemant deuant les eulz en non dou pere et dou fil et dou saint esperit prononceons et a droit par nostre sentence diffinitiue le procureur des diz religioux et en non que dessus hauoir bien et soffisamment prouey sentention et ensinc lour adiugons la saisine de leuer la taille haut et bas sus les diz habitanz d'Ahuist et pour hugaler ycelle taille sus les diz habitanz appeleront li dit religioux ou lour commandemanz des proudomes de la vile Item lour adiugons la saisine de leuer et perceuoir chascun an sus les diz habitanz le sauement et la renterre sus les terres d'Ahuist les queles possident lour hommes d'Ahuist qui ont plaidoie en ceste cause en la forme et en la meniere qu'il est contenu en lentancion des diz religioux sauf le droit et la question de la proprietey Et les procureurs des diz habitans en non que dessus condampnons par nostre dite sentence a cesser dou trouble et de l'empoischement qu'il lour y metoient Item prononcons et a droit par nostre dite sentence les procureurs des diz habitanz en non que dessus non auoir prouey soffisamment lour entancion Et ensinc assoillons les diz religioux de ce que li procureur des diz habitanz en non que dessus proposoient et auoient proposey en contre aux c'est à sauoir de ce qu'il se disoient estre en saisine auoir lour parcours à Dyion et es autres viles voisines Item de tenir lour heritaiges frainchement dois quelque leu qu'il lour plaisoit Item de vendre lour heritaiges frainchement a cuy qu'il lour plaisoit et de doner en mariaige lour heritaiges frainchement quand il marioient lour filles fors d'Ahuist et n'est pas nostre entancion par ceste sentence de restroindre franc mariaige sauf le tramport des heritaiges faire frainchement Item qu'il soient de la haute iustice de Dyion et qu'il viuent selonc les priuileges de Dyion Item de tenir fuers d'Ahuist frainchemant et de vendre frainchemant lour heritaiges Item qu'il soient demoranz a Ahuist franc et quitte pour paiant es diz religioux vne foiz l'an tant solemant cent libres dygenois Et quant a ces choses dessus dites nous metons es diz habitanz silence perpetuel Item prononcons et a droit par nostre dite sentence les procureurs des diz habitanz en non que dessus quant es doux articles qui parlent de panre roortes et liens es bois des diz religioux Item de meitre lour messiers et vigniers a Ahuist hauoir bien et soffisammant prouey lour entencion Et ensinc lour adiugons la saisine de panre et cuillir roortes pour lour charrues et liens en moissons es bois des diz religioux d'Ahuist Item de eslire messiers et vigniers soffisanz chascun an a Ahuist pour guarder lour blez et lour vignes sauf tant qu'il facient lou sairement en la main des diz religioux ou de lour commandemant de faire l'office Et quant a ce nous condampnons les diz religioux a cesser dou troble et de l'empeschement qu'il lour y metoient Au tesmoignage de la quel chouse nous hauons saelees ces lettres dou seaul de nostre bailliaige Faites et donees a Dyion le mercredi dessus dit l'an de grace mil trois cent vint et doux