Charter Document - 05330087
| Charter Number: | 05330087 |
|---|---|
| Cartulary Title: | Essai sur les procureurs au parlement de Bourgogne, et Chartes de l'abbaye de Saint-Étienne de Dijon, de 1309 à 1320. |
| Charter Language: | French |
| Charter Origin: | Lay |
| Charter Type(s): | Judgement |
| Date: | 1317 - 1318 |
| Date type: | Internal, A.D., Feast |
| Resource Link(s): |
|
Charter:
Nous Jehans de Chastoillon cheualiers bailliz de dygenois facons sauoir a touz que cum de par religiouses persones labbey et le conuant de saint Estiene de Dyion nous fust plusiours foiz requis que les corps de trois hommes les quex la gent et li sergent des diz religioux a ce faire commis et estaubliz hauoient jugiez a mort et fait pandre et affaler a lour justice d'Aneres et pour lour forfait item et le corps dun homme vif le quel il tenoient pris en lour prison es crotes d'Aneres pour suppecon de cas de crime si cum il disoient les corps des quex trois nommes morz et justiciez si cum dessus est dit maistres Jehans Francois de Dyion de nostre mandement et par vertu dune commission sur ce faite de nous a lui hauoit ostez ou fait oster et deppandre de lour dite justice et le corps dou dit homme vif que pris tenoient esdites crotes d'Aneres hauoit fait panre oster et giter hors de la prison des diz religioux et les corps daux tant des hommes morz cum de lomme vif hauoit tranportei et transletei ou fait tramporter et transleter hors de la justice des diz religioux et en aux deppoillant et dessaisissant de lour dite justice si cum il disoient nous feisseins remotre arriers an len en restaublissant et resaisissant lour dite justice et sur ce a la requeste des diz religioux et par la vertu dou commandement de mons qui sur ce nous ha mande a faire brief droit et hatif es diz religioux haiens fait a sauoir et a enquerir des chouses dessus dites la verite la quele enqueste faite et complete et a nous aportee vehue et diligemment examinee et haiens troue par la dicte enqueste les choses dessus dites estre voires vsei dou consoil de proudons hommes pronuncons et a droit par nostre sentence diffinitiue que la justice des diz religioux sera restaublie des corps des diz hommes morz et lour dite prisons dou corps dou dit homme vif et par figure sauf le droit d'autrui En tesmoignage de la quel chouse nous hauons sealees ces lectres dou seal es causes de nostre bailliaige faites et donees a Dyion le mercredi apres lapparition de Nostre Soignour lan de grace mil trois cenz dix et sept Jehanz de Chastoillon cheualiers bailliz de digenois au preuost de Diyon salut Nous vous mandons que la santance en la quelle ces lettres sont annexees vous metez dehuemant a exequcion selonc sa tenour donnees le semadi deuant l'Ascencion Nostre Seignour lan de grace mil CCC et dix et huit